Bombay HC fines advocate বোম্বাই উচ্চ ন্যায়ালয়ে এজন অধিবক্তাক ধৰ্ষণৰ গোচৰ বাতিল কৰাৰ বাবে কৰা আবেদনৰ লগত “অতি আপত্তিজনক” ফটোআলোকচিত্ৰ দাখিল কৰাৰ বাবে জৰিমনা পৰিশোধ কৰিবলৈ নিৰ্দেশ দিছে। ন্যায়াধীশ ৰেৱতী মোহিত ডেৰে আৰু এছ এম মোদকৰ এখন খণ্ড বিচাৰপীঠে মন্তব্য কৰে যে আবেদনকাৰীৰ অধিবক্তাই আবেদনৰ সৈতে “অত্যন্ত আপত্তিজনক” আলোকচিত্ৰ দাখিল কৰাৰ সময়ত “বিচক্ষণতা প্ৰদৰ্শন কৰা নাই”।
ইয়াৰ বাবে উচ্চ ন্যায়ালয়ে তেওঁক দুসপ্তাহৰ ভিতৰত ২৫,০০০ টকাৰ জৰিমনা পৰিশোধ কৰিবলৈ নিৰ্দেশ দিয়ে। আদালতে ৭ অক্টোবৰত গোচৰটোৰ ৰায় প্ৰদান কৰিছিল। অৱশ্যে গোচৰটোৰ ৰায় সোমবাৰে ৱেবছাইটত প্ৰকাশ কৰা হয়।
লগতে পঢ়ক: বিজেপি নেতাৰ কুকীৰ্তি! ১৬ জন দলিত শ্ৰমিকক বন্দী কৰি নিৰ্যাতন; প্ৰহাৰৰ ফলত গৰ্ভপাত মহিলাৰ
জানিব পৰা মতে, এজন ব্যক্তিৰ বিৰুদ্ধে ধৰ্ষণৰ এটা গোচৰ ৰুজু কৰা হৈছিল। অভিযুক্তৰ পত্নীয়ে গোচৰটো বাতিল কৰিবলৈ এখন আবেদন দাখিল কৰিছিল। সেই আৱেদনখনৰ লগত এখন ‘আপত্তিজনক’ ছবি আছিল।
এই সন্দৰ্ভত আদালতৰ খণ্ড বিচাৰপীঠখনে কয়, “অধিবক্তাসকলে বুজি পোৱাত ব্যৰ্থ হৈছে যে এই আৱেদনসমূহ ৰেজিষ্ট্ৰীৰ আগত দাখিল কৰা হয়। সেইবোৰ বিভিন্ন বিভাগত হাত সলনি হৈ আহি আমাৰ হাতত পৰে। এই ছবিখনৰ সৈতে জড়িত লোকসকলৰ গোপনীয়তা হ্ৰাস কৰা হৈছে কিয়নো সকলোবোৰ সকলোৰে আগত প্ৰকাশ হৈ গৈছে।‘’
বিচাৰপীঠখনে লগতে এইটোও উল্লেখ কৰে যে এনে আলোকচিত্ৰসমূহক আৱেদনৰ সৈতে সংযুক্ত কৰিলে সংশ্লিষ্ট ব্যক্তিজনৰ গোপনীয়তাৰ অধিকাৰ হ্ৰাস হয়। ন্যায়াধীশে ছবিখন তৎক্ষণাৎ আৱেদনৰ পৰা আঁতৰাবলৈ নিৰ্দেশ দিয়ে।
লগতে পঢ়ক: এইবাৰ কি হ’ব! ৰাছিয়াৰ মিছাইল আক্ৰমণকলৈ উত্তেজনাৰ মাজতে পাৰমাণৱিক অস্ত্ৰ অনুশীলনৰ ঘোষণা নাটোৰ
আদালতে কয়, “আমি আশা কৰোঁ যে আৱেদনৰ সৈতে অত্যন্ত আপত্তিজনক আলোকচিত্ৰ দাখিল কৰাৰ সময়ত সকলো অধিবক্তাই কিছু বিচক্ষণতা প্ৰদৰ্শন কৰিব। অধিবক্তাৰ উক্ত আচৰণৰ বাবে কিৰিটিকাৰ আইন পুথিভঁৰালত দুসপ্তাহৰ ভিতৰত ২৫,০০০ টকাৰ জৰিমনা জমা দিবলৈ নিৰ্দেশ দিছো।”
