পঞ্জাৱৰ পাকিস্তান সীমান্তত আজি এক পাকিস্তানী ড্ৰ’নৰ পৰা সীমান্ত সুৰক্ষা বাহিনী পঞ্জাব ফ্ৰন্টিয়াৰে উদ্ধাৰ কৰিছে ৫ কিলোগ্ৰামতকৈও অধিক হেৰ’ইনৰ লগতে পিষ্টলসহ বহু বিস্ফোৰক সামগ্ৰী। এই ঘটনা সংঘটিত হৈছে অমৃতসৰৰ ভিলেজ চক আল্লাহ বক্সত।
বি এছ এফ পঞ্জাব ফ্ৰন্টিয়াৰে এক টুইট যোগে এই বিষয়ে সদৰী কৰাৰ লগতে উদ্ধাৰ হোৱা সামগ্ৰীসমূহৰ ছবিও প্ৰকাশ কৰিছে। টুইটটোত উল্লেখ কৰা মতে, আজি পুৱাৰ ভাগত পাকিস্তানী ড্ৰ’নখনে ভাৰতীয় আকাশমাৰ্গ উলংঘা কৰা পৰিলক্ষিত কৰি বি এছ এফে গুলীয়াই বাগৰাই দিয়ে।
অনুসন্ধানৰ পিছত বি এছ এফ পঞ্জাব ফ্ৰন্টিয়াৰৰ সৈন্যই ড্ৰ’নখনৰ পৰা এটা পিষ্টল, ২টা মেগাজিন, ২০ জাঁই সজীৱ গুলী, আৰু ৫.২৪০ কিলোগ্ৰাম হেৰ’ইন উদ্ধাৰ কৰে। এই সামগ্ৰীসমূহ ড্ৰ’নৰ জৰিয়তে ভাৰতলৈ চোৰাং সৰবৰাহ কৰা বুলি নিশ্চিতি দিছে বি এছ এফে।
🚨🚨🚨
𝐏𝐢𝐬𝐭𝐨𝐥 𝐚𝐧𝐝 𝟓.𝟐𝟒𝟎𝐤𝐠 𝐇𝐞𝐫𝐨𝐢𝐧 𝐫𝐞𝐜𝐨𝐯𝐞𝐫𝐞𝐝 𝐛𝐲 𝐁𝐒𝐅In the early morning hours of 26th November, a Pakistani drone violated Indian airspace, which was intercepted by #AlertBSF troops with firing. During the search operation, @BSF_Punjab troops… pic.twitter.com/dD1dYL31V0
— BSF PUNJAB FRONTIER (@BSF_Punjab) November 26, 2023
উল্লেখ্য যে, সীমান্ত সুৰক্ষা বাহিনীয়ে চলিত বৰ্ষৰ গত ১০ মাহত ভাৰতৰ ভূখণ্ডত প্ৰৱেশ কৰা ৬৯ খন পাকিস্তানী ড্ৰ’ন ধ্বংস কৰি চোৰাংভাৱে ভাৰতলৈ নিচাজাতীয় দ্ৰব্য সৰবৰাহৰ প্ৰচেষ্টাক বিফল কৰি তুলিছে বুলি তথ্য প্ৰকাশ কৰিছে।
তথ্য অনুসৰি চলিত বৰ্ষৰ ১ জানুৱাৰীৰ পৰা ৩১ অক্টোবৰৰ ভিতৰত পঞ্জাৱ, ৰাজস্থান, আৰু জম্মু সীমান্তৰ মাজেৰে যোৱা ভাৰতৰ পশ্চিম সীমান্তত বি এছ এফে মুঠ ৬৯ খন এনে ড্ৰ’ন জব্দ কৰে।
এই ৬৯খন ড্ৰোনৰ ভিতৰত ৬০খন পঞ্জাৱ সীমান্তৰ পৰা আৰু ৯খন ৰাজস্থান সীমান্তৰ পৰা জব্দ কৰা হৈছে। অক্টোবৰ মাহত সৰ্বাধিক ২১খন ড্ৰোন জব্দ কৰা হৈছিল। ইয়াৰে পঞ্জাৱৰ পৰা ১৯খন আৰু ৰাজস্থান সীমান্তৰ পৰা ২খন ড্ৰ’ন জব্দ হৈছিল।
আনহাতে, প্ৰকাশিত তথ্য অনুসৰি ২০২০ চনৰ ১ জানুৱাৰীৰ পৰা চলিত বৰ্ষৰ ৩১ অক্টোবৰলৈকে মুঠ ৯৩খন ড্ৰ’ন জব্দ কৰিছে বি এছ এফে।
