উত্তৰ প্ৰদেশৰ বিজনোৰ জিলাত সংঘটিত হৈছে এক হৃদয় বিদাৰক ঘটনা। শনিবাৰে দুপৰীয়া এগৰাকী বিএছএফ জোৱানে নিজৰ ডেৰ বছৰীয়া পুত্ৰক কোলাত লৈ গংগা নদীত জপিয়াই আত্মহত্যাৰ চেষ্টা কৰে। ঘটনাৰ চিচিটিভি দৃশ্য ইতিমধ্যে পোহৰলৈ আহিছে।
বিএছএফ জোৱানজনৰ নাম ৰাহুল। তেওঁ পত্নী মনীষা ঠাকুৰ আৰু পুত্ৰ প্ৰণৱৰ সৈতে নাজিবাবাদৰ বেদ বিহাৰ কলনীত থাকিছিল। পাঁচ বছৰ আগতে দুয়োজনৰ প্ৰেম বিবাহ হৈছিল। বিয়াৰ পিছত সংসাৰ সুখময় আছিল আৰু তিনিবছৰৰ পাছত পুত্ৰৰ জন্ম হয়।
কিন্তু গত মাৰ্চ মাহত ৰাহুল অসুস্থ হৈ পেৰালাইচিচত আক্ৰান্ত হয়। তাৰ পাছত তেওঁ দীঘলীয়া ছুটি লৈ ঘৰলৈ আহিছিল। এই সময়তে পত্নীৰ সৈতে সম্পৰ্কত ভাঙোন আৰম্ভ হয়। ১৯ আগষ্টত খঙত মনীষাই ক’লে যে তেওঁ গংগা বেৰেজৰ পৰা জপিয়াই আত্মহত্যা কৰিব। কিছুক্ষণৰ পাছত মনীষাই গংগাত জপিয়াইছিল—চিচিটিভি ফুটেজত এই দৃশ্য ধৰা পৰিছিল। পাঁচ দিন ধৰি মনীষাৰ সন্ধান চলিছিল কিন্তু কোনো খবৰ পোৱা নাযায়।
শনিবাৰে বিয়লি ৰাহুলে পুত্ৰ প্ৰণৱৰ ঔষধ কিনিবলৈ বিজনোৰৰ হাস্পতাললৈ আহিছিল। তাৰ পিছত টেক্সিত উঠি পোনে পোনে গংগা বেৰেজলৈ গ’ল। বেৰেজৰ ১৭ নম্বৰ গেটত আহি প্ৰথমে মোবাইল ফোন থৈ দিয়ে আৰু তাৰ পিছত পুত্ৰক কোলাত লৈ গংগাত জপিয়াই পৰে।
এই স্থানৰপৰাই পাঁচ দিন পূৰ্বে পত্নী মনীষাই আত্মহত্যা কৰিছিল। দুয়ো ঘটনাৰ সময় প্ৰায় একেই আছিল।
ঘটনাৰ পাছত আৰক্ষী, পিএচি ডুবাৰু আৰু এছডিআৰএফৰ দলে প্ৰায় ছয় ঘণ্টা ধৰি উদ্ধাৰ অভিযান চলাইছে। এতিয়ালৈকে ৰাহুল আৰু তেওঁৰ পুত্ৰৰ কোনো সন্ধান পোৱা হোৱা নাই।
