সামৰিক বাহিনীত যোগদান কৰাৰ মানসেৰে প্ৰস্তুতি চলাই থকা ৰাজ্যৰ যুৱক-যুৱতীসকলৰ বাবে সুখবৰ। এতিয়াৰ পৰা অসমৰ যুৱক-যুৱতীসকলে অসমীয়া ভাষাতো দিব পাৰিব কেন্দ্ৰীয় সশস্ত্ৰ আৰক্ষী বাহিনীৰ (চিএপিএফ) পৰীক্ষা।
কেন্দ্ৰীয় গৃহ পৰিক্ৰমা মন্ত্ৰালয়ে আজি গ্ৰহণ কৰিছে এক গুৰুত্বপূৰ্ণ সিদ্ধান্ত। এই সিদ্ধান্ত অনুসৰি এতিয়াৰে পৰা কেন্দ্ৰীয় সশস্ত্ৰ আৰক্ষী বাহিনীৰ (চিএপিএফ) কনিষ্টবল (জেনেৰেল ডিউটি) পৰীক্ষা হিন্দী আৰু ইংৰাজীৰ উপৰিও ১৩ টা আঞ্চলিক ভাষাত অনুষ্ঠিত কৰা হ’ব।
এক আনুষ্ঠানিক বিবৃতি অনুসৰি কেন্দ্ৰীয় গৃহমন্ত্ৰী অমিত শ্বাহে কেন্দ্ৰীয় সশস্ত্ৰ আৰক্ষী বাহিনীত স্থানীয় যুৱক-যুৱতীসকলৰ অংশগ্ৰহণ বৃদ্ধি আৰু আঞ্চলিক ভাষাৰ ব্যৱহাৰক প্ৰসাৰিত কৰাৰ বাবে এই ঐতিহাসিক সিদ্ধান্ত গ্ৰহণ কৰিছে।
কেন্দ্ৰীয় সশস্ত্ৰ আৰক্ষী বাহিনীৰ অধীনস্থ সামৰিক বাহিনীসমূহ হৈছে কেন্দ্ৰীয় সংৰক্ষিত আৰক্ষী বাহিনী (চি আৰ পি এফ), সীমান্ত সুৰক্ষা বাহিনী (বি এছ এফ), কেন্দ্ৰীয় ঔদ্যোগিক নিৰাপত্তা বাহিনী (চি আই এছ এফ), ভাৰত-তিব্বতী সীমান্ত আৰক্ষী (আই টি বি পি), সশস্ত্ৰ সীমা বল (এছ এছ বি) আৰু ৰাষ্ট্ৰীয় নিৰাপত্তাৰক্ষী বাহিনী (এন এছ জি)।
বিবৃতিটোত উল্লেখ কৰা মতে, প্ৰধানমন্ত্ৰী নৰেন্দ্ৰ মোদীৰ নেতৃত্বত এক গুৰুত্বপূৰ্ণ সিদ্ধান্ত অনুসৰি গৃহ পৰিক্ৰমা মন্ত্ৰালয়ে হিন্দী আৰু ইংৰাজীৰ উপৰিও ১৩ টা আঞ্চলিক ভাষাত কেন্দ্ৰীয় সশস্ত্ৰ আৰক্ষী বাহিনীৰ বাবে কনিষ্টবল (জেনেৰেল ডিউটি)ৰ পৰীক্ষা অনুষ্ঠিত কৰাত অনুমোদন জনাইছে।
হিন্দী আৰু ইংৰাজীৰ উপৰিও প্ৰশ্নকাকতখন ১৩টা আঞ্চলিক ভাষাত উপলব্ধ কৰা হ’ব। অসমীয়া, বাংলা, গুজৰাটী, মাৰাঠী, মালয়ালম, কানাড়া, তামিল, তেলেগু, ওড়িয়া, উৰ্দু, পাঞ্জাবী, মণিপুৰী আৰু কংকনী আদি ভাষাত উপলব্ধ কৰা হ’ব প্ৰশ্নকাকত।
তামিলনাডুৰ মুখ্যমন্ত্ৰী এম কে ষ্টেলিনে চি আৰ পি এফ জোৱানৰ নিযুক্তি প্ৰক্ৰিয়াত লিখিত পৰীক্ষাৰ বাবে তামিল ভাষাক ভাষা হিচাপে অন্তৰ্ভুক্ত কৰিবলৈ শ্বাহক অনুৰোধ কৰাৰ কিছুদিন পিছতে এই ঘোষণা কৰা হৈছে।
আজি কেন্দ্ৰীয় গৃহ মন্ত্ৰালয়ৰ এই সিদ্ধান্ত গ্ৰহণৰ পাছতে তামিলনাডুৰ মুখ্যমন্ত্ৰীগৰাকীয়ে কেন্দ্ৰক কৃতজ্ঞতা জ্ঞাপন কৰে।
