অসমকে ধৰি উত্তৰ-পূবৰ দল-সংগঠনে নাগৰিকত্ব বিধেয়কক লৈ প্ৰতিবাদ কৰি অহাৰ মাজতে কেন্দ্ৰই সংসদত ইয়াক উত্থাপনৰ বাবে প্ৰস্তুতি সম্পূৰ্ণ কৰিছে।
খবৰমতে, বিজেপিৰ সংসদীয় উপ দলপতি ৰাজনাথ সিঙে নাগৰিকত্ব বিধেয়ক উত্থাপনৰ সময়ত সদনত উপস্থিত থকা বাবে দলৰ সকলো সাংসদকে মঙলবাৰে নিৰ্দেশ দিছে।
খবৰমতে, প্ৰধান মন্ত্ৰী মোদী একাংশ বিজেপি সাংসদৰ সদনত অনিয়মীয়া উপস্থিতিক লৈ ক্ষুব্ধ হৈছে। আৰু মঙলবাৰে নতুন দিল্লীত দলটোৰ সংসদীয় গোটৰ বৈঠকত এই কথা আলোচনা হৈছে।
গৃহ মন্ত্ৰী অমিত শ্বাহে সংসদত বিধেয়কখন উত্থাপন কৰাৰ সময়ত সৰ্বোচ্চসংখ্যক নিজা সাংসদৰ উপস্থিতি শাসক দলটোৱে নিশ্চিত কৰিব খুজিছে।
প্ৰতিৰক্ষা মন্ত্ৰী সিঙে বিধেয়কখন জম্মু-কাশ্মীৰ বিষয়ক সংবিধানৰ ৩৭০নং অনুচ্ছেদ বাতিলৰ দৰেই অতি গুৰুত্বপূৰ্ণ বুলি সাংসদসকললৈ বাৰ্তা প্ৰেৰণ কৰিছে।
উত্তৰ-পূবত প্ৰতিবাদৰ সন্মুখীন হোৱা কেবৰ লগতে আন কেইবাখনো গুৰুত্বপূৰ্ণ বিধেয়ক ১৩ ডিচেম্বৰলৈকে চলিব লগা শীতকালীন অধিৱেশনতে চৰকাৰে গৃহীত কৰোৱাৰ কথা।
গৃ্হ মন্ত্ৰী শ্বাহে উত্তৰ-পূবৰ ৰাজনৈতিক নেতা, নাগৰিক সমাজৰ প্ৰতিনিধি, ছাত্ৰ নেতাকে ধৰি বিভিন্ন অংশীদাৰীৰ সৈতে দিল্লীত কেবক লৈ এলানি আলোচনা চলাই আছে।
ভাৰতৰ নাগৰিকত্ব আইন, ১৯৫৫ত সংশোধনী আনিব খোজা বিধেয়কখন ২০১৬ত তদানীন্তন গৃহ মন্ত্ৰী ৰাজনাথ সিঙে প্ৰথমে উত্থাপন কৰিছিল।
চলিত লোক সভা অধিৱেশনত উত্থাপন হ’ব লগা বিধেয়ক পূৰ্বতকৈ পৃথক হ’ব বুলি চৰকাৰী পক্ষই সদৰী কৰি আহিছে যদিও তাৰ কোনো স্পষ্ট ৰূপ ৰাজহুৱা হোৱা নাই।
নাগৰিকত্ব বিধেয়ক, ২০১৬ই ভাৰতৰ চুবুৰীয়া পাকিস্তান, বাংলাদেশ আৰু আফগানিস্তানৰ অমুছলমান ধৰ্মীয় সংখ্যালঘু (হিন্দু, বৌদ্ধ, জেন, পাৰ্ছি, শিখ আৰু খ্ৰীষ্টান)ৰ ভাৰতীয়কৰণৰ চৰ্ত শিথিল কৰিব খুজিছিল।
বিজেপি নেতৃত্বাধীন যোৱা চৰকাৰে লোক সভাত বিধেয়কখন গৃহীত কৰিছিল যদিও ইয়াক ৰাজ্য সভাত দাখিলৰ পৰা অন্তিম মুহূৰ্তত বিৰত আছিল।
বিধেয়কক লৈ গঠিত যুটীয়া সংসদীয় সমিতিয়ে ইয়াক গৃহীত কৰাৰ বাবে যোৱা জানুৱাৰিত পৰামৰ্শ আগবঢ়াইছিল।
“যুটীয়া সংসদীয় সমিতিয়ে পৰামৰ্শ দিয়ে যে সংশোধন কৰা ৰূপত বিধেয়কখন গৃ্হীত কৰিব লাগে আৰু আন মন্তব্য/ পৰামৰ্শসমূহ বিবেচনা কৰিব লাগে,” যোৱা ৪ জানুৱাৰিত অধ্যক্ষ ৰাজেন্দ্ৰ অগ্ৰৱালে স্বাক্ষৰ কৰা প্ৰতিবেদনত উল্লেখ।
বিধেয়কখন গ্ৰহণৰ “ৰাষ্ট্ৰীয় প্ৰতিশ্ৰুতি” আগবঢ়োৱা বিজেপি বৰ্তমান উচ্চ, নিম্ন দুয়ো সদনতে সৰ্বাধিক সদস্য থকা দল।
বিৰোধী কংগ্ৰেছে শ্বাহৰ বৈঠক বয়কট কৰিছে। অন্তিমবাৰ বিধেয়কখন সদনত উত্থাপন হওঁতে কংগ্ৰেছে ইয়াৰ বিৰোধিতা কৰিছিল।
কংগ্ৰেছৰ পৰা চি পি আই (এম)লৈকে দলসমূহে সদনত বিধেয়কখনৰ বিৰোধিতাৰ আশ্বাস দি আহিছে।
বিৰোধী দলকেইটাই তেওঁলোকৰ শাসনাধীন ৰাজ্যৰ চৰকাৰ (যেনে– ৰাজস্থান, কেৰালা)ৰপৰা বিধেয়কৰ বিৰুদ্ধে কেন্দ্ৰক কোনো প্ৰস্তাৱ দিয়াৰ খবৰ পোৱা হোৱা নাই।
সংখ্যাৰ জোৰত বিজেপি চৰকাৰে বিধেয়কখন পাছ কৰিব বুলি অসমৰ বহু প্ৰতিবাদীয়ে আশংকা কৰিছে আৰু উচ্চতম ন্যায়ালয়ত আইনী যুঁজ চলোৱাৰ বাবে সাজু হৈছে।
প্ৰতিবাদকাৰীসকলে “ভাৰতীয় সংবিধান আৰু মৌলিক অধিকাৰ” খৰ্বকাৰী বুলি অভিহিত কৰা বিধেয়কখন গ্ৰহণ হ’লেও উচ্চতম ন্যায়ালয়লৈ যোৱাৰ এক পথ থাকিব।
সংসদে বিধেয়ক গৃহীতকৰণেৰে যুগুত কৰা আইনৰ সাংবিধানিক বৈধতাক ভাৰতৰ উচ্চতম ন্যায়ালয়ত প্ৰত্যাহ্বান জনোৱাৰ ব্যৱস্থা আছে।
উত্তৰ-পূবৰ বিধেয়কবিৰোধী প্ৰতিবাদী সংগঠনসমূহে কোনো ৰূপতেই ইয়াক গ্ৰহণ নকৰে বুলি ভাৰত চৰকাৰক জনাই আহিছে।
