জনপ্ৰিয় কানাড়া অভিনেত্ৰী, মডেল তথা ‘বিগ বছ কানাড়া’ৰ প্ৰাক্তন প্ৰতিযোগী কৃষি থাপাণ্ডাৰ’ বাংগালুৰুৰ ফ্লেটত এজন যুৱকৰ ওলমি থকা মৃতদেহ উদ্ধাৰ হৈছে। মৃত যুৱকজনৰ নাম বৈশাখ। বয়স ৩৩ বছৰ। পেছাত ব্যৱসায়ী। ৰাজৰাজেশ্বৰী নগৰ থানাৰ আৰক্ষীয়ে এই ঘটনাৰ তদন্ত আৰম্ভ কৰিছে।
আৰক্ষীৰ সূত্ৰ অনুসৰি যুৱকজন প্ৰকৃততে গিৰিনগৰৰ বাসিন্দা। অৱশ্যে যথেষ্ট দিনৰ পৰা কৃষিৰ এই ফ্লেটত আছিল। বুধবাৰে অৰ্থাৎ ঘটনাৰ দিনটোত তেওঁ অকলে ফ্লেটটোত আছিল।
চৰম সিদ্ধান্ত লোৱাৰ আগতে বৈশাখে কৃষিৰ সৈতে যোগাযোগ কৰিবলৈ চেষ্টা কৰিছিল। মেছেজটো দেখাৰ লগে লগে আতংকিত হৈ পৰে অভিনেত্ৰীগৰাকী। লগে লগে তেওঁ বৈশাখৰ পৰিয়ালক এই বিষয়ে অৱগত কৰে।
খবৰ পোৱাৰ লগে লগে যুৱকজনৰ পৰিয়ালৰ লোকে খৰধৰকৈ কৃষিৰ ফ্লেটলৈ ঢাপলি মেলিলে। কিন্তু তেতিয়ালৈকে বহু দেৰি হৈ গৈছিল। দুৱাৰ ভাঙি মৃত অৱস্থাত উদ্ধাৰ কৰে যুৱকজনক। ঘটনাস্থলীৰ পৰা কোনো ধৰণৰ চুইচাইড নোট বা ভিডিঅ’ মেছেজ পোৱা নাছিল আৰক্ষীয়ে। কিন্তু বৈশাখৰ পিতৃৰ অভিযোগৰ ভিত্তিত অস্বাভাৱিক মৃত্যুৰ গোচৰ ৰুজু কৰা হৈছে।
তদন্তৰ অন্তত আৰক্ষীয়ে গম পাইছে যে বৈশাখ আৰক্ষীৰ দৃষ্টিগোচৰ হৈছিল চলিত বৰ্ষৰ আৰম্ভণিতে। অৰবিন্দ ৰেড্ডী নামৰ এজন প্ৰভাৱশালী ব্যৱসায়ীলৈ কুৰিয়ৰৰ জৰিয়তে কোটি কোটি টকাৰ ভাবুকি পত্ৰ প্ৰেৰণ কৰাৰ অভিযোগত আৰক্ষীয়ে বৈশাখক গ্ৰেপ্তাৰ কৰিছিল।
সেই পত্ৰখনত অৰবিন্দক মৃত্যুৰ ভাবুকিও দিয়া হৈছিল। পিছত বৈশাখক জামিনত মুকলি কৰি দিয়া হয়। এই গোচৰৰ মানসিক চাপৰ বাবেই বা আন কোনো ব্যক্তিগত কাৰণত তেওঁ আত্মহত্যাৰ পথ বাছি লৈছিল নেকি সেই বিষয়ে আৰক্ষীয়ে তদন্ত অব্যাহত ৰাখিছে।
কৃষি থাপাণ্ডাই ২০১৬ চনত ‘আকিৰা’ ছবিৰ জৰিয়তে কানাড়া চলচ্চিত্ৰ জগতত আত্মপ্ৰকাশ কৰিছিল। ইয়াৰ পিছত তেওঁ ‘এৰাডু কানাছু’ আৰু ‘কান্ন্ৰাক্কি অণ্ডন্নু অট্টি’ৰ দৰে কেইবাখনো প্ৰশংসিত ছবিত অভিনয় কৰে।
কিচ্চা সুদীপে পৰিচালনা কৰা ‘বিগ বছ কানাড়া ছিজন ৫’ত অংশগ্ৰহণ কৰি তেওঁ অপৰিসীম জনপ্ৰিয়তা লাভ কৰে। যোৱা বছৰ (২০২৫) প্ৰজ্জ্বল দেৱৰাজ আৰু বেদিকাৰ সৈতে তেওঁৰ ছবি ‘গাণা’ মুক্তি পাইছিল।
