অহা ২১ অক্টোবৰত হ’বলগীয়া ৰাজ্যৰ চাৰিটা ৰাজ্যৰ চাৰিটা বিধানসভা সমষ্টিত অনুষ্ঠিত হ’বলগীয়া উপ নিৰ্বাচনৰ দিন প্ৰায় চমু চাপি আহিছে। চাৰিটা সমষ্টিত হ’ব লগীয়া উপ নিৰ্বাচনৰ অন্যতম গুৰুত্বপূৰ্ণ সমষ্টি হৈছে সোণাৰি সমষ্টি।
নিৰ্বাচনৰ প্ৰচাৰৰ বাবে এতিয়া ৰথী-মহাৰথীৰ ভিৰ বাঢ়িছে সোণাৰিত। প্ৰতিদিনে সোণাৰিলৈ আহিছে কংগ্ৰেছ-বিজেপি দুয়োটা দলৰ শীৰ্ষ নেতা।
আজি সোণাৰি সমষ্টিৰ কংগ্ৰেছ প্ৰাৰ্থী সুশীল চুড়ীৰ প্ৰচাৰৰ বাবে সোণাৰিত আহি উপস্থিত হয়হি দলটোৰ নেতা তথা নগাঁৱৰ সাংসদ প্ৰদ্যুৎ বৰদলৈ।
অসম চাহ মজদুৰ সংঘৰ সোণাৰি শাখা কাৰ্যালয়ত অনুষ্ঠিত হোৱা এখন প্ৰচাৰ সভাত অংশগ্ৰহণ কৰি নিজৰ ভাষণত জ্যেষ্ঠ কংগ্ৰেছী নেতা গৰাকীয়ে কয়, ‘সংখ্যাধিক্যৰ জোৰত বিজেপি দলৰ চৰকাৰে যি মন যায় তাকে কৰিছে।’
প্ৰাক্তন সাংসদ পৱন সিং ঘাটোৱাৰ, প্ৰাক্তন মন্ত্ৰী শৰৎ বৰকটকী, অসম প্ৰদেশ কংগ্ৰেছ কমিটীৰ সভাপতি ৰিপুন বৰাৰ উপস্থিতিত অনুষ্ঠিত সভাত বৰদলৈয়ে বিজেপিয়ে নিবনুৱা সমস্যা সমাধান কৰিবলৈ সক্ষম হোৱা নাই বুলি মন্তব্য কৰাৰ লগতে চিণ্ডিকেটত দলটোৰ বহু নেতা ব্যস্ত থকা বুলি অভিযোগ কৰে।
আনহাতে বিজেপি চৰকাৰৰ দিনত মূল্য বৃদ্ধি হৈছে, সম উন্নয়ন হোৱা নাই বুলি কোৱাৰ উপৰি কংগ্ৰেছ চৰকাৰৰ দিনৰ আঁচনি সমূহকে বিজেপিয়ে নতুন ৰূপ দিয়া বুলি তেওঁ কয়।