এটা ভাইৰেল হৈ পৰা ভিডিঅ’য়ে এতিয়া বলিউডৰ মোহময়ী অভিনেত্ৰী ঐশ্বৰ্য্য ৰায়ৰ অনুৰাগীসকলৰ মাজত তোলপাৰ লগাইছে। ২০১৮ চনৰ উক্ত ভিডিঅ’টোৰ মতে অভিনেত্ৰী গৰাকীৰ আছে এজন ৩২বছৰীয়া পুত্ৰ!
২০১৮ চনত এটা জনপ্ৰিয় টি ভি চেনেলৰ সাক্ষাৎকাৰত সংগীত কুমাৰ নামৰ মাংগালোৰৰ এজন যুৱকে নিজকে ঐশ্বৰ্য্য ৰায়ৰ প্ৰথম সন্তান বুলি দাবী কৰিছিল। সংগীতৰ মতে ১৯৮৮ চনত অভিনেত্ৰী গৰাকীয়ে লণ্ডনত তেওঁক IVF পদ্ধতিৰে জন্ম দিছিল।
যুৱকজনে এইবুলিও দাবী কৰে যে দুবছৰৰ লৈকে তেওঁক ঐশ্বৰ্য্য ৰায়ৰ মাক-দেউতাক বৃন্দা ৰায় আৰু প্ৰয়াত কৃষ্ণৰাজ ৰায়ে প্ৰতিপালন কৰিছিল আৰু ইয়াৰ পিছত পিতৃ ভেডিভেলু ৰেড্ডিয়ে তেওঁক তাৰ পৰা বিশাখাপটনমলৈ লৈ আনে।
অৱশ্যে নিজকে ঐশ্বৰ্য্য ৰায়ৰ পুত্ৰ বুলি প্ৰমাণ কৰিব পৰাকৈ সংগীতৰ লগত একো চৰকাৰী নথিপত্ৰ নাই। আত্মীয় লোকে নথিপত্ৰসমূহ নষ্ট কৰি পেলোৱা বুলি তেওঁ কয়।
৩২ বছৰীয়া যুৱক সংগীত কুমাৰে এতিয়া ‘তেওঁৰ মাতৃ’ ঐশ্বৰ্য্য ৰায়ৰ সৈতে থাকিব খোজে।
মন কৰিবলগীয়া যে ঐশ্বৰ্য্য ৰায়ৰ জন্ম হৈছিল ১৯৭৩ চনৰ ১ নৱেম্বৰত। যদিহে সংগীত কুমাৰৰ দাবী সঁচা হয় তেন্তে অভিনেত্ৰী গৰাকীয়ে মাত্ৰ ১৪ বছৰ বয়সতে তেওঁক জন্ম দিছিল।
এতিয়ালৈকে জনপ্ৰিয় অভিনেত্ৰী গৰাকীয়ে যুৱকজনে জনোৱা দাবীৰ প্ৰতি কোনো প্ৰতিক্ৰিয়া প্ৰকাশ কৰা নাই।
ঐশ্বৰ্য্য ৰায়ে ২০০৭ চনৰ ২০ এপ্ৰিলত হিন্দু পৰম্পৰাৰে অভিনেতা অভিষেক বচ্চনৰ সৈতে বিবাহপাশত আৱদ্ধ হৈছিল। ২০১১ চনৰ ১৬ নৱেম্বৰত তেওঁলোকৰ এটি কন্যা সন্তান জন্ম হয়।
সমগ্ৰ বিশ্বই জনাত যোৱা নৱেম্বৰত ৯ বছৰত ভৰি দিয়া আৰাধ্যা বচ্চনেই অভিনেত্ৰী ঐশ্বৰ্য্য ৰায়ৰ একমাত্ৰ সন্তান।
