এইবাৰ বোমা বিস্ফোৰণেৰে কঁপাই তোলাৰ ভাবুকি লাভ কৰিছে বম্বে উচ্চ ন্যায়ালয়ে। ফোন যোগে এক অচিনাক্ত ব্যক্তিয়ে দিছে বম্বে উচ্চ ন্যায়ালয়ৰ ঔৰংগাবাদ বিচাৰপীঠৰ অট্টালিকাত বোমা বিস্ফোৰণৰ ভাবুকি। এই ভাবুকিয়ে মুহূৰ্তৰ ভিতৰতে চাঞ্চল্যৰ সৃষ্টি কৰে উচ্চ ন্যায়ালয়ৰ চৌহদত।
প্ৰকাশিত খবৰ অনুসৰি, মঙলবাৰে সন্ধিয়া প্ৰায় ৫.৪৫ বজাত ঔৰংগাবাদৰ আৰক্ষী কণ্ট্ৰল ৰুমলৈ ফোন কৰি এগৰাকী ব্যক্তিয়ে উচ্চ ন্যায়ালয়ৰ চৌহদত বোমা বিস্ফোৰণ কৰা হ’ব বুলি ভাবুকি প্ৰদান কৰে।
ফোন যোগে ব্যক্তিগৰাকীয়ে টকা দিয়াৰ বিনিময়তো কাম নোহোৱাৰ বাবেই বোমা বিস্ফোৰণ ঘটোৱা হ’ব বুলি ভাবুকি দিয়ে। কণ্ট্ৰল ৰুমলৈ ফোন কৰি তেওঁ কয়, “মই ইতিমধ্যে টকা পৰিশোধ কৰিছো। কিন্তু মোৰ কাম সম্পূর্ণ হোৱা নাই। গতিকে মই হাইকোৰ্টত এটা বোমা ৰাখিছো।”
অৱশ্যে ব্যক্তিগৰাকীয়ে কি কাৰণত আৰু ক’ত এই টকা পৰিশোধ কৰে, সেয়া স্পষ্টকৈ জানিব পৰা হোৱা নাই। আৰক্ষীয়ে এই ভাবুকিভৰা ফোনকলটো বিহাৰৰ পৰা অহা বুলি নিশ্চিত কৰিছে।
এই ফোনকল লাভ কৰাৰ পাছতেই আৰক্ষীয়ে তাৎক্ষণিকভাৱে উচ্চ ন্যায়ালয়ৰ চৌহদত তালাচী আৰম্ভ কৰে। কিন্তু তালাচীৰ সময়ত আৰক্ষীয়ে ন্যায়ালয়ৰ চৌহদত কোনো বিস্ফোৰক সামগ্ৰী দেখা নাপায়।
এই সন্দৰ্ভত স্থানীয় এগৰাকী আৰক্ষী বিষয়াই কয়, “ফোনকলৰ পাছতে পুণ্ডলিক নগৰ আৰক্ষী থানা আৰু বোমা ডিটেকচন এণ্ড ডিচপ’জেল স্কোৱাডৰ দলে উচ্চ ন্যায়ালয়ৰ ভৱনত উপস্থিত হৈ ব্যাপক তালাচী চলায়। কিন্তু তালাচীত সন্দেহজনক একো সামগ্ৰী পোৱা নগ’ল।”
এনে পৰিস্থিতিত আৰক্ষীয়ে ফোনকল যোগে দিয়া ভাবুকি সম্পূৰ্ণ ভুৱা বুলি দাবী কৰিছে। এই সন্দৰ্ভত এতিয়ালৈকে কোনো গোচৰ পঞ্জীয়ন হোৱা নাই বুলি পুণ্ডলিক নগৰ আৰক্ষী থানাৰ এগৰাকী বিষয়াই জানিবলৈ দিয়ে।
