ফিফা বিশ্বকাপ ২০২৬ৰ ফাইনেল খেলখন কেৱল খেলপথাৰতেই নহয়, এইবাৰ ইয়াৰ লগত সংগতি ৰাখি এক বিশাল মিউজিক শ্ব’ও অনুষ্ঠিত হ’ব। ফিফাই আনুষ্ঠানিকভাৱে ঘোষণা কৰিছে যে আগন্তুক প্ৰতিযোগিতাখনৰ চূড়ান্ত যুঁজত প্ৰথম হাফ টাইম শ্ব’ৰ আয়োজন কৰা হ’ব। আৰু সেই মঞ্চত থাকিব মেডোনা, ছাকিৰা আৰু কোৰিয়ান বেণ্ড বিটিএছ।
১৯ জুলাইত নিউ জাৰ্ছিৰ মেটলাইফ ষ্টেডিয়ামত অনুষ্ঠিত হ’ব বিশ্বকাপৰ ফাইনেল। ইতিহাসত প্ৰথমবাৰৰ বাবে বিৰতিৰ সময়ত তাত এক পূৰ্ণাংগ অনুষ্ঠানৰ আয়োজন কৰা হ’ব। সমগ্ৰ অনুষ্ঠানটোৰ কিউৰেটৰ হৈছে কল্ডপ্লেৰ ক্ৰীছ মাৰ্টিন।
সংস্থাটোৰ প্ৰেছিডেন্ট জিয়ানি ইনফান্টিনোৱে ছ’চিয়েল মিডিয়াত শিল্পীসকলৰ নাম ঘোষণা কৰি কয় যে, ‘২০২৬ চনৰ বিশ্বকাপৰ ফাইনেলৰ হাফটাইম শ্ব’টো সঁচাকৈয়ে এক বিশেষ মুহূৰ্ত হ’ব। হাফটাইম কনচাৰ্ট বহু বছৰ ধৰি আমেৰিকাৰ ডাঙৰ ডাঙৰ ক্ৰীড়া অনুষ্ঠানৰ আকৰ্ষণৰ কেন্দ্ৰবিন্দু হৈ আহিছে। এইবাৰ সেই মডেল অনুসৰণ কৰা হ’ব বিশ্বকাপৰ ফাইনেলত।
২০১২ চনত মেডোনাই ছুপাৰ বোলৰ হাফটাইম শ্ব’ কৰিছিল। ২০২০ চনত জেনিফাৰ লোপেজৰ সৈতে অনুষ্ঠান পৰিৱেশন কৰাৰ অভিজ্ঞতা আছে ছাকিৰাৰ। এইবাৰ তেওঁলোকৰ সৈতে যোগদান কৰিছে কে-পপ ছুপাৰগ্ৰুপ বিটিএছ।
ফিফাই কয় যে এই অনুষ্ঠানটো ‘ফিফা গ্ল’বেল চিটিজেন এডুকেশ্যন ফাণ্ড’ৰ সৈতে জড়িত হ’ব। শিশুৰ শিক্ষা আৰু ফুটবলৰ সুযোগ বৃদ্ধিৰ বাবে এই প্ৰকল্পটো চলোৱা হৈছে। জিয়ানি ইনফান্টিনোৰ ভাষাত, ‘সংগীত, ফুটবল আৰু শিশুৰ জীৱন উন্নত কৰাৰ যৌথ লক্ষ্য – এই মঞ্চত সকলো একেলগে দেখা যাব।’
বিশ্বকাপৰ ফাইনেলত সাধাৰণতে ১৫ মিনিটৰ বিৰতি থাকে। কিন্তু অনুমান কৰা হৈছে যে হাফটাইম শ্ব’ এটা সংযোজন কৰাৰ বাবে সময় বাঢ়িব পাৰে। অৱশ্যে ফিফাই এতিয়াও বিৰতি কিমান দিন হ’ব সেই বিষয়ে একো কোৱা নাই।
আগন্তুক প্ৰতিযোগিতাখন ইতিহাসৰ সৰ্ববৃহৎ বিশ্বকাপ হিচাপে পৰিগণিত হ’ব। প্ৰথমবাৰৰ বাবে ৪৮টা দলে খেলিব। মেচৰ সংখ্যা ১০৪ লৈ বৃদ্ধি কৰা হৈছে। আমেৰিকা, কানাডা আৰু মেক্সিকো যৌথ আয়োজক। ১১ জুনৰ পৰা আৰম্ভ হ’ব এই প্ৰতিযোগিতা। ১৯ জুলাইত শেষ হ’ব।
ইয়াৰ পূৰ্বে ফিফাই ক্লাব বিশ্বকাপৰ ফাইনেলত এই মডেলটো পৰীক্ষা কৰিছিল। মেটলাইফ ষ্টেডিয়ামত চেলছীৰ বিৰুদ্ধে পি এছ জিৰ খেলখনৰ সময়ত ড’জা কেট, জে বালভিন আৰু টেমছে প্ৰদৰ্শন কৰে। সেই পৰীক্ষাৰ পিছত এতিয়া ফিফাই বিশ্বকাপৰ ফাইনেলত পোনপটীয়াকৈ ডাঙৰ পৰীক্ষাত নামিছে।
