সাহস! চিণ্ডিকেট ৰাজৰ বিৰুদ্ধে তৎপৰ কাছাৰৰ নতুন আৰক্ষী অধীক্ষক আই পি এছ বৈভৱ

কাছাৰৰ আৰক্ষী অধীক্ষক আই পি এছ বৈভৱে ছিণ্ডিকেটৰ বিৰুদ্ধে অভিযান আৰম্ভ কৰিছে ৷ দায়িত্ব গ্ৰহণৰ পাছতে ১৩ খন অবৈধ চূন-শিল ভৰ্ত্তি ট্ৰাক জব্দ কৰিছে কাছাৰ নতুন আৰক্ষী অধীক্ষক বৈভৱ চন্দ্রকান্ত নিম্বালকৰে।

বিগত কেইবাবছৰো ধৰি কয়লা, সাৰ, চুপাৰিৰ ৰমৰমীয়া ব্যৱসায়ৰ লগতে কাছাৰত চলি আছিল চূন-শিলৰ ছিণ্ডিকেটৰাজ ৷ যাৰ বাবে প্ৰতিদিনেই শতাধিক চূন-শিল ভৰ্তি ট্ৰাকে অবৈধভাৱে মেঘালয়ৰ পৰা কাছাৰৰ দিগৰখাল হৈ বৰাক উপত্যকাত প্ৰৱেশ কৰি আহিছে ৷

তদুপৰি, প্ৰতিখন ট্ৰাকত থাকে অতিৰিক্ত বোজা ৷ মেঘালয়ৰ পৰা অহা চূন-শিল নিয়া ট্ৰাকৰ কেইবাবছৰো ধৰি কাছাৰত গঢ়ি উঠিছে এক বৃহৎ ছিণ্ডিকেট ৷

ছিণ্ডিকেট চক্ৰটোৱে অবৈধ ট্ৰাকসমূহ বৰাকৰ বিভিন্ন স্থানৰ লগতে কৰিমগঞ্জ হৈ বাংলাদেশতো এই বেহা বিস্তাৰ কৰি আহিছে ৷ যাৰফলত অবৈধভাৱে এক বিৰাট অংকৰ ধন সংগ্ৰহ কৰি আহিছে ছিণ্ডিকেট চক্ৰটোৱে ৷

বিগত কেইবা বছৰো ধৰি বৰাক উপত্যকাত চূন-শিলৰ ৰমৰমীয়া ব্যৱসায় চলি থকাৰ পৰিপ্ৰেক্ষিতত কোনেও আজিলৈকে এই ছিণ্ডিকেটৰ বিৰুদ্ধে একো ব্যৱস্থা গ্ৰহণ কৰা দেখা নগৈছিল ৷

কিন্তু, কাছাৰত চলি থকা এই চূন-শিল ছিণ্ডিকেটৰ বিৰুদ্ধে এইবাৰ অভিযানত নামিছে কাছাৰৰ নতুন আৰক্ষী অধীক্ষক নিম্বালকৰ ৷

বৃহস্পতিবাৰে তেওঁ হঠাৎ অসম মেঘালয়ৰ সীমান্তৱৰ্তী দিঘৰখালত এই ছিণ্ডিকেটৰ বিৰুদ্ধে অভিযান চলাই ১৩ খন অবৈধ চূন-শিল ভৰ্তি ট্ৰাক জব্দ কৰাৰ লগতে ট্ৰাক কেইখনৰ চালককো কৰায়ত্ত কৰে ৷

জানিব পৰা মতে, জব্দ হোৱা ট্ৰাককেইখনৰ কোনো বৈধ নথিপত্ৰ নথকাৰ লগতে ট্ৰাক কেইখনে অত্যাধিক বোজা কঢ়িয়াইছিল ৷ আৰক্ষী অধীক্ষক বৈভৱ নিম্বালকৰৰ এনে হঠাৎ অভিযানত ছিণ্ডিকেট চক্ৰত তীব্ৰ জোকাৰণি সৃষ্টি হৈছে ৷

আনহাতে, কাছাৰ আৰক্ষী অধীক্ষকগৰাকীৰ ছিণ্ডিকেটৰ বিৰুদ্ধে এনে পদক্ষেপক স্থানীয় ৰাইজে ভূয়সী প্ৰশংসা কৰাৰ লগতে বিষয়াগৰাকীৰ পদক্ষেপক বিভিন্ন মহলে আদৰণি জনাইছে ৷ লগতে এই অভিযান অব্যাহত ৰখাৰ বাবে বিষয়াগৰাকীক আহ্বান জনাইছে।