উত্তৰ প্ৰদেশ চৰকাৰক আজি লখিমপুৰ খেৰীত সংঘটিত হত্যাকাণ্ড সন্দৰ্ভত তীব্ৰ ভৎসনা কৰিছে দেশৰ উচ্চতম ন্যায়ালয়ে।
উত্তৰ প্ৰদেশ চৰকাৰক সকলো সাক্ষীৰ বিবৃতি সুৰক্ষিত আৰু লিপিবদ্ধ কৰিবলৈ নিৰ্দেশ দি উচ্চতম ন্যায়ালয়ে লগতে কয়, “খেৰী ঘটনাক এটা অন্তহীন কাহিনীৰ ৰূপ দিব নালাগে।”
কেন্দ্ৰীয় মন্ত্ৰী অজয় মিশ্ৰৰ পুত্ৰ আশীষ মিশ্ৰৰ বিৰুদ্ধে ৩ অক্টোবৰত এক প্ৰতিবাদৰ সময়ত চাৰিজন কৃষকক গাড়ীৰে মহতীয়াই হত্যা কৰাৰ অভিযোগ আছে।
উচ্চতম ন্যায়ালয়ে গোচৰটোত উত্তৰ প্ৰদেশ চৰকাৰৰ ভূমিকাৰত অসন্তুষ্টি প্ৰকাশ কৰাৰ তিনিদিন পিছত ১১ অক্টোবৰত আশীষ মিশ্ৰক গ্ৰেপ্তাৰ কৰা হৈছিল।
উচ্চতম ন্যায়ালয়ে যোগী আদিত্যনাথ চৰকাৰক খেৰীৰ আঠজন লোকৰ হত্যাৰ ঘটনাটোত কিমানজনক গ্ৰেপ্তাৰ কৰা হৈছে আৰু কি অভিযোগত গ্ৰেপ্তাৰ কৰা হৈছে সেই বিষয়ে প্ৰতিবেদন দাখিল কৰিবলৈ নিৰ্দেশ দিছিল।
উত্তৰ প্ৰদেশ চৰকাৰে ইয়াৰ প্ৰতিবেদন পলমকৈ দাখিল কৰাত আদালতে আজি অসন্তুষ্টি প্ৰকাশ কৰে।
“আমি যোৱা নিশা পুৱা ১ বজালৈকে অপেক্ষা কৰিছিলো যে আমি প্ৰতিবেদন লাভ কৰিম।” ভাৰতৰ মুখ্য ন্যায়াধীশ এন ভি ৰমনাই উত্তৰ প্ৰদেশ চৰকাৰক প্ৰতিনিধিত্ব কৰি থকা জ্যেষ্ঠ অধিবক্তা হৰিশ চালভেক কয়।
শ্ৰীযুত চালভে প্ৰতিবেদনখন মঙ্গলবাৰে এটা বন্ধ আৱৰণত দাখিল কৰা হৈছিল বুলি মন্তব্য কৰাৰ পিছত মুখ্য ন্যায়াধীশে প্ৰত্যুত্তৰ দিয়ে যে, “যদি শেষ মুহূৰ্তত দাখিল কৰা হয় তেন্তে আমি ইয়াক কেনেকৈ পঢ়িব পাৰোঁ? অন্ততঃ এদিন আগতে দাখিল কৰা প্ৰয়োজন।”
উত্তৰ প্ৰদেশ চৰকাৰে গোচৰটোৰ সন্দৰ্ভত কিয় অধিক সাক্ষীক সোধা-পোছা কৰা হোৱা নাই বুলিও প্ৰশ্ন কৰে উচ্চতম ন্যায়ালয়ে।
“এতিয়ালৈকে ৪৪ জনৰ ভিতৰত মাত্ৰ চাৰিজন সাক্ষীৰ ভাষ্য লিপিবদ্ধ কৰিছে। অধিক সাক্ষীৰ ভাষ্য কিয় লোৱা হোৱা নাই?” – মুখ্য ন্যায়াধীশ ৰমনাই প্ৰশ্ন কৰে।
গোচৰটোৰ সন্দৰ্ভত কিমানজন অভিযুক্তক গ্ৰেপ্তাৰ কৰা হৈছে আৰু কি কি অভিযোগত গ্ৰেপ্তাৰ কৰা হৈছে এই সম্পৰ্কেও উত্তৰ প্ৰদেশ চৰকাৰক প্ৰশ্ন কৰে উচ্চতম ন্যায়ালয়ে।
লগতে আদালতে ৰাজ্য চৰকাৰক সাক্ষীসকলক সুৰক্ষা দিবলৈ আৰু তেওঁলোকৰ অধিক প্ৰশ্ন কৰিবলৈ নিৰ্দেশ দিয়ে।
ন্যায়াধীশ হিমা কোহলীয়ে কয় যে উত্তৰ প্ৰদেশ চৰকাৰে গোচৰটোৰ ক্ষেত্ৰত অধিক মনোযোগ দিয়া নাই যেন পৰিলক্ষিত হৈছে। উত্তৰ প্ৰদেশ চৰকাৰে অমনোযোগী আচৰণ ত্যাগ কৰিব লাগে বুলিও ন্যায়াধীশগৰাকীয়ে মন্তব্য কৰে।
৮ অক্টোবৰত হোৱা এক শুনানিত মুখ্য ন্যায়াধীশ ৰমনা আৰু ন্যায়াধীশ সূৰ্য কান্ত আৰু হিমা কোহলীক লৈ গঠিত বিচাৰপীঠে উত্তৰ প্ৰদেশ চৰকাৰে গ্ৰহণ কৰা পদক্ষেপক লৈ অসন্তুষ্টি প্ৰকাশ কৰিছিল।
উল্লেখ্য যে উক্ত শুনানিৰ দিনাই আশীষ মিশ্ৰাই আৰক্ষীৰ চমন এৰাই গৈছিল।
মুখ্য ন্যায়াধীশে ৰমনাই কৈছিল যে, “আমি এতিয়ালৈকে উত্তৰ প্ৰদেশ চৰকাৰে গ্ৰহণ কৰা পদক্ষেপত সন্তুষ্ট নহয়। আমি দায়িত্বশীল চৰকাৰ আৰু আৰক্ষী আশা কৰোঁ। অভিযোগবোৰ অতি গুৰুতৰ। বন্দুকৰ গুলীত আঘাত পোৱাৰ অভিযোগো উত্থাপন হৈছে।”
