আমেৰিকাৰ ৰাষ্ট্ৰপতি ড’নাল্ড ট্ৰাম্পে কানাডাৰ সামগ্ৰীৰ ওপৰত ২৫ শতাংশ শুল্ক আৰোপ কৰাৰ সিদ্ধান্তৰ প্ৰত্যুত্তৰ দিছে কানাডাৰ প্ৰধানমন্ত্ৰী জাষ্টিন ট্ৰুডোৱে। শনিবাৰে সন্ধিয়া (১ ফেব্ৰুৱাৰী) দিয়া ভাষণত তেওঁ ঘোষণা কৰে যে কানাডাইও আমেৰিকাৰ সামগ্ৰীৰ ওপৰত ওলোটাই ২৫ শতাংশ শুল্ক আৰোপ কৰিব।
তেওঁৰ ভাষণত ট্ৰুডোৱে কয় যে, “টিম কানাডা, আমি সকলোৱে একত্ৰিত, উপকূলৰ পৰা উপকূললৈ।” তেওঁ দেশৰ নাগৰিকসকলক স্থানীয় পণ্য সামগ্ৰী কিনাৰ লগতে ভ্ৰমণৰ বাবে দেশৰ আকৰ্ষণীয় স্থানসমূহ বাচি ল’বলৈ আহ্বান জনায়।
ট্ৰুডোৰ এই ঘোষণাৰ জৰিয়তে ১৫৫ বিলিয়ন ডলাৰৰ আমেৰিকাৰ সামগ্ৰী বিশেষকৈ নিত্য ব্যৱহাৰ্য সামগ্ৰীৰ ওপৰত ২৫ শতাংশ শুল্ক আৰোপ কৰা হ’ব। কানাডাৰ বিভিন্ন ৰাজনৈতিক দলে এই পদক্ষেপক সমৰ্থন কৰিছে।
কেৱল কানাডাৰ সামগ্ৰীৰ ওপৰতে নহয়, মেক্সিকান সামগ্ৰীৰ ওপৰতো ২৫ শতাংশ শুল্ক আৰু চীনৰ সামগ্ৰীৰ ওপৰত ১০ শতাংশ শুল্ক ঘোষণা কৰিছে ট্ৰাম্প প্ৰশাসনে। অৱশ্যে কানাডাৰ তেল আমদানিৰ ওপৰত বিশেষভাৱে ১০ শতাংশ শুল্ক আৰোপ কৰা হৈছে, যিটো মঙলবাৰৰ পৰা (৪ ফেব্ৰুৱাৰী) কাৰ্যকৰী হ’ব।
কানাডাৰ ব্যৱসায় আৰু অৰ্থনৈতিক বিশেষজ্ঞসকলে এই শুল্কক লৈ উদ্বেগ প্ৰকাশ কৰিছে। কানাডাৰ চেম্বাৰ অৱ কমাৰ্চ ইণ্ডাষ্ট্ৰীৰ মতে, এই শুল্কই কাৰণে কানাডাৰ অৰ্থনীতিৰ জিডিপি ২.৬ শতাংশ হ্ৰাস কৰিব পাৰে। ইয়াৰ উপৰি সাধাৰণ কানাডাৰ নাগৰিকৰ বাৰ্ষিক খৰচ প্ৰায় ১৯০০ ডলাৰ বৃদ্ধি পাব বুলি আশংকা কৰা হৈছে।
ট্ৰুডোৱে ওলোটা শুল্ক আৰোপ কৰাৰ সিদ্ধান্তক দেশৰ জনসাধাৰণে ইতিবাচকভাৱে গ্ৰহণ কৰিছে। বহুতে বিশ্বাস কৰে যে ট্ৰুডোৰ এই সাহসী পদক্ষেপে তেওঁৰ নেতৃত্বৰ শক্তি প্ৰমাণ কৰে। ট্ৰাম্প প্ৰশাসনৰ শুল্ক নীতিয়ে আন্তঃৰাষ্ট্ৰীয় বাণিজ্য সম্পৰ্কত কি প্ৰভাৱ পেলাব সেই সম্পৰ্কে এতিয়াও চৰ্চা অব্যাহত আছে।
