পৰ্যটকৰ বাবে কাজিৰঙা ৰাষ্ট্ৰীয় উদ্যানৰ বুঢ়াপাহাৰ বনাঞ্চলৰ দ্বাৰ পুনৰ মুকলি কৰা হৈছে।
বুধবাৰে ২০২১-২২ পৰ্যটন বৰ্ষৰ বাবে ফিটা কাটি বুঢ়াপাহাৰ বনাঞ্চলৰ দ্বাৰ পুনৰ মুকলি কৰে কলিয়াবৰ মহকুমাৰ নৱনিযুক্ত সহকাৰী আয়ুক্ত দেৱসেনা বৰ্মনে।
কাজিৰঙা ৰাষ্ট্ৰীয় উদ্যানৰ সঞ্চালক পি শিৱকুমাৰৰ লগতে ৰাষ্ট্ৰীয় উদ্যানখনৰ উচ্চ পদস্থ বিষয়া বৰ্গৰ লগতে কলিয়াবৰ মহকুমাৰ মহকুমাধিপতি পবিত্ৰ কুমাৰ দাসো দ্বাৰ মুকলি অনুষ্ঠানত উপস্থিত থাকে।
উল্লেখ্য যে, যোৱা ১ অক্টোবৰত পৰ্যটকৰ বাবে কাজিৰঙাৰ মুখ্য দ্বাৰ মুকলি কৰা হৈছিল। বাট-পথ সুচল নোহোৱাৰ বাবে মুকলি কৰা হোৱা নাছিল বুঢ়াপাহাৰ বনাঞ্চলৰ দ্বাৰ।
বুধবাৰে বুঢ়াপাহাৰ বনাঞ্চলৰ দ্বাৰ মুকলি কৰাৰ লগে লগে আশাৰ সঞ্চাৰ হৈছে স্থানীয় পৰ্যটন উদ্যোগৰ লগত জৰিত লোক সকলৰ মনত।
একে দিনাই কাজিৰঙাৰ পূৰ্বে উচ্চেদিত এলেকা বান্দৰডুবি অঞ্চলো পৰ্যটকৰ বাবে মুকলি কৰা হয়।
উল্লেখ্য যে, পাহাৰ, নদী আৰু বনাঞ্চলৰে পৰিৱেষ্টিত বুঢ়াপাহাৰ বনাঞ্চলখন পৰ্যটকক আৰ্কষিত কৰিব পৰাকৈ আছে নৌকা ভ্ৰমণ, জীপ চাফাৰী,হাতী চাফাৰীৰ লগতে এইবাৰ নতুনকৈ চাইক্লিংৰ ব্যৱস্থাও কৰা হৈছে।
পৰ্যটকে ফটো উঠিব পৰাকৈ চিৰাং পাহাৰত চেলফি পইণ্টৰো ব্যৱস্থা গ্ৰহণ কৰা হৈছে।
বুঢ়াপাহাৰ বনাঞ্চলত বিভিন্ন বন্যজীৱৰ বিৰল দৃশ্য উপভোগ কৰাৰ লগতে পাহাৰীয়া পথেৰে ট্ৰেকিং আৰু ব্ৰহ্মপুত্ৰৰ নৈসৰ্গিক সৌন্দৰ্যও উপভোগ কৰিব পাৰে পৰ্যটকসকলে।
