খেলৰ সময়ত অপ্ৰত্যাশিত ঘটনা সংঘটিত হোৱাটো নতুন কথা নহয়। এই ঘটনাবোৰে খেলৰ আনন্দক ম্লান কৰি পেলায়। এইবাৰ উত্তৰ প্ৰদেশত এনে এটা ঘটনা সংঘটিত হৈছে। বলিং কৰাৰ পিছত ক্ৰীজতেই হাৰ্ট এটেকত আক্ৰান্ত হৈ মৃত্যুক আকোঁৱালি লয় এজন ক্ৰিকেটাৰে।
উত্তৰ প্ৰদেশৰ মোৰাদাবাদৰ বিলাৰী ব্লকত ইউ পি ভেটেৰান্স ক্ৰিকেটৰ উদ্যোগত অনুষ্ঠিত হৈছিল এই খেলখন। মোৰাদাবাদ আৰু সম্বলে অংশগ্ৰহণ কৰে। মেচখনত জয়ী হ’বলৈ সম্বলক ৪ টা বলত ১৪ ৰানৰ প্ৰয়োজন হৈছিল। আহমাৰ খানে বলিং কৰি আছিল। বাওঁহতীয়া পেচাৰ আহমাৰ খানে মাত্ৰ ১১ ৰান দি দলটোক জয়ী। তাৰপিছতেই ঘটিল অভাৱনীয় ঘটনাটো।
ভিডিঅ’টোত দেখা গৈছে যে শেষৰ বলটো আহমাৰ খানে বল কৰিছিল, যিটো বেটছমেনে লেগ চাইডৰ ফালে খেলিছিল আৰু সেয়া ফোৰ হৈছিল। কেমেৰাটো আহমাৰ খানৰ ফালে ঘূৰোৱাত দেখা গ’ল যে তেওঁ বলটো এৰি দিয়েই ক্ৰীজত বহি পৰিল আৰু তাৰ পিছত ক্ৰীজতে ঢলি পৰিল।
তেওঁৰ দলটোৱে জয়লাভ কৰাৰ লগে লগে তেওঁৰ সতীৰ্থসকলে উদযাপন কৰিবলৈ আৰম্ভ কৰিলে, কিন্তু তেওঁলোকে আহমাৰক দেখি লৰালৰিকৈ দৌৰি আহিল। তেওঁ কোনো সঁহাৰি দিয়া নাছিল। উপস্থিত লোকে খেলপথাৰতে চিপিআৰ দিবলৈ ধৰে।
তাৰ পিছতে তেওঁক স্থানীয় চিকিৎসালয়লৈ লৈ যোৱা হয়, য’ত চিকিৎসকে তেওঁক মৃত ঘোষণা কৰে। ঘটনাৰ সময়ত স্থানীয় বিধায়ক হাজী মহম্মদ ফাহিম ইৰফানেও অতিথি হিচাপে খেলপথাৰত উপস্থিত আছিল। এই ঘটনাক লৈ তেওঁ শোক প্ৰকাশ কৰে।
মোৰাদাবাদৰ একতা বিহাৰ অঞ্চলৰ বাসিন্দা আছিল আহমাৰ খান। তেওঁৰ পৰিয়ালত আছে পত্নী, দুটা সন্তান আৰু এগৰাকী ভগ্নী। তেওঁৰ মৃত্যুৰ খবৰে স্থানীয় ক্ৰীড়াক্ষেত্ৰখনত আৰু পৰিয়ালত শোকৰ ছাঁ পেলাইছে। মৃতকৰ বয়সৰ বিষয়ে জানিব পৰা হোৱা নাই।
