অহা ২১ অক্টোবৰত অনুষ্ঠিত হ’ব লগীয়া ১০৬নং সোণাৰী বিধান সভা সমষ্টিৰ উপ নিৰ্বাচনৰ বাবে প্ৰধান ৰাজনৈতিক দল সমূহে প্ৰচাৰ কাৰ্য তীব্ৰতৰ কৰি তুলিছে।
শাসকীয় দল বিজেপি আৰু কংগ্ৰেছৰ শীৰ্ষ নেতা সমূহে নিজৰ নিজৰ প্ৰাৰ্থীক জয়ী কৰোৱাৰ বাবে সমষ্টিৰ চুকে কোণে গৈ প্ৰচাৰ কাৰ্য চলাই আছে।
কংগ্ৰেছৰ প্ৰাৰ্থী সুশীল কুমাৰ চুড়ীৰ হৈ সাংসদ প্ৰদ্যুৎ বৰদলৈ, ৰিপুন বৰা, দেৱব্ৰত শইকীয়া, ৰবিবুল হুছেইন, ৰূপজ্যোতি কুৰ্মীকে ধৰি বহু শীৰ্ষ নেতাই নিৰ্বাচনী প্ৰচাৰত অংশ লৈছে।
ইয়াৰ বিপৰীতে বিজেপিৰ নৱনীতা সন্দিকৈৰ হৈ সাংসদ তপন কুমাৰ গগৈ, ৰাজ্যসভাৰ সাংসদ কামাখ্যা প্ৰসাদ তাচাৰ লগতে বহু শীৰ্ষ নেতাই নিৰ্বাচনী প্ৰচাৰত অংশ লোৱা দেখা গৈছে। তদুপৰি দুই এদিনতে মুখ্য মন্ত্ৰী সৰ্বানন্দ সোণোৱালকে ধৰি প্ৰভাৱশালী মন্ত্ৰী হিমন্ত বিশ্ব শৰ্মাই এটা ৰোড শ্ব’ ত অংশ ল’ব বুলি জানিব পৰা গৈছে।
আনহাতে সোণাৰী বিধান সভা সমষ্টিত নিৰ্বাচনী প্ৰচাৰত অংশ লৈ মৰিয়নী সমষ্টিৰ কংগ্ৰেছী বিধায়ক ৰূপজ্যোতি কুৰ্মীয়ে এক সংবাদ মেলত কেতবোৰ বিস্ফোৰক মন্তব্য আগবঢ়ায়।
তেওঁ কয় ‘বিজেপিয়ে ভুৱা প্ৰতিশ্ৰুতিৰে বিগত নিৰ্বাচন সমূহত ৰাইজক আভুৱা ভৰি শাসনৰ গাদী দখল কৰিছে। আৰু চৰকাৰৰ এটাৰ পাছত এটা মিছা কথা পোহৰলৈ আহিছে। ইয়াৰ পাছতো যদি বিজেপিয়ে উপ নিৰ্বাচনৰ চাৰিখন আসন দখল কৰে তেন্তে মই ৰাজনীতি ত্যাগ কৰিম’।
তেওঁ লগতে কংগ্ৰেছে উপ নিৰ্বাচনৰ চাৰিওখন আখন দখল কৰিব বুলি মন্তব্য কৰাৰ লগতে বিজেপি প্ৰাৰ্থী নৱনীতা সন্দিকৈৰ পৰিয়ালকো চোকা সমালোচনা কৰে।
সোণাৰী সমষ্টিৰ বিজেপিৰ প্ৰাৰ্থী নৱনীতা সন্দিকৈৰ পৰিয়াল শ্ৰমিকৰ মাটি দখলকাৰী বুলি বিস্ফোৰক মন্তব্য আগবঢ়ায় বিধায়ক গৰাকীয়ে।
