অসম বিধানসভাৰ ২০২৬ৰ নিৰ্বাচনৰ ৰণশিঙা বাজি থকাৰ মাজতেই মধ্য গুৱাহাটী সমষ্টিৰ বিজেপি প্ৰাৰ্থী বিজয় গুপ্তাৰ বিৰুদ্ধে উত্থাপিত এটা পুৰণি অথচ চাঞ্চল্যকৰ অভিযোগে এতিয়া ৰাজ্যৰ ৰাজনৈতিক মহলত তীব্ৰ জোকাৰণিৰ সৃষ্টি কৰিছে।
২০২৪ চনৰ আৰম্ভণিতে শ্বিলঙৰ এখন হোটেলত ৰহস্যজনকভাৱে মৃত্যুবৰণ কৰা গুৱাহাটীৰ প্ৰতিষ্ঠিত ব্যৱসায়ী চিজো জেকবৰ হস্তাক্ষৰ থকা এটা চুইচাইড নোট এতিয়া ছচিয়েল মিডিয়াত ভাইৰেল হৈ পৰিছে, য’ত তেওঁ নিজৰ মৃত্যুৰ বাবে বিজেপি নেতা বিজয় গুপ্তাক পোনপটীয়াকৈ জগৰীয়া কৰিছে।
এই ঘটনাই কেৱল মধ্য গুৱাহাটীৰ বিজেপি প্ৰাৰ্থীগৰাকীৰ প্ৰাৰ্থিত্বৰ ওপৰতেই প্ৰশ্নৰ উত্থাপন কৰা নাই, বৰং শাসকীয় বিজেপি দলৰ ভিতৰচ’ৰাৰ বিত্তীয় কেলেংকাৰীৰ কদৰ্য ৰূপটোকো উদঙাই দিছে।
শ্বিলঙ আৰক্ষীৰ তথ্য অনুসৰি, ২০২৪ চনৰ ২৮ ফেব্ৰুৱাৰীত হোটেল এছেম্বলীৰ ২০৬ নম্বৰ কোঠাত ৪৭ বছৰীয়া জেকবৰ মৃতদেহ উদ্ধাৰ হৈছিল। বিচনাৰ ওপৰত পৰি থকা মৃতদেহটোৰ মুখত তেজৰ চেকুৰা আৰু কোঠাটোত শ্লিপিং টেবলেটৰ অৱশেষ পোৱা গৈছিল।
কিন্তু এতিয়া পোহৰলৈ অহা মৃত্যুৰ পূৰ্বৰ টোকাটোৱে সমগ্ৰ ঘটনাটোক এক গভীৰ ষড়যন্ত্ৰৰ ফালে আঙুলিয়াই দিছে। ‘অসম বিজেপিৰ ‘মিষ্টাৰ বিজয় গুপ্তা’লৈ বুলি সম্বোধন কৰি লিখা এই নোটত জেকবে স্পষ্টকৈ লিখি থৈ গৈছে যে তেওঁৰ বৰ্তমানৰ দুৰৱস্থা আৰু মৃত্যুৰ বাবে বিজয় গুপ্তাই দায়ী।
আধাৰ কাৰ্ডৰ এক বৃহৎ প্ৰকল্পৰ নামত হোৱা বিত্তীয় অনিয়মৰ অভিযোগ উত্থাপন কৰি জেকবে লিখিছে যে বিনিয়োগকাৰীৰ পৰা সংগ্ৰহ কৰা প্ৰায় ১.২০ কোটি টকা গেলেক্সী স্কেলছ এণ্ড চিষ্টেমছ প্ৰাইভেট লিমিটেড নামৰ এটা প্ৰতিষ্ঠানৰ একাউণ্টত জমা কৰা হৈছিল। এই প্ৰতিষ্ঠানটো গুপ্তাৰ এজন আত্মীয়ৰ জৰিয়তে এই প্ৰকল্পত বিজয় গুপ্তাক অন্তৰ্ভুক্ত কৰা হৈছিল বুলি জেকবে গুৰুতৰ অভিযোগ তুলিছে।
সৰ্বাধিক চাঞ্চল্যকৰ বিষয়টো হ’ল, জেকবে অভিযোগ কৰিছে যে প্ৰকল্পটোৰ কাম আৰম্ভ হোৱাৰ পূৰ্বে বিজয় গুপ্তাৰ কোনো বিত্তীয় অংশীদাৰিত্ব নাছিল যদিও পৰৱৰ্তী সময়ত তেওঁ অতি চাতুৰালীৰে সমগ্ৰ প্ৰকল্পটো নিজৰ হাতলৈ লৈ যায়।
ছিলভাৰ টাচ্চ টেকন’লজিছ লিমিটেড নামৰ এটা কোম্পানীক ব্যৱহাৰ কৰি জেকব আৰু অন্যান্য অংশীদাৰসকলক আঁতৰাই পঠোৱা হৈছিল যাতে প্ৰকল্পটোৰ লাভৰ ধন মুষ্টিমেয় কেইজনমান লোকে আত্মসাৎ কৰিব পাৰে। প্ৰকল্পটোৰ পৰা ২৫ শতাংশ লাভৰ অংশ দিয়াৰ প্ৰতিশ্ৰুতি দিও বিজয় গুপ্তাই জেকবক প্ৰতাৰণা কৰা বুলি নোটটোত উল্লেখ আছে। যিবোৰ অভিযোগৰ এতিয়া নিৰ্বাচনৰ সময়ত বিশেষ তাৎপৰ্য বহন কৰিছে।
কেৰালাৰ পৰা আহি বিগত ১৫ বছৰ ধৰি অসমত আইটি প্ৰশিক্ষণ কেন্দ্ৰ, ফিট নৰ্থইষ্ট আৰু ইষ্ট ইকোৰ দৰে ব্যৱসায়িক প্ৰতিষ্ঠান চলোৱা উচ্চশিক্ষিত জেকবৰ এই আত্মহত্যাৰ টোকাটোৱে এতিয়া বিজেপি দলৰ স্বচ্ছতাৰ ওপৰত এক ডাঙৰ প্ৰশ্নবোধক চিহ্ন উদয় কৰিছে।
মধ্য গুৱাহাটীৰ বিজেপিৰ প্ৰাৰ্থীগৰাকীৰ বিৰুদ্ধে উত্থাপিত এনে ভয়ংকৰ অভিযোগ এতিয়া বিজেপিৰ বিৰোধী দলসমূহৰ হাতত এক শক্তিশালী অস্ত্ৰ হৈ পৰিছে।
