মুম্বাইত সংঘটিত হোৱা ৭/১১ আক্ৰমণৰ সৈতে জড়িত এজন আজীৱন কাৰাদণ্ডৰ বন্দীয়ে পৰীক্ষাত অৱতীৰ্ণ হ’বলৈ আদালতত আবেদন জনাইছে।
২০০৬ চনৰ ১১ জুলাইত মুম্বাইৰ একাংশ স্থানীয় ৰেলৰ ডবাত একেৰাহে সাতটাকৈ বোমা বিস্ফোৰণ সংঘটিত হয়। সেই ঘটনাত ১৮৬ জন লোকে প্ৰাণ হেৰুৱাইছিল। এই বিস্ফোৰণত প্ৰায় এক হাজাৰ লোক আহত হয়। বিস্ফোৰণৰ সৈতে জড়িত কেইবাজনো লোকক তদন্তকাৰী বিষয়াই গ্ৰেপ্তাৰ কৰে। তাৰ ভিতৰত মহম্মদ ছাজিদ আনছাৰীও আছিল। ২০১৫ চনৰ ছেপ্টেম্বৰ মাহত আদালতে আনছাৰী আৰু অন্যান্য অপৰাধীক দোষী সাব্যস্ত কৰিছিল। তেতিয়াৰ পৰাই জেলত আছে আনছাৰী।
কাৰাগাৰত থকা আনছাৰীয়ে মুম্বাইৰ সিদ্ধাৰ্থ আইন মহাবিদ্যালয়ত পৰীক্ষাত হাজিৰ হ’বলৈ আদালতত আবেদন জনায়। ৩ মে’ৰ পৰা ১৫ মে’লৈ অনুষ্ঠিত হ’ব এই পৰীক্ষা। সেই গোচৰৰ শুনানিৰ সময়ত আদালতে আনছাৰীক পৰীক্ষা কেন্দ্ৰত ব্যক্তিগতভাৱে হাজিৰ হৈ পৰীক্ষা দিবলৈ অনুমতি দিছিল। ন্যায়াধীশগৰাকীয়ে জেল কৰ্তৃপক্ষক প্ৰয়োজনীয় নিৰাপত্তাৰ ব্যৱস্থা কৰিবলৈ নিৰ্দেশ দিয়ে।
কিন্তু আনছাৰীয়ে ৩ মে’ আৰু ৯ মে’ত পৰীক্ষাত হাজিৰ হ’ব নোৱাৰিব বুলি উল্লেখ কৰি ১০ মে’ত পুনৰ আদালতত আবেদন জনায়। অভিযোগ অনুসৰি কাগজ-পত্ৰ প্ৰস্তুত কৰাত পলম হোৱাৰ বাবে আনছাৰীক পৰীক্ষা কেন্দ্ৰলৈ নিব পৰা নাছিল। সেই গোচৰৰ শুনানি গ্ৰহণ কৰি বম্বে উচ্চ ন্যায়ালয়ৰ ন্যায়াধীশ মাক্ৰান্দ কৰ্ণিক আৰু কমল খাটাৰ খণ্ড বিচাৰপীঠে, মুম্বাই বিশ্ববিদ্যালয়ক প্ৰশ্ন কৰে যে আবেদনকাৰীক অনলাইন পৰীক্ষা দিব পাৰি নেকি? বিশ্ববিদ্যালয়খনৰ মতে তেওঁলোকৰ কোনো আপত্তি নাই। ইয়াৰ পাছতে বম্বে উচ্চ ন্যায়ালয়ে পৰীক্ষা অনুষ্ঠিত কৰাৰ বাবে কি পদক্ষেপ গ্ৰহণ কৰা হৈছে তাক চাবলৈ নিৰ্দেশ দিয়ে।
