১৯ ঘণ্টাৰ অন্তত ধ্বংসস্তুপৰ মাজৰ পৰা জীৱন্তে উদ্ধাৰ শিশু,সোমাই আছিল মৃত মাতৃৰ বুকুৰ মাজত

এঘণ্টা নহয়,দুঘণ্টা নহয়,সুদীৰ্ঘ ১৯ ঘণ্টা ধ্বংসস্তুপৰ মাজত আৱদ্ধ হৈ থকা এটি ৪ বছৰীয়া শিশুক জীৱন্তে উদ্ধাৰ কৰিছে উদ্ধাৰকাৰীৰ দলে।

মৃত মাকৰ বুকুৰ মাজত কুচিমুচি সোমাই থকা শিশুটিক উদ্ধাৰ কৰিয়েই প্ৰেৰণ কৰা হৈছে চিকিৎসালয়লৈ।

শিশুটিৰ নাম মহম্মদ বাংগি। মঙলবাৰে সন্ধিয়া মহাৰাষ্ট্ৰৰ ৰাইগড়ৰ এটা পাঁচ মহলীয়া অট্টালিকা তাচপাতৰ ঘৰৰ দৰে ভাগি পৰিছিল।

সেই সময়ত মহম্মদ বাংগি নামৰ শিশুটি খেলি আছিল মাকৰ কাষতে।

শিশুটিৰ ককায়েক আৰু বায়েক শুই আছিল একেটা কোঠাতে। হঠাতে প্ৰচণ্ড শব্দ কৰি জৰজৰকৈ ভাগি পৰে অট্টালিকাটো।

#WATCH: A 4-year-old boy was rescued from under the debris at the site of building collapse in Mahad, Raigad. #Maharashtra pic.twitter.com/polMUhzmqN

— ANI (@ANI) August 25, 2020

ঘটনাৰ ততকে ধৰিব নোৱাৰা শিশুটিৰ মাকে শিশুটিক বুকুৰ মাজত সাৱটি ধৰে।

লগে লগে ধ্বংসস্তুপত পৰিণত হোৱা স্থানত যোৱা নিশাৰে পৰাই চলাই থকা হৈছে উদ্ধাৰ অভিযান।

আজি পুৱা উদ্ধাৰকাৰী দলৰ কেইজনমান লোকে ধ্বংসস্তুপৰ মাজত শিশুৰ কান্দোন শুনি আৰু ৰৈ নাথাকিল।

সাৱধানে চলিল শিল,ইটা গুচোৱাৰ কাম। অৱশেষত ধ্বংসস্তুপৰ মাজৰ পৰা উলিয়াই অনা হয় দেৱশিশুটিক।

মূৰত আঘাত পোৱা শিশুটি শুই আছিল মৃত মাকৰ বুকুৰ মাজত।

কাষতে মৃত অৱস্থাত পৰি ৰৈছিল মহম্মদ বাংগি নামৰ শিশুটিৰ বায়েক আৰু ককায়েক।

শিশুটিক উদ্ধাৰ কৰাৰ ভিডিঅ’ই সকলো দৰদী লোকৰে হৃদয় ব্যথিত কৰি তুলিছে।

এই ঘটনাত এতিয়ালৈকে মৃত্যু ঘটিছে ১৫ জন লোকৰ।