জীৱনত সফলতা লাভ কৰিবলৈ লাগে পৰিশ্ৰম শক্তি আৰু প্ৰতিভা : হোমেন বৰগোহাঞি
কঠোৰ পৰিশ্ৰম, সাহস আৰু প্ৰতিভাৰে জীৱনৰ বাটত উজলি উঠা সাংবাদিক ড০ গীতালি শইকীয়াৰ ‘সাধাৰণ মানুহৰ অসাধাৰণ বীৰত্ব’ শীৰ্ষক গ্ৰন্থখন নৱবৰ্ষৰ প্ৰথম দিনটোতে গুৱাহাটী গ্ৰন্থমেলাৰ বাকৰিত উন্মোচন কৰা হয়।
এই উপলক্ষে আয়োজিত অনুষ্ঠানত প্ৰকাশন গোষ্ঠী ষ্টুডেণ্টছ ষ্ট’ৰ্ছে প্ৰকাশ কৰা এই গ্ৰন্থখন প্ৰসিদ্ধ সাহিত্যিক, কথাশিল্পী তথা ‘নিয়মীয়া বাৰ্তা’ৰ মুখ্য সম্পাদক হোমেন বৰগোহাঞিয়ে আনুষ্ঠানিকভাৱে উন্মোচন কৰে।
গ্ৰন্থখন উন্মোচন কৰি ভাষণ প্ৰসংগত বৰগোহাঞিয়ে ড০ গীতালি শইকীয়া এগৰাকী পৰিশ্ৰমী সাংবাদিক বুলি উল্লেখ কৰি কয় যে মানুহক জীৱনত সফলতা লাভ কৰিবলৈ বহু বস্ত লাগে যদিও প্ৰধানকৈ দুটা বস্তৰ প্ৰয়োজন। ইয়াৰে এটা হ’ল পৰিশ্ৰম শক্তি আৰু আনটো হ’ল প্ৰতিভা।
আনহাতে গ্ৰন্থ উন্মোচনী অনুষ্ঠানত উপস্থিত থকা ‘নলবাৰী ৰত্ন’ সন্মানেৰে বিভূষিত শিক্ষাবিদ ড০ বসন্ত কুমাৰ ভট্টাচাৰ্যই কয় যে গ্ৰন্থখনত গীতালিৰ চিন্তাৰ বিস্তৃতি আৰু প্ৰতিভাৰ প্ৰতিফলন ঘটিছে। তেওঁ আনে কটা বাটেৰে নহয়, নিজে কটা বাটেৰে আগবাঢ়িছে।
লগতে গীতালিয়ে অতি পৰিশ্ৰম কৰি পুতলা নাচৰ ওপৰত গৱেষণা কৰা তথা ইংৰাজী ভাষাত লিখা গৱেষণা পত্ৰখন গ্ৰন্থাকাৰে প্ৰকাশ কৰিলে সৰ্বভাৰতী খ্যাতি লাভ কৰিবলৈও সক্ষম হ’ব বুলি ভট্টাচাৰ্যই তেওঁৰ ভাষণত উল্লেখ কৰে।
অনুষ্ঠানত উপস্থিত থকা সুলেখিকা হৰপ্ৰিয়া বাৰুকিয়াল বৰগোহাঞি, লেখক-বুদ্ধিজীৱী ময়ূৰ বৰা, জ্যেষ্ঠ সাংবাদিক অচ্যুৎ কুমাৰ পাটোৱাৰী, সমাজকৰ্মী অৰুণ তালুকদাৰ আদিয়েও শুভেচ্ছামূলক ভাষণ দি গীতালিৰ কিতাপখনে সাধাৰণ মানুহক অসাধাৰণ কাম কৰিবলৈ অনুপ্ৰেৰণা দিব আৰু গ্ৰন্থখন পাঠক সমাজে আঁকোৱালি ল’ব বুলি মন্তব্য কৰে।
গ্ৰন্থ উন্মোচনী অনুষ্ঠানত ড০ গীতালি শইকীয়াই নিজৰ অনুভৱ ব্যক্ত কৰি কয় যে, ‘‘সাধাৰণ মানুহৰ অসাধাৰণ বীৰত্ব’ গ্ৰন্থখনে সাধাৰণ মানুহক অসাধাৰণ কাম কৰিবলৈ প্ৰেৰণা দিব বুলি আশা কৰিছোঁ।’ অনুষ্ঠানত ড০ গীতালি শইকীয়াৰ মাতৃ নীৰদা বেজ শইকীয়াই গ্ৰন্থ উন্মোচক হোমেন বৰগোহাঞিক এখন ফুলাম গামোচাৰে সম্বৰ্ধনা জনায়।