অজি অৰ্থাৎ ২২ চেপ্তেম্বৰত অনুষ্ঠিত হৈছে বড়োলেণ্ড টেৰিটৰিয়েল কাউন্সিলৰ (বিটিচি) নিৰ্বাচনৰ ভোটগ্ৰহণ। বিটিচি নিৰ্বাচনত ওদালগুৰি জিলাৰ ১০০টা ভোটকেন্দ্ৰত সম্পূৰ্ণ মহিলা কৰ্মচাৰী নিয়োগ কৰি এক অনুকৰণীয় দৃষ্টান্ত স্থাপন কৰিছে। জিলাখনৰ ১০০টা ভোটগ্ৰহণ কেন্দ্ৰ সম্পূৰ্ণৰূপে মহিলা কৰ্মচাৰীৰ দ্বাৰা পৰিচালিত কৰি সমগ্ৰ বিটিআৰ অঞ্চলত সৰ্বাধিক মহিলা কৰ্মী নিযুক্ত কৰাৰ গৌৰৱ অৰ্জন কৰিছে ওদালগুৰি জিলাই।
তুলনামূলকভাৱে কোকৰাঝাৰত ৪১টা, তামুলপুৰত ৩০টা, চিৰাংত ১৫টা আৰু বাকছাত মাত্ৰ এটা ভোটকেন্দ্ৰ মহিলা কৰ্মীৰ দ্বাৰা পৰিচালিত হ’ব।
অসম ৰাজ্যিক নিৰ্বাচন আয়োগে প্ৰকাশ কৰা তথ্য অনুসৰি বিটিআৰৰ পাঁচখন জিলাত মুঠ ৩৩৫৯টা ভোটগ্ৰহণ কেন্দ্ৰ আছে। ইয়াত কোকৰাঝাৰে ৯৪২টা কেন্দ্ৰৰে শীৰ্ষস্থান দখল কৰিছে। তাৰ পিছতে উদালগুৰিত ৯৩৭টা, বাকছাত ৫৭৫টা, চিৰাংত ৫১০টা আৰু তামুলপুৰত ৩৯৫টা ভোটকেন্দ্ৰ আছে।
উল্লেখ্য যে মুঠ ২৬,৫৮,১৫৩ গৰাকী ভোটাৰে এই নিৰ্বাচনত ভোট দান কৰিব। ইয়াৰ ভিতৰত ১৩,৩৪,৬০০ গৰাকী মহিলা ভোটাৰ আৰু পুৰুষ ভোটাৰ ১৩,২৩,৫৩৬ গৰাকী। লগতে বিশেষ শ্ৰেণীৰ ভোটাৰ ১৭ জনো আছে। শেহতীয়া তথ্য অনুসৰি এই পৰ্যন্ত ওদালগুৰিত ৫১.৭৫% ভোটদান সম্পন্ন হৈছে। ৩১৬ গৰাকী প্ৰাৰ্থীৰ ভাগ্য নিৰ্ধাৰণ হ’বলগীয়া এই নিৰ্বাচনৰ ফলাফল অহা ২৬ ছেপ্টেম্বৰৰ সন্ধিয়া ঘোষণা কৰা হ’ব।
