চিদানন্দ শইকীয়াৰ আদৰ্শ মাৰ্ক্সবাদ-গান্ধীবাদৰ এক সুন্দৰ সমাহাৰ : সাহিত্যিক ডাঃ অজিত বৰুৱা
বােকাখাত পুৱতি সাহিত্য সভাৰ উদ্যোগত আজি সাহিত্য সভা ভৱনত বােকাখাতj সাংবাদিকতাৰ বাটকটীয়া, ছােভিয়েট নেহৰু বঁটা প্ৰাপক, অসম ছাত্র ফেডাৰেছনৰ একালৰ সাধাৰণ সম্পাদক, কৃৰ্তি শিক্ষক , জনসুহৃদ চিদানন্দ শইকীয়াৰ ৯৮ সংখ্যক জন্ম জয়ন্তী দিনজোৰা কাৰ্য্যসূচীৰে উদযাপনৰ আয়োজন কৰা হয় ।
এই উপলক্ষে আয়োজিত অনুষ্ঠানৰ পুৱা পতাকা উত্তোলন কৰে পুৱতি সাহিত্য সভাৰ সভাপতি অপূর্ব বৰদলৈয়ে। জনসুহৃদ চিদানন্দ শইকীয়া দেৱৰ প্রতিচ্ছবিত মাল্য অর্পণ কৰে গােলাঘাট জিলা সাহিত্য সভাৰ প্ৰাক্তন সভাপতি তথা চিদানন্দ শইকীয়াৰ পত্নী অন্নদা শইকীয়াই।
বন্তি প্ৰজ্বলন কৰে পুৱতি সাহিত্য সভাৰ প্ৰাক্তন সভাপতি যোগেন্দ্ৰ নাথ শৰ্মাই। স্মৃতি তৰ্পণ কৰে ক্ৰমে বোকাখাত পুৱতি সাহিত্য সভাৰ প্ৰাক্তন সভাপতি ভৱেশ শইকীয়া, সন্ধানী লেখিকা সমাৰোহ সমিতি বোকাখাতৰ সভাপতি পুতলী খাউণ্ড , বোকাখাত চাহ জনগোষ্ঠীয় সাহিত্য সভাৰ সভাপতি কুলামন কর্মকাৰ, আৰু নেপালী সাহিত্য সভাৰ বোকাখাত শাখাৰ সভাপতি মােহন ছেত্ৰীয়ে।
জন্মজয়ন্তীৰ লগত সংগতি ৰাখি আয়োজিত চিদানন্দ শইকীয়া স্মৃতি চাৰণ সভাৰ আৰম্ভণিতে অসম শংকৰদেৱ সংঘৰ বোকাখাত সদৰ আঞ্চলিক শাখাৰ যুৱ শিশু আৰু আই মাতৃ কল্যাণ সমিতিৰ সদস্য সকলে ৰিজু হাজৰিকাৰ পৰিচালনাত দিহানামৰ এক সুন্দৰ অনুষ্ঠান প্ৰদৰ্শন কৰে।
আনহাতে অপূর্ব বৰদলৈৰ পৌৰোহিত্যত অনুষ্ঠিত স্মৃতিচাৰণ সভাত আদৰণি ভাষণ আগবঢ়ায় চিদানন্দ শইকীয়াৰ জ্যেষ্ঠা বোৱাৰী তথা প্ৰবক্তা ৰীণা শইকীয়াই ।
“চিদানন্দ শইকীয়াৰ কৃৰ্তিকর্মত মার্ক্সবাদৰ প্ৰতিফলন” শীৰ্ষক বক্তৃতানুষ্ঠানত নির্দিষ্ট বক্তা হিচাপে উপস্থিত থাকি বিশিষ্ট সাহিত্যিক ডাঃ অজিত বৰুৱাই গোলাঘাটৰ সাম্যবাদী আন্দোলনৰ ইতিহাস লিখিলে চিদানন্দ শইকীয়াক বাদ দিব পৰা নাযায় বুলি মন্তব্য কৰে। লগতে চিদানন্দ শইকীয়াৰ আদৰ্শ মাৰ্ক্সবাদ আৰু গান্ধীবাদৰ এক সুন্দৰ সমাহাৰ বুলিও উল্লেখ কৰে।
সভাত আৰু বহু বিশিষ্ট ব্যক্তি তথা গণ্যমান্য ব্যক্তি উপস্থিত থাকে। আৰু এই সভাতে চিদানন্দ শইকীয়াৰ উপন্যাস ‘সত্যাগ্ৰহী’ৰ ইংৰাজী সংস্কৰণখনি বোকাখাতৰ জে ডি এছ ডি মহাবিদ্যালয়ৰ প্ৰাক্তন অধ্যক্ষ ডাঃ বাবুলাল মোৰে উন্মোচন কৰে।
অনুষ্ঠানটোৰ আঁত ধৰে পুৱতি সাহিত্য সম্পাদক গীতাঞ্জলি কলিতাই ৷ আৰু লগতে বিয়লি চিদানন্দ শইকীয়া স্মৃতি উদ্যানত বন্তি প্ৰজ্বলনো কৰা হয়।