নোটৰ পৰা মাৰাত্মক ক’ৰ’না ভাইৰাছ সংক্ৰমণ হ’ব পাৰে নেকি? কি কয় বিশ্বৰ গষেৱক সংস্থাবোৰে!
পূৰ্বৰ কিছু অধ্যয়নে নোটৰ পৰা কিছুমান ৰোগৰ বীজাণু বিয়পাৰ সম্ভাৱনাৰ কথা ব্যক্ত কৰি আহিছে।
এতিয়া প্ৰশ্ন হৈছে সমগ্ৰ বিশ্বতে মাৰাত্মক ৰূপ ধাৰণ কৰা মহামাৰী ক’ৰ’না ভাইৰাছৰ বীজাণুৱেও নোটৰ যোগেদি মানুহলৈ সংক্ৰমিত হয় নেকি?
তাকে লৈ কেৱল ভাৰততে নহয় বিশ্বৰ বিভিন্ন দেশৰ লগতে বিশ্ব স্বাস্থ্য সংস্থাতো চৰ্চা লাভ কৰা দেখা গৈছে।
২০১৮ বৰ্ষত প্ৰকাশিত ইন্টাৰনেশ্যনেল জাৰ্ণেল অৱ কাৰেণ্ট ইঞ্জিনিয়াৰিং এণ্ড ছাইনটিফিক ৰিৰ্চাছে মহাৰাষ্ট্ৰৰ বিভিন্ন স্থানৰ পৰা সংগ্ৰহ কৰা ১০০, ৫০, ২০ আৰু ১০ টকীয়া নোটৰ ওপৰত কৰা অধ্যয়নৰ এখন প্ৰতিবেদনত এই সম্ভাৱনাৰ কথা প্ৰকট কৰিছিল।
২০১৫ বৰ্ষত ইণ্ডিয়ান জাৰ্ণেল অৱ মেডিকেল এণ্ড পাব্লিক হেল্থত প্ৰকাশিত এখন প্ৰতিবেদনত কোৱা হৈছে যে নোট আৰু ক’ইনছৰ দ্বাৰা কিছুমান ৰোগৰ বীজাণু, বেক্টেৰিয়া আদি সংক্ৰমিত হয়।
২০১৪ বৰ্ষত নিউয়ৰ্ক বিশ্ববিদ্যালয়ে এনে ৩০০০ বেক্টেৰিয়াৰ চিনাক্ত কৰিছিল যিবোৰে ড’লাৰ জৰিয়তে মানুহৰ হাতেৰে সংক্ৰমিত হয়।
বৰ্তমানেও নোট তথা ক’ইনছৰ দ্বাৰা ক’ৰ’না ভাইৰাছ সংক্ৰমণ বা বিয়পিব পাৰে নেকি তাৰ অধ্যয়ন চলাই থকা হৈছ। অৱেশ্যে এই বিষয়ে এতিয়াও কোনো নিশ্চিত হোৱা নাই যে ইয়াৰ দ্বাৰা ক’ৰ’না ভাইৰাছ সংক্ৰমিত হয় বা বিয়পে।
কিন্তু সংবাদ প্ৰতিষ্ঠান ৰয়টাৰে কিছুদিন আগতে বাতৰি প্ৰকাশ কৰিছে যে ইউ এছ ফেডাৰেল ৰিজাৰ্ভে এছিয়াৰ দেশসমূহৰ লগত চলি থকা বিত্তীয় ব্যৱস্থাৰে যাতে বীজাণু সংক্ৰমণ নহয় তাৰ বাবে বিজ্ঞপ্তি জাৰি কৰিছিল।
ইউ এছ চেন্টাৰ ফৰ ডিজিছ কন্ট্ৰল এণ্ড প্ৰিভেনচন (CDC)এ কৈছে যে প্ৰত্যক্ষ সংস্পৰ্শ বা স্পৰ্শৰ দ্বাৰাহে ইয়াৰ সংক্ৰমণৰ সম্ভাৱনা অধিক। অৰ্থাৎ মানুহৰ পৰা মানুহলৈ ই বিয়পিব পাৰে!
ব্ৰিটিছ মিডিয়াই WHO ৰ উদ্ধৃতি দি বাতৰি পৰিৱেশন কৰিছে যে নোট তথা মুদ্ৰা আদান প্ৰদান কৰাটো বিপদজনকো হ’ব পাৰে! যিমান দূৰ সম্ভৱ কন্টেকলেছ পেমন্ট কৰিবলৈ WHO এ পৰামৰ্শ দিছে বুলি ব্ৰিটিছ সংবাদ মাধ্যমত প্ৰকাশ।
উল্লেখ্য যে, চাবোনেৰে হাত ধুই ক’ৰ’না ভাইৰাছক প্ৰতিৰোধ কৰাটোৱেই হৈছে সৰ্বোত্তম পন্থা।
