চেৰাপুঞ্জীত পৰ্য্যটক লৈ যোৱা অসমৰ ইনোভা চালকক দুৰ্বৃত্তৰ আক্ৰমণ
মেঘালয়ৰ চেৰাপুঞ্জীলৈ পৰ্য্যটক লৈ যোৱা এজন অসমৰ ইনোভা চালকক আক্ৰমণৰ ঘটনা সংঘটিত হৈছে। কেইবাজনীয়া দুৰ্বৃত্তৰ দলে আক্ৰমণ কৰে অংকুৰ মজুমদাৰ নামৰ ইনোভা চালকজনক।
উল্লেখযোগ্য যে যোৱা ২৫ নৱেম্বৰৰ সন্ধিয়া প্ৰায় ৭ বজাত এই ঘটনা সংঘটিত হৈছিল যদিও আজিহে ঘটনাটো পোহৰলৈ আহিছে।
জানিব পৰা মতে চেৰাপুঞ্জীৰ চোহৰাৰ এটা পেট্ৰ’ল পাম্পত গাড়ীত তেল ভৰাই থকা অৱস্থাত এই ঘটনা সংঘটিত হৈছিল। আক্ৰমণকাৰী দলটোৱে প্ৰথমতে চালকজনক মদ খাবলৈ ধন দাবী কৰিছিল বুলি যুৱকজনে অভিযোগ কৰে।
কিন্তু দাবী কৰা ধন নিদিয়াৰ বাবেই মাৰধৰ কৰাৰ লগতে পিন্ধি থকা চোলা ফালি দিয়ে। আক্ৰমণত অংকুৰ গুৰুতৰভাৱে আহত হয়।
ইপিনে, ঘটনা সন্দৰ্ভত ভুক্তভোগী চালকজনে কালি মেঘালয়ৰ চোহৰা থানাত এখন এজাহাৰ দাখিল কৰে। অৱশ্যে আৰক্ষীয়ে এই পৰ্য্যন্ত এজনো দুৰ্বৃত্তক কৰায়ত্ব কৰিবলৈ সক্ষম হোৱা নাই।
উক্ত ঘটনাৰ পাছতে নৰ্থ-ইষ্ট নাওলৈ এটা ভিডিঅ’ প্ৰেৰণ কৰি প্ৰতিক্ৰিয়া প্ৰকাশ কৰিছে সদৌ অসম কেব অপাৰেটৰ সন্থাৰ সভাপতি ইচমাইল আলীয়ে।
‘মই চৰকাৰক অনুৰোধ জনাওঁ যাতে চালকসকলে সুৰক্ষিতভাৱে উত্তৰ-পূৰ্বত পৰ্য্যটকসকলক লৈ যাব পাৰো তাৰ ব্যৱস্থা কৰিব লাগে।‘ আলীয়ে এইদৰে কয়।
তদুপৰি এই সমগ্ৰ ঘটনা সন্দৰ্ভত শণিবাৰে অসম আৰক্ষীৰ সঞ্চালক প্ৰধান আৰু মুখ্য মন্ত্ৰী সৰ্বানন্দ সোণোৱাললৈ স্মাৰক পত্ৰ প্ৰেৰণ কৰিব সদৌ অসম কেব অপাৰেটৰ সন্থাই।
উল্লেখ কৰিব পাৰি যে প্ৰতিদিনেই অসমৰ পৰা গাড়ী ভাড়ালৈ লৈ দেশ বিদেশৰ পৰ্য্যটক মেঘালয়লৈ যায়। কিন্তু এইদৰে পৰ্য্যটক লৈ যোৱা বাহনৰ চালকক ধন দাবী আৰু দুৰ্বৃত্তৰ আক্ৰমণৰ ঘটনা অতি দুৰ্ভাগ্যজনক।