তিনিচুকীয়া জিলাৰ ডিগবৈৰ টিংৰাই বজাৰত দুৰ্বৃত্তই সংঘটিত কৰা গ্ৰেনেড বিস্ফোৰণ সন্দৰ্ভত আজি আৰক্ষীয়ে এজন লোকক গ্ৰেপ্তাৰ কৰিছে।
ডিগবৈৰ তামুলী বনগাঁৱৰ পৰা আৰক্ষীয়ে আজি দীপেন শইকীয়া নামৰ এজন লোকক গ্ৰেপ্তাৰ কৰে।
তিনিচুকীয়া আৰক্ষীয়ে মটৰ চাইকেলত উঠি অহা দুজন দুৰ্বৃত্তৰ ছবিও প্ৰকাশ কৰিছে।
দুৰ্বৃত্তৰ বিষয়ে সন্ধান দিব পৰা জনক আৰক্ষীয়ে ২ লাখ টকাৰ পুৰস্কাৰ আগবঢ়াব বুলিও ঘোষণা কৰিছে।
উল্লেখ্য তিনিচুকীয়া জিলাৰ ডিগবৈৰ টিংৰাই বজাৰত ১৪ মে’ৰ দুপৰীয়া দুৰ্বৃত্তই গ্ৰেনেড বিস্ফোৰণ ঘটোৱাত দুজন লোক নিহত হোৱাৰ লগতে আন দুজন লোক গুৰুতৰ ভাবে আহত হৈছিল।
পুৰণমল আগৰৱালাৰ দোকানলৈ লক্ষ্য কৰি বাইকত অহা দুজন যুৱকে নিক্ষেপ কৰিছিল গ্ৰেনেড। ফলত চাৰিজন গুৰুতৰভাৱে আহত। আহত চাৰিজনৰ ভিতৰত এজনৰ ডিগবৈ চিকিৎসালয়ত মৃত্যু।
মৃত লোক জনৰ নাম সন্দীপ সিং ( ২৫)। তেওঁৰ মাকুম শুকানপুখুৰীত ঘৰ বুলি জানিব পৰা গৈছে। চিকিৎসালয়ত চিকিৎসাধীন অৱস্থাত থকা আহত কেইজন হৈছে- মনজিৎ দাস( ১৯), সুৰজিৎ তালুকদাৰ (২২),ঘনশ্যাম আগৰৱালা ( ৩২)।ইয়াৰে সুৰজিত তালুকদাৰৰো মৃত্যু ঘটে।
গ্ৰেনেড নিক্ষেপৰ এই ঘটনাৰ সৈতে আলফা স্বাধীন জড়িত থকা বুলি সন্দেহ কৰা হৈছিল যদিও আলফা স্বাধীনে এই ঘটনাত জৰিত থকাৰ কথা অস্বীকাৰ কৰিছে।
আলফা স্বাধীনৰ প্ৰচাৰ বিভাগৰ সদস্য ৰুমেল অসমে সংবাদ মাধ্যমলৈ প্ৰেৰণ কৰা বিবৃতিত গ্ৰেনেড বিস্ফোৰণৰ ঘটনাৰ সৈতে আলফা কোনোপধ্যে জৰিত নহয় বুলি স্পষ্ট কৰি দিছিল।