দুবছৰীয়া কৰোনা সন্ত্ৰাসৰ মাজতে বিশ্বৰ চিকিৎসা গৱেষকসকলক উৎফুল্লিত কৰি তোলা খবৰ প্ৰকাশ পাইছে।
ব্ৰাজিলত উপলব্ধ এক বিশেষ সাপৰ বিষৰ পৰা ঔষধ প্ৰস্তুত কৰি কৰোনা ভাইৰাছক প্ৰতিৰোধ কৰিব পৰা যাব পাৰে!
আন্তৰাষ্ট্ৰীয় সংবাদ পত্ৰ ৰয়টাৰ-এ ব্ৰাজিলৰ গৱেষকৰ উদ্ধৃতিৰে প্ৰকাশ কৰা মতে ব্ৰাজিলত উপলব্ধ এবিধ বিষাক্ত সাপৰ বিষৰ ক্ষুদ্ৰকণা তথা অণুৱে বান্দৰৰ শৰীৰ তথা কোষত থকা কৰোনাভাইৰাছৰ প্ৰজনন প্ৰতিৰোধ কৰে।
গৱেষকসকলে বান্দৰৰ শৰীৰত থকা কৰোনাভাইৰাছৰ প্ৰজনন প্ৰতিৰোধ কৰা সেই বিশেষ সাপ বিধৰ বিষৰ পৰাই বিশ্বজুৰি সন্ত্ৰাস সৃষ্টি কৰা COVID-19 ভাইৰাছৰ সৈতে যুঁজিবলৈ ঔষধ প্ৰস্তুত কৰাৰ সম্ভৱনাও ব্যক্ত কৰিছে।
ৰয়টাৰ-ত প্ৰকাশ পোৱা অনুসৰি ব্ৰাজিলৰ গৱেষকসকলৰ মতে কোৰানাৰ প্ৰতিৰোধী যুঁজৰ ক্ষেত্ৰত ই সম্ভাৱ্য ঔষধ হিচাপে প্ৰথম পদক্ষেপ হ’ব পাৰে।
চলিত মাহত বিজ্ঞানভিত্তিক জাৰ্ণাল Moleculesত প্ৰকাশিত এক অধ্যয়নত কোৱা হৈছে যে জাৰাৰাকুচু পিট ভাইপাৰ নামৰ বিষাক্ত সৰ্পৰ বিষাক্ত ক্ষুদ্ৰ কণাই বান্দৰ কোষত বৃদ্ধি পোৱা ভাইৰাছক ৭৫% প্ৰতিৰোধ তথা হ্ৰাস কৰিব পাৰে।
চাও পাওলো বিশ্ববিদ্যালয়ৰ অধ্যাপক আৰু গৱেষণাৰ প্ৰৱন্ধটোৰ লেখক ৰাফেল গুইডোৱে সাপৰ বিষাক্ত কণাৰ দ্বাৰা ভাইৰাছটোৰ পৰা এটা অতি গুৰুত্বপূৰ্ণ প্ৰ’টিন প্ৰতিৰোধ কৰিবলৈ সক্ষম হৈছিল বুলিও মন্তব্য কৰিছে।
এই ক্ষুদ্ৰতম কণা বা অণুটো হৈছে এক পেপটাইড বা এমিনো এচিডৰ শৃংখলা, যি পিএলপ্ৰো নামৰ কৰোনাভাইৰাছৰ প্ৰজননৰ বাবে গুৰুত্বপূৰ্ণ আন কোষবোৰক আঘাত নকৰাকৈ এক এনজাইমৰ সৈতে সংযোগ কৰিব পাৰে।
গৱেষকসকলে এই বিষাক্ত সৰ্পৰ বিধৰ বিষৰ কণাৰ পৰা কৰোনাভাইৰাছ প্ৰতিৰোধী ঔষধ প্ৰস্তুতৰ সম্ভাৱনাৰ কথাহে ব্যক্ত কৰিছে।
অৱশ্যে ই সম্ভৱ হ’ব নে নাই, সম্ভৱ হ’লেও কেতিয়াকৈ সম্ভৱ হ’ব সেই সম্পৰ্কে কোনো বিতংকৈ কোৱা নাই গৱেষকসকলে।
তেওঁলোকৰ মতে পৰৱৰ্তী সময়ত অণুটোৰ বিভিন্ন পালিৰ দক্ষতা আৰু ই ভাইৰাছটোক প্ৰথমতে শৰীৰত বা কোষত প্ৰৱেশ কৰা প্ৰতিহত কৰিবলৈ সক্ষম হয় নে নাই মূল্যায়ন কৰিব।
তেওঁলোকে মানৱ শৰীৰত এই বিষাক্ত সৰ্পৰ বিষৰ পৰা আহৰণ কৰা কণাটোক পৰীক্ষা কৰাৰ বাবে আশা পালি আছে। অৱশ্যে কেতিয়াকৈ এয়া সম্ভৱ হ’ব সেই বিষয়ে গৱেষকসকলে এতিয়াই প্ৰকাশ কৰা নাই।
ভেকচিনেও কৰোনা ভাইৰাছৰ সংক্ৰমণ ৰোধ কৰিবলৈ অক্ষম হোৱা বিশ্বত ব্ৰাজিলৰ গৱেষকসকলে আশা কৰাৰ দৰে জাৰাৰাকুচু পিট ভাইপাৰ নামৰ বিষাক্ত সাপ বিধৰ বিষৰ পৰা কৰোনা ভাইৰাছৰ প্ৰতিৰোধী ঔষধ প্ৰস্তুত কৰিব পাৰিলে বিশ্ববাসীক এক সংকটৰ পৰা উদ্ধাৰ কৰাতো সম্ভৱপৰ হ’ব পাৰে।
