এক চাঞ্চল্যকৰ কাণ্ডই জোকাৰণি তুলিছে উত্তৰ প্ৰদেশত। মঙলবাৰে ৰাজ্যখনৰ এজন ব্যৱসায়ীৰ ঘৰ ভাঙি পাঁচজনীয়া এক দুৰ্বৃত্তৰ দলে ব্যৱসায়ীগৰাকীৰ পত্নীক দলবদ্ধ ধৰ্ষণ কৰি চিগাৰেটেৰে শৰীৰ জ্বলাই দিয়াৰ অভিযোগ উত্থাপন হৈছে।
এই অমানুষিক নিৰ্যাতন চলোৱাৰ পিছতে দুৰ্বৃত্তৰ দলটোৱে ঘৰৰ আলমাৰীৰ তলা ভাঙি কিছু সোণৰ গহনা, দুই কিলোগ্ৰাম ৰূপ আৰু প্ৰায় ১.৫ লাখ টকাৰ নগদ ধন লুটপাত কৰে।
লগতে নিৰ্যাতিতা মহিলাগৰাকীক এটা কোঠাত আবদ্ধ কৰি অভিযুক্ত লোককেইজনে ঘটনাস্থলীৰ পৰা এখন স্কুটি চুৰি কৰি পলায়ন কৰে বুলি অভিযোগ তুলিছে ভুক্তভোগী মহিলাগৰাকীয়ে।
প্ৰকাশিত খবৰ অনুসৰি, বিজোৰৰ নগিনা দেহাতত এই ঘটনা সংঘটিত হয়। মহিলাগৰাকীৰ স্বামী এজন পেইণ্ট-হাৰ্ডৱেৰৰ পাইকাৰী ব্যৱসায়ী। ঘটনাৰ সময়ত তেওঁ ঔষধ কিনিবলৈ ঘৰৰ পৰা ওলাই গৈছিল।
তেওঁ এজাহাৰত অভিযোগ কৰা মতে, সন্ধিয়া প্ৰায় ৭.৩০ বজাত চুবুৰীয়াৰ চৌহদৰে লোককেইজনে তেওঁৰ ঘৰত প্ৰৱেশ কৰে। তাৰ পিছতে তেওঁৰ ঘ ভাঙি ভিতৰলৈ সোমাই আহে আৰু নিচাজাতীয় দ্ৰব্যৰ গোন্ধৰে অচেতন কৰে মহিলাগৰাকীক।
চেতনা ঘূৰাই পিছত মহিলাগৰাকীয়ে তেওঁক বান্ধি থোৱা অৱস্থাত উদ্ধাৰ কৰে আৰু তেওঁক ধৰ্ষণ কৰা বুলি জানিব পাৰে। এই নিৰ্যাতনৰ সময়ত তেওঁৰ বাহুত চিগাৰেটৰ টুকুৰাৰে জ্বলাই দিয়ে বুলিও মহিলাগৰাকীয়ে অভিযোগ কৰে।
মহিলাগৰাকীৰ অভিযোগৰ ভিত্তিত যোৱা সন্ধিয়া আৰক্ষীয়ে গোচৰ ৰুজু কৰে। আনহাতে মহিলাগৰাকীক চিকিৎসা পৰীক্ষাৰ বাবে প্ৰেৰণ কৰা হৈছে বুলি উল্লেখ কৰি স্থানীয় এগৰাকী উচ্চপদস্থ আৰক্ষী বিষয়াই ঘটনাৰ তদন্তৰ আৰম্ভ কৰা হৈছে বুলি সদৰী কৰে।
