নগাঁৱৰ আনন্দৰাম ঢেকিয়াল ফুকন মহাবিদ্যালয়ৰ অধ্যক্ষই ছাত্ৰ-ছাত্ৰীৰ বাবে ইউনিফৰ্ম বাধ্যতামূলক কৰি দিয়া নিৰ্দেশৰ প্ৰতিক্ৰিয়াত ধিং সমষ্টিৰ এ আই ইউ দি এফ বিধায়ক আমিনুল ইছলামে কৰা এক ফে’চবুক প’ষ্টক লৈ চ’চিয়েল মিডিয়াত ব্যাপক বিতৰ্ক হৈছে।
ঘটনাটোক লৈ কলেজৰ অধ্যক্ষ ড০ সুৰজিত কুমাৰ ভাগৱতীয়ে আনকি বৃহস্পতিবাৰে জিলা আৰক্ষী অধীক্ষকক লিখিতভাৱে জনোৱা বুলি জানিব পৰা গৈছে।
কলেজৰ অধ্যক্ষই ছাত্ৰ-ছাত্ৰীৰ ইউনিফৰ্ম বাধ্যতামূলক বুলি শেহতীয়াকৈ এখন জাননী জাৰি কৰিছিল। আৰু সেই জাননীৰ পিছতেই যোৱা বুধবাৰে এক ফে’চবুক প’ষ্টত অধ্যক্ষগৰাকীক কেইটামান মুকলি প্ৰশ্ন কৰে ধিঙৰ বিধায়ক তথা মহাবিদ্যালয়ৰ প্ৰাক্তন ছাত্ৰ আমিনুল ইছলামে।
“কলেজখনত একাংশ ছাত্ৰীয়ে হিজাব আৰু নেকাব পিন্ধি পাঠগ্ৰহণ কৰি থকাৰ ফলত কাৰ কি অসুবিধা হ’ল? আপুনি পূজাৰ বন্ধৰ পিছৰ পৰা হিজাব-নেকাব নিষিদ্ধ কৰি ফতোৱা জাৰি কৰাৰ যুক্তিযুক্ততা কি? ছাত্ৰীসকলে কলেজত হিজাব পিন্ধি যাব নোৱাৰিব বুলি ভাৰতৰ সংবিধানৰ কোন অনুচ্ছেদত উল্লেখ আছে বা ৰাজ্য চৰকাৰৰ কোন অধিসূচনা যোগে নিষিদ্ধ কৰা হৈছে? বিগত ৬০ বছৰে কোনোদিন ছাত্ৰীসকলক হিজাব পৰিধান কৰাৰ ক্ষেত্ৰত নিষেধাজ্ঞা আৰোপ কৰা হোৱা নাছিল। তেতিয়া বাকী ছাত্ৰ-ছাত্ৰীসকলে প্ৰয়োজনীয় শিক্ষা গ্ৰহণ কৰাৰ পৰা বঞ্চিত হৈছিল নেকি?” আদি এলানি প্ৰশ্ন কৰে আমিনুল ইছলামে।
উক্ত ফে’চবুক প’ষ্টৰ প্ৰতিক্ৰিয়াত একাংশ লোকে অধ্যক্ষজনক আৰু আন একাংশই বিধায়কজনক সমালোচনা কৰে। তেওঁৰ মন্তব্যৰ সমৰ্থনত মন্তব্য কৰাসকলক ফে’চবুকত লাইক কৰিছে বিধায়কজনে।
কলেজখনক “গেৰুৱাকৰণ কৰা” বুলিও অধ্যক্ষ ভাগৱতীক সমালোচনা কৰে বিধায়কজনে।
আনহাতে অধ্যক্ষৰ মতে কলেজৰ সকলো ছাত্ৰ-ছাত্ৰীয়ে ইউনিফৰ্ম পিন্ধাৰ বিপৰীতে নিপিন্ধে এগৰাকী ছাত্ৰীয়ে আৰু সেই ছাত্ৰীগৰাকী, অধ্যক্ষৰ মতে, বিধায়কজনৰ জীয়েক।
“এইখন মহাবিদ্যালয়ত ৩ হাজাৰৰো অধিক ছাত্র-ছাত্ৰীৰ ভিতৰত প্ৰায় ৬শ মুছলমান সম্প্ৰদায়ৰ ছাত্র-ছাত্ৰী আছে। সকলোৰে বাবে একেই ইউনিৰ্ফম। কাৰণ কলেজ চৌহদত হিন্দু, মুছলমান, খ্ৰীষ্টান তথা ধনী, দুখীয়া সকলো সমান।সকলোৱে এই ইউনিৰ্ফম পৰিধান কৰিয়ে কলেজলৈ আহে। কিন্তু দুৰ্ভাগ্যজনকভাৱে এগৰাকী ছাত্ৰীয়ে এই নিয়ম পালন নকৰে। তেওঁ মহাবিদ্যালয়লৈ বোৰ্খা পৰিধান কৰি আহে। ছাত্ৰীগৰাকীক ব্যক্তিগতভাৱে একো নকৈ সকলো ছাত্র-ছাত্ৰীকে ইউনিফৰ্ম পৰিধান কৰি আহিবৰ বাবে আহ্বান জনাই মই পুনৰ এখন জাননী জাৰি কৰো,” ছাত্ৰীগৰাকী বিধায়কৰ “জীয়ৰী বুলি শুনিছো” বুলি উল্লেখ কৰি এই মন্তব্য অধ্যক্ষৰ।
ইউনিফৰ্মৰ উপৰি কলেজখনৰ গেৰুৱাকৰণ কৰিব খোজা, প্ৰাক্তন অধ্যক্ষক হীৰক জয়ন্তীত সম্বৰ্ধনা নজনোৱা আদি বিভিন্ন প্ৰসংগ উল্লেখেৰেও অধ্যক্ষক সেই প’ষ্টটোত প্ৰশ্ন কৰে বিধায়কগৰাকীয়ে।
বিধায়কজনৰ মন্তব্যক মহাবিদ্যালয়খনৰ ছাত্র একতা সভা, শিক্ষক গোট, কৰ্মচাৰী আৰু একাংশ প্ৰাক্তন ছাত্রই একেমুখে গৰিহণা দিছে।
