Bumrah’s all-round show বতৰে বাধা নিদিলে টীম ইণ্ডিয়াই ২০০৭ চনৰ পিছত পুনৰ এবাৰ ইংলেণ্ডৰ বিৰুদ্ধে টেষ্ট শৃংখলা জিকাৰ সম্ভাৱনা উজলি উঠিছে। সেইবাৰ ৰাহুল দ্ৰাবিড়ৰ নেতৃত্বত শৃংখলা জয়ৰ সোৱাদ পাইছিল সৌৰভ গাংগুলী আৰু শচীন তেণ্ডুলকাৰে। এইবাৰ প্ৰাক্তন অধিনায়কজন দলটোৰ মুখ্য প্ৰশিক্ষকৰ চকীত বহি আছে।
দ্বিতীয় দিনা বৰষুণে বাৰে বাৰে খেল বিঘ্নিত কৰে যদিও যশপ্ৰীত বুমৰাহৰ নেতৃত্বত টীম ইণ্ডিয়াই কম সুযোগৰ মাজতে নিজৰ কাম কৰি পেলাইছে। বেটিঙৰ পৰা বলিংলৈকে সকলো বিভাগতে টীম ইণ্ডিয়াই বেন ষ্ট’কছৰ দলক দিশহাৰা কৰি তুলিছে।
ৰবীন্দ্ৰ জাদেজাৰ ১০৪ ৰাণ আৰু বুমৰাহৰ ১৬ টা বলত অপৰাজিত ৩১ ৰাণৰ সহায়ত ভাৰতৰ প্ৰথম ইনিংছ ৪১৬ ৰাণত সমাপ্ত হয়। তাৰ পিছত বল হাতত লৈ খেলপথাৰত নামিয়েই এক বিধ্বংসী ৰূপ লয় দলৰ অধিনায়কে। বুমৰাহে অকলেই ইংলেণ্ডৰ টপ অৰ্ডাৰ ধ্বংস কৰে। এলেক্স লিজ, জেক ক্ৰাউলি আৰু ফৰ্মত থকা অলি পোপক তেওঁৰ গতিৰ সস্মুখত অসহায় যেন লাগিছিল। মাত্ৰ ৪৪ ৰাণতে ৩ টা উইকেট হেৰুৱাই আৰম্ভণিতে বেকফুটত গৈছিল ঘৰুৱা দলটো।
That's Stumps on Day 2 of the #ENGvIND Edgbaston Test! #TeamIndia put on a fantastic show with the ball, scalping 5 England wickets, after posting 416 on the board. 👏 👏
We will be back for Day 3 action tomorrow.
Scorecard ▶️ https://t.co/xOyMtKrYxM pic.twitter.com/Q2kLIFR7O0
— BCCI (@BCCI) July 2, 2022
বাৰে বাৰে হোৱা বৰষুণৰ বাবে খেলখন বন্ধ হৈ পৰিছিল। তাৰ লগতে আছিল ভাৰতীয় পেচাৰৰ চাপ। সেই সময়ত জো ৰুট আৰু জনি বেয়াৰস্টোৱে চাপৰ মাজত কিছু সংগ্ৰাম চলাইছিল। দুয়োজনে চতুৰ্থ উইকেটত ৩৪ ৰাণ যোগ দিয়ে। কিন্তু দিনটোৰ শেষত ৰুটক মহম্মদ চিৰাজে আউট কৰাৰ লগে লগে ইংলেণ্ডে এক মোক্ষম আঘাত পায় । ৰুটে ৩১ ৰাণত পেভলিয়নলৈ উভতি যায়। মহম্মদ ছামীও পিছ পৰি নাথাকিল। তেওঁ ‘নাইট ৱাচমেন’ জেক লিচক পেভলিয়নলৈ ঘূৰাই পঠায়।
দিনটোৰ শেষত ইংলেণ্ডৰ স্ক’ৰ হয়গৈ ৫ উইকেটত ৮৪ ৰাণ। ভাৰত এতিয়াও ৩৩২ ৰাণত আগবাঢ়ি আছে। ‘মেন ইন ব্লু’ ব্ৰিগেডে ইতিমধ্যে শৃংখলাটোত ২-১ ত আগবাঢ়ি আছে। এজবাষ্টনত ভাৰতে আগতে বিজয়ৰ সোৱাদ পোৱা নাই। এই টেষ্টত জয়লাভ কৰিলে টীম ইণ্ডিয়াই শৃংখলা জয়ৰ লগতে এজবাষ্টনত ভাৰতৰ পৰম্পৰাও সলনি হৈ পৰিব।
