মেঘালয়ত বি এছ এফৰ জোৱান কঢ়িয়াই নিয়া বাছ দুৰ্ঘটনাগ্ৰস্ত; অসমৰ ব্যক্তি নিহত, ২২জন আহত

বুধবাৰে মেঘালয়ৰ পূব জয়ন্তিয়া পাহাৰত এখন বাছ পথৰ পৰা তললৈ বাগৰি পৰাৰ ফলত ১জন লোকৰ মৃত্যু হোৱাৰ লগতে সীমান্ত সুৰক্ষা বাহিনী (বি এছ এফ)ৰ ২০জন জোৱানকে ধৰি ২২ গৰাকী ব্যক্তি আহত হয়।

মেঘালয় আৰক্ষীৰ মতে দুৰ্ঘটনাগ্ৰস্ত বাছখন বি এছ এফৰ ৯৩ বেটেলিয়নে ৰিক্যুইজিশ্যন কৰি নিছিল।

নিহত লোকজন বাছখনৰ যোগালী জগত গগৈ বুলি চিনাক্ত কৰা হৈছে। আহতসকলৰ ভিতৰত ২০ বি এছ এফ জোৱানৰ লগতে আছে বাছখনৰ চালক প্ৰাঞ্জল শইকীয়া আৰু বাবা গগৈ।

প্ৰাপ্ত তথ্য মতে বুধবাৰে আৱেলি প্ৰায় ৪.৩০ বজাত এ এছ-০৫ চি-২০৩৪ নম্বৰৰ এখন তীব্ৰ বেগী বাছে পূব জয়ন্তীয়া পাহাৰৰ উমটিৰাত নিয়ন্ত্ৰণ হেৰুৱাই পথৰ দাঁতিৰ প্ৰায় ১০০ ফুট তলত বাগৰি পৰে।

আহতসকলক সমীপৰ চিকিৎসালয়ত ভৰ্তি কৰোৱা হয়। জানিব পৰা মতে মৰিগাঁও জিলা জাগিৰোডত এন আৰ চি কামত নিয়োজিত থকা বি এছ এফ জোৱানসকলে মেঘালয় হৈ শিলচৰত থকা তেওঁলোকৰ কেম্পলৈ উভতি আহি থকাৰ পথত দুৰ্ঘটনাটো সংঘটিত হয়।