কেন্দ্ৰৰ সংশোধিত নাগৰিকত্ব আইনক প্ৰত্যাহ্বান জনাই উচ্চতম ন্যায়ালয়ৰ কাষ চাপিছে বাওঁপন্থী যুৱ সংগঠন DYFI। বাওঁপন্থী যুৱ সংগঠনসমূহে অভিযোগ কৰিছিল যে কেৱল ধৰ্মৰ ভিত্তিত নাগৰিকত্ব প্ৰদান কৰাটো ভাৰতীয় সংবিধান বিৰুদ্ধ।
সোমবাৰে কেন্দ্ৰীয় গৃহ মন্ত্ৰালয়ে এই আইন কাৰ্যকৰী কৰাৰ বাবে এক অধিসূচনা জাৰি কৰে। ইতিমধ্যে কেইবাখনো ৰাজ্যই এই আইন বিৰোধিতা কৰিছে।
এই আইনখন শীঘ্ৰে বন্ধ কৰাৰ দাবীত বাওঁ যুৱ সংগঠন ডিৱাইএফআই উচ্চতম ন্যায়ালয়ৰ কাষ চাপিছে।
ডিৱাইএফআইয়ে আদালতত কয় যে আফগানিস্তান, বাংলাদেশ আৰু পাকিস্তানৰ হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টানসকলক ভাৰতত নাগৰিকত্ব দিবলৈ বিচৰা হৈছে। এইদৰে ধৰ্মৰ ভিত্তিত বিভাজন কৰি ভাৰতৰ সংবিধানৰ ১৪ আৰু ২১ নং অনুচ্ছেদ উলংঘা কৰা হৈছে। কেন্দ্ৰৰ এই নীতিয়ে সংবিধানত থকা ‘ধৰ্মনিৰপেক্ষতা’ শব্দটোক ভেঙুচালি কৰিছে।
এই প্ৰসংগত ডি ৱাই এফ আইৰ নেতা মীনাক্ষী মুখাৰ্জীয়ে কয়, “যদি বিজেপিয়ে ভাবে যে CAA প্ৰয়োগ কৰি দুখীয়া মানুহৰ দৈনন্দিন সংগ্ৰামৰ বিষয়টো সলনি হ’ব, তেন্তে সেয়া ভুল। বাওঁপন্থীসকলে ইয়াৰ আগতেও যুঁজিছে আৰু এতিয়াও যুঁজি আছে। আদালতৰ লগতে ৰাজপথতো এই যুঁজ অব্যাহত থাকিব।”
ইয়াৰ পূৰ্বে চিপিআইএমৰ সাধাৰণ সম্পাদক সীতাৰাম য়েচুৰীয়ে কয় যে CAA কাৰ্যকৰী কৰা হৈছে যাতে সংবাদ মাধ্যমৰ প্ৰাইম টাইমত নিৰ্বাচনী বণ্ডৰ বিষয়ে আলোচনা নহয়। দৰাচলতে উচ্চতম ন্যায়ালয়ৰ নিৰ্বাচনী বণ্ডৰ ৰায়ত স্তম্ভিত হৈ পৰিছে মোডী চৰকাৰ।
সোমবাৰৰ পৰা সমগ্ৰ দেশতে কাৰ্যকৰী হ’ল নাগৰিকত্ব (সংশোধনী) আইন, ২০১৯। CAA আইনত পৰিণত হোৱাৰ ৪ বছৰৰ পাছত কেন্দ্ৰীয় গৃহ মন্ত্ৰালয়ে কাৰ্যকৰী কৰিছে। সন্মুখত আছে লোকসভা নিৰ্বাচন। ইয়াৰ পূৰ্বে মোডী চৰকাৰে এক অধিসূচনা জাৰি কৰি চমক সৃষ্টৰ উদ্দেশ্যেৰে CAA প্ৰৱৰ্তন কৰিছে।
