জম্মু-কাশ্মীৰৰ উধমপুৰ জিলাত আজি আবেলি সংঘটিত হৈছে এক চাঞ্চল্যকৰ ঘটনা। জিলাখনত কৰ্মৰত এগৰাকী ইণ্ডো-তিব্বত সীমান্ত আৰক্ষীৰ (ITBP) জোৱানে তিনিজন সহকৰ্মীক গুলীয়াই আহত কৰাৰ পিছত নিজকে গুলীয়াই হত্যা কৰে।
উধমপুৰ জিলাৰ দেৱিকা ঘাট কমিউনিটি চেণ্টাৰত আবেলি প্ৰায় ৩:৩০ বজাত এই চাঞ্চল্যকৰ ঘটনা সংঘটিত হয়।
জিলাখনত কৰ্মৰত বিভাগটোৰ শীৰ্ষ বিষয়াসকলে এই ঘটনাৰ বিষয়ে প্ৰকাশ কৰিছে। ইতিমধ্যে ঘটনাটোৰ তদন্তৰ বাবে নিৰ্দেশ দিয়া হৈছে বুলিও বিষয়াসকলে সদৰি কৰে।
আই টি বি পি- ৰ এজন জ্যেষ্ঠ বিষয়াই সংবাদ মাধ্যমৰ আগত প্ৰকাশ কৰা মতে কনিষ্টবল ভূপেন্দ্ৰ সিঙে তেওঁৰ তিনি সহকৰ্মীক লক্ষ্য কৰি গুলীবৰ্ষণ কৰে, যাৰ ফলত এজন হেড কনিষ্টবল আৰু দুজন কনিষ্টবল গুলীত আঘাতপ্ৰাপ্ত হয়।
তিনিওজন আঘাতপ্ৰাপ্ত জোৱানকে ইতিমধ্যে এখন চিকিৎসালয়ত ভৰ্তি কৰোৱা হৈছে আৰু তেওঁলোক এতিয়া বিপদমুক্ত বুলিও বিষয়াজনে লগতে কয়।
উল্লেখ্য যে বিগত ২৪ ঘণ্টাত জম্মু-কাশ্মীৰত দ্বিতীয়টো এনে ঘটনা সংঘটিত হৈছে। শুকুৰবাৰে পুঞ্চত সংঘটিত এনে এক ঘটনাৰ সময়ত দুজন সেনা জোৱান নিহত হোৱাৰ লগতে আন দুজন জোৱান আহত হৈছিল।