চিৰাং আৰু বঙাইগাঁও জিলাত অব্যাহত আছে অবৈধ বিদেশী চুপাৰিৰ বিৰুদ্ধে আৰক্ষীৰ অভিযান ।
ইতিমধ্যে জিলা দুখনত আৰক্ষীয়ে অব্যাহত ৰখা অভিযানত বৃহৎ পৰিমাণৰ বাৰ্মিজ চুপাৰি জব্দ হৈছে ৷
ইয়াৰ মাজতে পুনৰ বঙাইগাঁও জিলাৰ মাণিকপুৰ ৰাজহ চক্ৰৰ অন্তৰ্গত পশ্চিম গেৰুকাবাৰীত আৰক্ষীয়ে অভিযান চলাই বৃহৎ পৰিমাণৰ বাৰ্মিজ চুপাৰি জব্দ কৰে ।
বঙাইগাঁও জিলাৰ আৰক্ষীয়ে চলোৱা অভিযানত ১০৪ বস্তা সন্দেহজনক বাৰ্মিজ চুপাৰি জব্দ কৰে ।
জব্দকৃত চুপাৰিখিনিৰ বজাৰ মূল্য প্ৰায় ২৫ লাখ টকাৰ হ’ব বুলি আৰক্ষীয়ে জানিবলৈ দিয়ে ।
গেৰুকাবাৰী আৰক্ষী চকীৰ ভাৰপ্ৰাপ্ত আৰক্ষী বিষয়া নৱজিৎ ৰয়ৰ সহযোগত মাণিকপুৰ আৰক্ষীয়ে পশ্চিম গেৰুকাবাৰী নিবাসী সাহাদত আলীৰ ঘৰত অভিযান চলাই এই ১০৪ বস্তা বাৰ্মিজ চুপাৰী জব্দ কৰে ।
জব্দ কৰা চুপাৰিৰ বস্তা সমূহ বাংলাদেশত প্ৰস্তুত কৰা বুলি মোহৰ মৰা আছে ৷ আৰক্ষী সূত্ৰৰ পৰা জানিব পৰা মতে জব্দ কৰা বাৰ্মিজ চুপাৰিসমূহ সাহাদত আলীৰ লগতে আন এজন লোকৰ ৷
কিন্তু লোকজনৰ নাম পোহৰলৈ অহা নাই যদিও আৰক্ষীৰ অনুসন্ধানৰ পাছত পোহৰলৈ আহিব ।
আৰক্ষীয়ে সাহাদত আলীক সোধ-পোছৰ বাবে আটক কৰি গেৰুকাবাৰী আৰক্ষী চকী লৈ নিয়ে ৷
