কংগ্ৰেছৰ সম্ভাৱ্য প্ৰাৰ্থীসকল অসমৰ চাৰিটা বিধান সভা সমষ্টিৰ উপ নিৰ্বাচনলৈ সাজু হৈ উঠিছে।
চাৰিটা সমষ্টিৰ উপ নিৰ্বাচনৰ নিৰ্বাচনী প্ৰস্তুতি ইতিমধ্যে সম্পূৰ্ণ কৰি তোলা হৈছে বুলি জানিবলৈ দিয়ে প্ৰদেশ কংগ্ৰেছৰ ৰাজ্যিক মুখপাত্ৰ ঋতুপৰ্ণ কোঁৱৰে।
কোঁৱৰে কয় ‘যোৱা ৬ মাহত চাৰিটা বিধানসভা সমষ্টিত দলীয় কাম-কাজ কৰি থকা হৈছে। আমি সম্পূৰ্ণৰূপে সাজু।’
ৰঙাপাৰা, সোণাৰী, জনিয়া আৰু ৰাতাবাৰী এই চাৰি সমষ্টিত অহা ২১ অক্টোবৰত অনুষ্ঠিত হ’ব উপ নিৰ্বাচন।
শাসনাধিস্থ বিজেপিৰ সমান্তৰালকৈ নিৰ্বাচনী যুঁজৰ বাবে সাজু হৈ উঠিছে বিৰোধী দল কংগ্ৰেছ।
উপ নিৰ্বাচনৰ পূৰ্বে ৰাজ্যিক কমিটিৰ কোনোধৰণৰ সাল-সলনি নকৰাকৈ প্ৰদেশ কংগ্ৰেছৰ সভাপতি ৰিপুণ বৰাৰ নেতৃত্বতে নিৰ্বাচনী ৰণক্ষেত্ৰত নামিব কংগ্ৰেছ।
নৰ্থইষ্ট নাওৰ সাংবাদিকৰে হোৱা কথা-বতৰাত এই কথা জানিবলৈ দিয়ে কোঁৱৰে।
‘উপ নিৰ্বাচনৰ পূৰ্বে ৰাজ্যিক কমিটীৰ কোনোধৰণৰ সাল-সলনি নহয়। এইবোৰ কিছুসংখ্যক মিডিয়াৰ দ্বাৰা সৃষ্ট বতৰা। ৰিপুণ বৰাৰ নেতৃত্বতে সকলো একত্ৰিত হৈ উপ নিৰ্বাচনত যুঁজ দিব।’ আমাৰ সাংবাদিকৰ আগত এইদৰে কয় কোঁৱৰে।
আনহাতে, এই উপ নিৰ্বাচনত কিদৰে ৰাইজৰ সমৰ্থন আদায় কৰি বিজেপি দলক পৰাভূত কৰিব তাৰো বৰ্ণনা কৰে কোঁৱৰে।
‘চৰকাৰখনে নিৰ্বাচনৰ পূৰ্বে দিয়া প্ৰতিশ্ৰুতি ভংগ কৰিছে, চিণ্ডিকেটৰাজ চলাই আছে, বিজ্ঞাপনত এই চৰকাৰ চলি আছে, বানপানীৰ ক্ষেত্ৰত কেন্দ্ৰীয় চৰকাৰৰ পৰা টকা অনাৰ ক্ষেত্ৰতে বিফল, পঞ্চায়ত ও গ্ৰামোন্নয়ন বিভাগত উন্নয়নৰ নামত কেন্দ্ৰীয় চৰকাৰে কোনো ধৰণৰ টকা দিব পৰা নাই।’ বিজেপি চৰকাৰৰ এইসমূহ দুৰ্বলতা লৈয়ে কংগ্ৰেছ দলটো ৰাইজৰ কাষ চাপিব বুলি কোঁৱৰে কয়।
ইপিনে, বিজেপি চৰকাৰ শাসনলৈ অহাৰ পাছৰে পৰা সাম্প্ৰদায়িক শক্তিসমূহে গা কৰি উঠা বুলি কোঁৱৰে মন্তব্য কৰে।
‘অতি দুৰ্ভাগ্যজনকভাৱে সাম্প্ৰদায়িক শক্তি এই চৰকাৰৰ দিনতে শক্তিশালী হৈ পৰিছে। অসমৰ ধৰ্ম নিৰপেক্ষ সমাজ ব্যৱস্থাত আঘাত হানি এই চৰকাৰৰ দিনতে সাম্প্ৰদায়িক বিষবাষ্প বিয়পা আৰম্ভ হৈছে। এই সাম্প্ৰদায়িকতাৰ বিৰুদ্ধে ৰাইজক সজাগ কৰি তুলিছে তথা এই ইছু লৈয়ো উপ নিৰ্বাচনত ৰাইজৰ কাষলৈ যাম।’ কোঁৱৰে কয়।
আনহাতে, উপ নিৰ্বাচনত প্ৰাৰ্থিত্ব প্ৰদান কৰিবলৈ আগ্ৰহ প্ৰকাশ কৰাসকলে অহা ২৩ চেপ্তেম্বৰৰ ভিতৰত জিলা কংগ্ৰেছ কমিটিৰ হাতত তেওঁলোকৰ আবেদনসমূহ দিব লাগিব বুলি জানিবলৈ দিয়ে দলটোৰ ৰাজ্যিক জ্যেষ্ঠ মুখপাত্ৰ অপূৰ্ব ভট্টাচাৰ্য্যই।
লগতে প্ৰাৰ্থীৰ ক্ষেত্ৰত কেনেধৰণৰ অগ্ৰাধিকাৰ দিয়া হ’ব সেই সম্পৰ্কেও তেওঁ উল্লেখ কৰে।
‘কংগ্ৰেছে এইবাৰ তৃণমূল পৰ্য্যায়ৰ কৰ্মীয়ে সমৰ্থন জনোৱা বা অগ্ৰাধিকাৰ দিয়া প্ৰাৰ্থীক উপ নিৰ্বাচনত থিয় কৰাব।’ আমাৰ সাংবাদিকৰ আগত ভট্টাচাৰ্য্যই কয়।
ইয়াৰোপৰি প্ৰাৰ্থিত্বৰ ক্ষেত্ৰত নতুন মুখক প্ৰাধান্য দিয়া হ’ব বুলি উল্লেখ কৰি ভট্টাচাৰ্য্যই লগতে কয় ‘জনপ্ৰিয়তা আৰু গ্ৰহণযোগ্যতাৰ ওপৰতো প্ৰাধান্য দিয়া হ’ব।’
ইপিনে, জ্যেষ্ঠসকলৰ সমান্তৰালকৈ নবীন প্ৰাৰ্থীৰো উপ নিৰ্বাচনত সমাহাৰ ঘটিব বুলি মন্তব্য কৰে ভট্টাচাৰ্য্যই।
আনহাতে, নাম প্ৰকাশত অনিচ্ছুক এক সূত্ৰই জানিবলৈ দিয়া মতে আটাইকেইটা সমষ্টিৰ ভিতৰত জনিয়া সমষ্টিতে আটাইতকৈ বেছি প্ৰাৰ্থীয়ে আবেদন জনোৱাৰ সম্ভাৱনা আছে।
ইয়াৰোপৰি ৰঙাপাৰা সমষ্টিৰ পৰা প্ৰাক্তন বিধায়ক ভীমানন্দ তাঁতী, অভিজিৎ হাজৰিকা, যুৱ প্ৰজন্মৰ প্ৰতিনিধি কাৰ্তিক কুৰ্মীয়ে টিকট বিচৰাৰ সম্ভাৱনা প্ৰকট বুলি এক সূত্ৰই আমাক জানিবলৈ দিয়ে।
তদুপৰি, সোণাৰিত শৰৎ বৰকটকী, উৎপল গগৈ, সুশীল চুৰিন, পদ্মা তাছা(মহিলা), ৰেণু সন্দিকৈকে ধৰি অন্য বহুসংখ্যকে টিকট বিচৰাৰ সম্ভাৱনা আছে।
জনিয়া সমষ্টিৰ পৰা টিকট বিচৰাৰ ক্ষেত্ৰত ব্লক সভাপতি আজগড় আলি আহমেদ, সমাজ সেৱক ড০ আশ্ৰাফুলকে ধৰি একুৰিতকৈ অধিক লোক আছে বুলি সূত্ৰটোৱে জানিবলৈ দিয়ে।
