ইউক্ৰেইনত নিহত ছাত্ৰ নবীন শেখৰাপ্পা জ্ঞানগৌড়াৰ পৰিয়ালে তেওঁৰ মৃতদেহ কৰ্ণাটকলৈ উভতাই অনাৰ বাবে অপেক্ষা কৰি থকাৰ সময়তে এজন বিজেপি বিধায়কে কাণ্ডজ্ঞানহীন মন্তব্যৰে সৃষ্টি কৰিছে তীব্ৰ বিতৰ্কৰ।
কৰ্ণাটকৰ হুবলি-ধাৰৱাড সমষ্টিক প্ৰতিনিধিত্ব কৰা বিজেপি বিধায়ক অৰবিন্দ বেলাদে কয় যে এটা মৃতদেহে বিমানত অধিক স্থান লয়। কফিনৰ পৰিৱৰ্তে প্ৰায় ৮ ৰ পৰা ১০ জন লোকক বিমানত আনিব পাৰি।
নবীনৰ মৃতদেহ কেতিয়া তেওঁৰ গৃহচহৰ হাভেৰীলৈ ঘূৰাই অনা হ’ব সেই সন্দৰ্ভত মৃত ছাত্ৰজনৰ পৰিয়াল অনিশ্চয়তাৰ মাজত আছে। এই সন্দৰ্ভত বিজেপি বিধায়কজনে স্থানীয় লোক তথা সংবাদ মাধ্যমৰ প্ৰশ্নৰ সন্মুখীন হৈছিল।
“চৰকাৰে নবীনৰ নশ্বৰ দেহ ঘূৰাই অনাৰ প্ৰয়াস কৰি আছে। ইউক্ৰেইন এখন যুদ্ধ ক্ষেত্ৰ আৰু সকলোৱে এই বিষয়ে অৱগত। যদি সম্ভৱ হয়, মৃতদেহটো ঘূৰাই অনা হ’ব।” বেলাদে কয়।
“জীয়াই থকা সকলক ঘূৰাই অনাটোৱেই অতি প্ৰত্যাহ্বানজনক, মৃতকক ঘূৰাই অনাটো আৰু অধিক কঠিন হৈ পৰিছে। এটা মৃতদেহে বিমানখনত অধিক স্থান ব্যৱহাৰ কৰিব। ইয়াৰ পৰিৱৰ্তে, মৃতদেহৰ ঠাইত ৮ ৰ পৰা ১০ জন লোকক স্থান দিব পাৰি।” বিজেপি নেতাজনে কয়।
তেওঁ লগতে কয় যে প্ৰধানমন্ত্ৰী নৰেন্দ্ৰ মোদীয়ে নবীনৰ মৃতদেহ ঘূৰাই আনিবলৈ সকলো প্ৰচেষ্টা চলাই আছে।
মৃত নবীনৰ পিতৃ শেখৰাপ্পা জ্ঞানগৌড়াই বুধবাৰে সংবাদ মাধ্যমৰ আগত উল্লেখ কৰা মতে তেওঁক চৰকাৰে নবীনৰ মৃতদেহ দুদিনৰ ভিতৰত ঘৰলৈ অনা হ’ব বুলি আশ্বাস দিছিল। তেওঁ প্ৰধানমন্ত্ৰী মোডী আৰু কৰ্ণাটকৰ মুখ্যমন্ত্ৰী বাসবৰাজ বোম্মাই, দুয়োকে তেওঁৰ পুত্ৰৰ মৃতদেহ ঘৰলৈ অনাত সহায় কৰিবলৈ অনুৰোধ কৰিছিল।
উল্লেখ্য যে খাৰকিভ নেচনেল মেডিকেল ইউনিভাৰ্চিটিত ঔষধ অধ্যয়ন কৰি থকা ২১ বছৰীয়া নবীনৰ যোৱা মঙ্গলবাৰে ৰাছিয়ান সেনাৰ গুলীবৰ্ষণত নিহত হৈছিল।
