দীৰ্ঘদিনীয়া বিবাদৰ পাছত আশংকা কৰাৰ দৰেই ৰাছিয়াই ইউক্ৰেন আক্ৰমণ কৰাৰ পিছতে যুদ্ধৰ ভয়াৱহতাক লৈ উদ্বিগ্ন হৈ পৰিছে সমগ্ৰ বিশ্ব। যুদ্ধৰ ভয়াৱহতাৰ প্ৰতি লক্ষ্য ৰাখি তাৎক্ষণিক যুদ্ধবিৰতিৰ বাবে আহ্বান জনাইছে ভাৰতে।
ৰাছিয়া আৰু ইউক্ৰেইনৰ মাজত বিবাদ নিষ্পত্তি নহ’লে সমগ্ৰ অঞ্চলটোক গুৰুতৰভাৱে অস্থিৰ কৰি তুলিব পৰা এক ডাঙৰ সংকটৰ সৃষ্টি হ’ব বুলি আশংকা প্ৰকাশ কৰিছে ভাৰতে।
ৰাষ্ট্ৰসংঘত ভাৰতৰ স্থায়ী প্ৰতিনিধি টি এছ তিৰুমূৰ্তিয়ে কয়, “এই পৰিস্থিতি যিকোনো মুহূৰ্ততে এক ডাঙৰ সংকটত পৰিণত হোৱাৰ আশংকা আছে। আমি এই পৰিস্থিতিক লৈ গভীৰ উদ্বেগ প্ৰকাশ কৰিছো। ক্ৰমাৎ চৰম অৱস্থাত পৰিণত হোৱাৰ পূৰ্বেই সাৱধানে চম্ভালি নল’লে অঞ্চলটোৰ শান্তি আৰু নিৰাপত্তা হ্ৰাস হ’ব পাৰে।”
তেওঁ লগতে দুয়োপক্ষৰ নিৰাপত্তাৰ বিষয়ে বিবেচনা কৰি তাৎক্ষণিকভাৱে যুদ্ধবিৰতিৰ আহ্বান জনায় । তদুপৰি পৰিস্থিতিৰ অৱনতি ঘটিব পৰা যিকোনো পদক্ষেপ গ্ৰহণৰ পৰা বিৰত থাকিবলৈ দেশ দুখনক আহ্বান জনায় তিৰুমূৰ্তিয়ে।
সংযম অৱলম্বন কৰি দুয়ো পক্ষই শান্তি আৰু নিৰাপত্তা বজাই ৰখাৰ প্ৰয়োজনীয়তাৰ ওপৰত গুৰুত্ব আৰোপ কৰি তিৰুমূৰ্তিয়ে কয় যে কূটনৈতিক আলোচনাৰ মাজেৰেহে সমস্যা সমাধান সম্ভৱ হ’ব।
ইউক্ৰেইনৰ বিভিন্ন অঞ্চলত বাস কৰা ভাৰতীয় নাগৰিকসকলক বিশেষ বিমানৰ জৰিয়তে দেশলৈ উভতি অহাত সহায় কৰি থকা হৈছে বুলিও তিৰুমূৰ্তিয়ে লগতে উল্লেখ কৰে।
