বঙাইগাঁৱত সংঘটিত হৈছে এক শোকাৱহ দুৰ্ঘটনা। কলকাতাৰ পৰা এগৰাকী মহিলাৰ মৃতদেহ লৈ বৰপেটা অভিমুখে আহি থকা এখন এম্বুলেন্স বৃহস্পতিবাৰে বঙাইগাঁও জিলাৰ ৩১ নং ৰাষ্ট্ৰীয় ঘাইপথত এক ভয়ংকৰ দুৰ্ঘটনাত পতিত হয়। জিলাখনৰ চাপৰাকাটাত সংঘটিত এই শোকাৱহ ঘটনাত বাহনখনত থকা তিনিগৰাকী ব্যক্তি গুৰুতৰভাৱে আহত হয় এই মৰ্মান্তিক ঘটনাই সমগ্ৰ অঞ্চলটোতে শোকৰ ছাঁ পেলাইছে।
জিলাখনৰ চাপৰাকাটাত এই দুৰ্ঘটনাটো সংঘটিত হয়। প্ৰত্যক্ষদৰ্শীৰ মতে, তীব্ৰ বেগী এম্বুলেন্সখনে হঠাত নিয়ন্ত্রণ হেৰুৱাই পথৰ দাঁতিৰ আন্তঃগাঁথনিত প্ৰচণ্ড জোৰে খুন্দা মাৰে। মৃত মহিলাগৰাকীক বৰপেটা চহৰৰ বাসিন্দা জেলেকা বেগম বুলি চিনাক্ত কৰা হৈছে। কলকাতাত তেওঁৰ মৃত্যু হোৱাৰ পাছত শেষ কৃত্যৰ বাবে মৃতদেহটো নিজ গৃহলৈ আনি থকা হৈছিল।
আৰক্ষীৰ সূত্ৰ অনুসৰি, দুৰ্ঘটনাটো ইমানেই ভয়াবহ আছিল যে দুৰ্ঘটনাগ্ৰস্ত এম্বুলেন্সখনৰ মাজত মৃতদেহটো বহু সময় ধৰি আৱদ্ধ হৈ থাকে, যাৰ ফলত উদ্ধাৰ অভিযানত যথেষ্ট অসুবিধাৰ সৃষ্টি হয়। বাহনখনত থকা আন তিনিজন যাত্ৰীও দুৰ্ঘটনাটোত গুৰুতৰভাৱে আঘাতপ্ৰাপ্ত হয়।
দুৰ্ঘটনাৰ বিকট শব্দ শুনি স্থানীয় ৰাইজ ঘটনাস্থলীলৈ ঢাপি আহে আৰু আৰক্ষীক খবৰ দিয়ে। স্থানীয় লোক আৰু আৰক্ষীৰ যুটীয়া প্ৰচেষ্টাত উদ্ধাৰ অভিযান চলাই আহতসকলক বঙাইগাঁও অসামৰিক চিকিৎসালয়লৈ প্ৰেৰণ কৰা হয়। বৰ্তমান চিকিৎসালয়ত তেওঁলোকৰ অৱস্থা সংকটজনক বুলি জানিব পৰা গৈছে।
এই মৰ্মান্তিক ঘটনাই বৰপেটাৰ শোকসন্তপ্ত পৰিয়ালটোক অধিক ম্ৰিয়মাণ কৰি তুলিছে। আৰক্ষীয়ে দুৰ্ঘটনাগ্ৰস্ত এম্বুলেন্সখন জব্দ কৰিছে আৰু ঘটনাৰ সন্দৰ্ভত এক আনুষ্ঠানিক তদন্ত আৰম্ভ কৰিছে। প্ৰয়োজনীয় আইনী প্ৰক্ৰিয়া সম্পূৰ্ণ কৰাৰ পাছত মৃতদেহটো পৰিয়ালৰ হাতত অৰ্পণ কৰাৰ ব্যৱস্থা কৰা হৈছে।
