উদ্ধাৰৰ সুদীৰ্ঘ ২০ ঘন্টাৰ অন্তত নিষ্ক্ৰিয় কৰা হৈছে বিশ্বনাথ-শোণিতপুৰ সীমান্তবৰ্তী বালিজুৰিত উদ্ধাৰ হোৱা বোমাটো ।
তেজপুৰস্থিত সেনাবাহিনীৰ ফ’ৰ কৰৰ বোমা বিশেষজ্ঞৰ দলে আজি দিনৰ ৩ বজাত নিষ্ক্ৰিয় কৰে বোমাটো ।বালিজুৰিৰ ধুবিখোলাৰ পথাৰত নিষ্ক্ৰিয় কৰা হয় দহ কেজি ওজনৰ বোমাটো ।
বোমাটো নিষ্ক্ৰিয় কৰাৰ লগে লগে এতিয়া স্বস্তিৰ নিশ্বাস এৰিছে জামুগুৰিহাটৰ উত্তৰাঞ্চলৰ ৰাইজে ।
মংগলবাৰে সন্ধ্যা বালিজুৰিৰ ধুবিখোলাৰ দিকৰাই নদীৰ দলঙৰ তলত দুজন স্থানীয় বনুৱাই বোমাটো প্ৰত্যক্ষ কৰি জামুগুৰি আৰক্ষীক অৱগত কৰাৰ পাছত ২০ ঘন্টা ধৰি আৰক্ষীয়ে পহৰা দি আছিল বোমা উদ্ধাৰ হোৱা স্থানত ।
উক্ত বোমাটো ৩ বজাত পথাৰৰ মুকলি স্থানত নিষ্ক্ৰিয় কৰিবলৈ সক্ষম হয় সেনাৰ বিশেষজ্ঞৰ দলে।