‘বন্ধ’ দিলে জেইলৰ ভাত খাবলগীয়া হ’ব পাৰে অসমত
এতিয়াৰ পৰা ‘অসম বন্ধ’ ঘোষণা কৰিলে কাৰাগাৰলৈ যাবলগীয়া হ’ব পাৰে। কাৰণ ‘বন্ধ’ক নিষিদ্ধ কৰি গুৱাহাটী উচ্চ ন্যায়ালয়ে প্ৰদান কৰিছে এক গুৰুত্বপূৰ্ণ ৰায়।
মঙলবাৰে গুৱাহাটী উচ্চ ন্যায়ালয়ৰ ন্যায়াধীশ উজ্জ্বল ভূঞাৰ খণ্ড বিচাৰপীঠে এই ৰায় প্ৰদান কৰি যিকোনো ধৰণৰ বন্ধ ঘোষণা কৰা কাৰ্যক ‘অবৈধ’ আৰু ‘অসাংবিধানিক’ আখ্যা দিয়ে। লগতে বন্ধ ঘোষণা কৰা সংগঠনৰ বিৰুদ্ধে প্ৰশাসনক তাৎক্ষণিক ব্যৱস্থা গ্ৰহণৰো নিৰ্দেশ দিয়ে।
‘বন্ধ’ সম্পৰ্কীয় উচ্চ ন্যায়ালয়ৰ এই ৰায়টোত কোৱা হৈছে যে কোনো সংগঠনে প্ৰতিবাদৰ নামত অসম বন্ধকে ধৰি জিলা, মহকুমা বা কোনো অঞ্চলত বন্ধ ঘোষণা কৰিলে সেই সংগঠনৰ বিৰুদ্ধে জিলাৰ আৰক্ষী অধীক্ষকে ২৪ ঘন্টাৰ ভিতৰত গোচৰ ৰুজু কৰিব লাগিব।
বন্ধত হোৱা সকলো ক্ষয়-ক্ষতিৰ ক্ষতিপূৰণ বন্ধ দিয়া সংগঠনেই বহন কৰিব লাগিব বুলিও আদালতে ৰায় দিয়ে।
কেৱল বন্ধই নহয় পথ অৱৰোধ, ৰেল অৱৰোধো কৰিব নোৱাৰিব কোনো সংগঠনে। অন্যথা একেই পৰিণাম হ’ব বুলিও ন্যায়ালয়ে ৰায়দান কৰে।
আৰক্ষী অধীক্ষকে গোচৰ ৰুজু কৰাৰ উপৰিও এই সন্দৰ্ভত ৰাজ্য চৰকাৰৰ গৃহ আৰু ৰাজনৈতিক বিভাগক এমাহৰ ভিতৰত ইয়াৰ প্ৰতিবেদন দাখিল কৰিব লাগিব বুলিও ৰায়টোত কোৱা হৈছে।
একেদৰে গৃহ আৰু ৰাজনৈতিক বিভাগে কোনো সংগঠনে দিয়া ‘বন্ধ’ৰ ক্ষয়-ক্ষতিসহ সবিশেষ তথ্য উচ্চ ন্যায়ালয়ত দাখিল কৰিব লাগিব।
উল্লেখ্য যে, ২০১৩ চনতে গুৱাহাটী উচ্চ ন্যায়ালয়ত ‘বন্ধ’ৰ বিৰুদ্ধে এক ৰাজহুৱা স্বাৰ্থজৰিত আবেদন দাখিল হৈছিল। এই আবেদনৰ বিচাৰ প্ৰক্ৰিয়া চলাই ন্যায়ালয়ে অসম চৰকাৰৰ পৰা শপতনামা বিচাৰিছিল যদিও সুদীৰ্ঘ প্ৰায় ৬ বছৰে চৰকাৰে শপতনামা দাখিল কৰা নাছিল। অৱশেষত উচ্চ ন্যায়ালয়ে নিজাববীয়াকৈ এই সিদ্ধান্ত গ্ৰহণ কৰে।