অসমলৈ নিৰ্বাচনী প্ৰচাৰৰ বাবে আহিব বলীউডৰ অভিনেত্ৰী নাগমা মোৰাৰজীয়ে। মঙলবাৰে নাগমাই কলিয়াবৰ লোকসভা সমষ্টিৰ কংগ্ৰেছ প্ৰাৰ্থী গৌৰৱ গগৈৰ হৈ প্ৰচাৰ কৰিব।
সূত্ৰৰ পৰা লাভ কৰা খবৰ অনুসৰি সদৌ ভাৰত মহিলা কংগ্ৰেছ কমিতিৰ সাধাৰণ সম্পাদক নাগমাই মঙলবাৰে বোকাখাতত পদযাত্ৰা কাৰ্য্যসূচীত কংগ্ৰেছ সমৰ্থকসকলক লগত লৈ অংশ গ্ৰহণ কৰিব।
প্ৰতিষ্ঠিত বলীউড ছবি জগতৰ অভিনেত্ৰী নাগমাই বলীউডৰ উপৰিও তেলেগু আৰু তামিল ছবি উদ্যোগতো কাম কৰিছে। বাঘী, পুলিচ ঔৰ মুজৰিম, য়ালগাৰ আদি নাগমাৰ জনপ্ৰিয় বলীউডৰ ছবি। ২০০৪ চনত অভিনেত্ৰীগৰাকীয়ে কংগ্ৰেছ দলত যোগদান কৰে।
অসমত তিনিটা পৰ্য্যায়ত অনুষ্ঠিত হ’বলগীয়া লোকসভা নিৰ্বাচনৰ কলিয়াবৰ সমষ্টিত ১১ এপ্ৰিলত অৰ্থাৎ প্ৰথম পৰ্য্যায়ত নিৰ্বাচন অনুষ্ঠিত হ’ব। সমষ্টিটোত মূল প্ৰতিদ্বন্দ্বিতা হ’ব কংগ্ৰেছৰ গৌৰৱ গগৈ আৰু অগপ আৰু মিত্ৰজোঁটৰ প্ৰাৰ্থী মনিমাধৱ মহন্তৰ মাজত।
গৌৰৱ গগৈ সমষ্টিটোৰ বৰ্তমানৰ সাংসদ তথা অসমৰ প্ৰাক্তন মুখ্য মন্ত্ৰী তৰুণ গগৈৰ পুত্ৰ।