বঙাইগাঁও চহৰত সন্ত্ৰাস চলাই অহা চিলনী চোৰ চক্ৰৰ অন্যতম এজনক নিউ বঙাইগাঁও আৰক্ষীয়ে আটক কৰে ৷
নিউ বঙাইগাঁও আৰক্ষী পহৰা চকীৰ ভাৰপ্ৰাপ্ত আৰক্ষী বিষয়া শিৱপ্ৰসাদ কলিতাৰ নেতৃত্বত আৰক্ষীৰ দলে বঙাইগাঁও চহৰৰ মহাবীৰস্থানৰ ৰে’লৱে আবাসিক এলেকাত অভিযান চলাই মনোজিৎ বৰ্মন নামৰ চিলনী চোৰজনক আটক কৰে ৷
ধৃত মনোজিৎ বৰ্মনৰ ঘৰ ঢালিগাঁৱত যদিও মহাবীৰস্থানত আত্মগোপন কৰি আছিল ৷ উল্লেখ্য যে যোৱা চাৰি জুনত নিউ বঙাইগাঁও ডাংতল পথত দিনৰ ভাগত স্কুটাৰেৰে গৈ থকা এহাল দম্পতীৰ পৰা সোণৰ অলংকাৰ কাঢ়ি নিয়া ঘটনাৰ সৈতে জড়িত থকাৰ অভিযোগত নিউ বঙাইগাঁও আৰক্ষীয়ে তদন্ত কৰি দহ জুনত ইজাহাৰ খান নামৰ চিলনী চোৰ এজনক আটক কৰাৰ লগতে চুৰি কাৰ্যত ব্যৱহাৰ কৰা এখন নম্বৰ প্লেট বিহীন মটৰচাইকেল জব্দ কৰিছিল ৷
এই মটৰ চাইকেলখনৰ গৰাকী আছিল মনোজিৎ বৰ্মন ৷ আৰক্ষীয়ে ইজাহাৰ খানক আটক কৰি জেৰা কৰাত ঘটনাৰ সৈতে মনোজিৎ বৰ্মন জড়িত থকা বুলি ইজাহাৰ খানে আৰক্ষীৰ আগত প্ৰকাশ কৰিছিল ৷
লগতে কাঢ়ি নিয়া সোণৰ অলংকাৰ নতুন পাৰাৰ ওম জুৱেলাৰ্ছ নামৰ প্ৰতিষ্ঠানখনৰ গৰাকীয়ে ক্ৰয় কৰা বুলি স্বীকাৰোক্তি দিছিল ৷ পিছত আৰক্ষীয়ে চুৰি কৰা সোণৰ অলংকাৰ ক্ৰয় কৰা প্ৰতিষ্ঠানখনৰ গৰাকী পংকজ শ্বাহক আটক কৰাৰ লগতে গলোৱা অৱস্থাত সোণখিনি উদ্ধাৰ কৰিছিল ৷
আৰক্ষীয়ে পিছত ইজাহাৰ খান আৰু পংকজ শ্বাহক গ্ৰেপ্তাৰ কৰি এঘাৰ জুনত আদালতত হাজিৰ কৰাই অধিক সোধ- পোছৰ বাবে দুদিনৰ কাৰণে নিজৰ জিম্মালৈ নিছিল ৷
আনহাতে আৰক্ষীয়ে মনোজিৎ বৰ্মনক আটক কৰাৰ বাবে অভিযান অব্যাহত ৰাখিছিল আৰু শনিবাৰে বিয়লিৰ ভাগত আটক কৰিবলৈ সক্ষম হয় ৷ আৰক্ষীয়ে গ্ৰেপ্তাৰ কৰা দুই চিলনী চোৰৰ লগতে সোণৰ অলংকাৰ ক্ৰয় কৰা ওম জুয়েলাৰ্ছৰ গৰাকীজনক দেওবাৰে আদালতত হাজিৰ কৰোৱাত আদালতে তিনিওকে জেললৈ প্ৰেৰণ কৰে ৷
ইপিনে জিলাৰ উপ আৰক্ষী অধীক্ষক লুণা সোণোৱালে সংবাদ মাধ্যমৰ আগত কেৱল এনে দুস্কাৰ্যৰ লগতে নহয় যিকোনো অপৰাধজনিত ঘটনাৰ লগত জড়িত থকাসকলৰ বিৰুদ্ধে বঙাইগাঁও আৰক্ষী কঠোৰ হ’ব বুলি কৈ তেনে কিবা অভিযোগ থাকিলে ৰাইজক আৰক্ষীক অৱগত কৰিবলৈকো আহ্বান জনায় ৷
