ৰবীন্দ্ৰ জাডেজা আৰু ৱাশ্বিংটন সুন্দৰৰ অদমনীয় যুঁজ। শেষত ইংলেণ্ডৰ অধিনায়ক বেন ষ্ট’কে মানচেষ্টাৰ টেষ্ট মেচ ড্ৰ’ৰ প্ৰস্তাৱ আগবঢ়ায়। ফলত বেয়া পিটচতো ভাৰতে মৰ্যাদাসহকাৰে খেলখন ৰক্ষা কৰিলে। ১৪৩ অভাৰ বেটিং কৰি ইংলেণ্ডক বিমুখ কৰি ছিৰিজত বৰ্তি থাকিল শুভমন গিল বাহিনী।
দেওবাৰে দ্বিতীয় ইনিংছত জাডেজাই ১০৭ ৰান সংগ্ৰহ কৰে। আনহাতে, ৱাশ্বিংটনে (১০১) জীৱনৰ প্ৰথমটো শতক অৰ্জন কৰে। ষ্ট’কছৰ প্ৰস্তাৱৰ ফলত খেলখন আগতীয়াকৈ ১০ অভাৰ বাকী থাকোতেই শেষ হয়।
ভাৰতৰ এই ড্ৰ’ক নৈতিক জয় বুলি ক’ব পাৰি। এটা সময়ত এনে পৰিস্থিতিৰ সৃষ্টি হৈছিল যে ইংলেণ্ডে মেচখন সহজেই জয়ী হ’বলৈ ওলাইছে। গিল আৰু ৰাহুলৰ উইকেট যোৱাৰ পাছত চিন্তিত হৈ পৰিছিল ভাৰতীয় দৰ্শক। তেওঁলোকৰ মনত কেইবাটাও প্ৰশ্ন উঠি আহিছিল – পণ্টে ভৰিৰ আঘাত লৈ খেলিব পাৰিবনে? তেন্তে মেচখন কোনে বচাব? জাদেজাই অকলে পাৰিবনে?
অৱশ্যে সেই মেচখন ভাৰতে সন্মানেৰে ড্ৰ’ কৰিলে। শৃংখলাত ইংলেণ্ড আগবাঢ়ি থাকিলেও ভাৰত নৈতিকভাৱে পৰাস্ত হোৱা নাছিল। আঁৰত বহু যুঁজৰ ঘোঁৰা জাডেজাৰ সৈতে তৰুণ যোদ্ধা ৱাশ্বিংটন সুন্দৰ। জীৱনৰ প্ৰথম টেষ্ট শতক অৰ্জন কৰে সুন্দৰে। তেওঁৰ শতকৰ পিছতে ষ্ট’কছৰ ড্ৰ’ৰ প্ৰস্তাৱ গ্ৰহণ কৰে গিলে। ফলত মানচেষ্টাৰত জয়ী নোহোৱাৰ ধাৰা অব্যাহত থাকিল ভাৰতৰ।
মানচেষ্টাৰত ভাৰতে প্ৰথম ইনিংছত ৩৫৮ ৰান সংগ্ৰহ কৰে। ইয়াৰ প্ৰত্যুত্তৰত বেন ষ্ট’কছ আৰু তেওঁৰ দলটোৱে ৬৬৯ ৰান সংগ্ৰহ কৰি ভাৰতীয় বলিং এক প্ৰকাৰে তচনচ কৰি পেলায়। ৰানৰ পাহাৰ গঢ়ি ভাৰতৰ সন্মুখত ৩১১ ৰানত অগ্ৰগতি ৰাখিছিল ইংলেণ্ডে।
চতুৰ্থ দিনা বেটিং কৰিবলৈ ওলাই অহা ভাৰতে আগতীয়াকৈ দুটা উইকেট হেৰুৱাই চাপত পৰিছিল। ক্ৰীছ ৱ’কছৰ চতুৰ্থ আৰু পঞ্চম বলত ইজনৰ পিছত সিজনকৈ ড্ৰেছিং ৰুমলৈ উভতি যায় যশস্বী আৰু সুদৰ্শন। মধ্যাহ্ন ভোজনলৈ যোৱাৰ আগতে ভাৰতৰ স্ক’ৰ আছিল ১ ৰানত ২ উইকেট। মেচখন বচাবলৈ ৰাহুল আৰু অধিনায়ক গিলে দৃঢ সংকল্পৰে বেটিং কৰিবলগীয়া হৈছিল। সেই কামত তেওঁলোক সফল হ’ল।
মানচেষ্টাৰত চতুৰ্থ দিনৰ শেষত কে এল ৰাহুলে ৮৭ ৰানত অপৰাজিত থাকে। আনহাতে, শুভমন গিলে ৭৮ ৰানত অপৰাজিত থাকে। কিন্তু পঞ্চম দিনা ৯০ ৰান সংগ্ৰহ কৰি বেন ষ্ট’কছৰ বলত ৰাহুল আউট হয়। অৱশ্যে অধিনায়ক গিলে দৃঢ় মনোবলেৰে সৈতে যুঁজ দিছিল। বেন ষ্ট’কছৰ হঠাতে উঠি অহা এটা বলে গিলৰ হাত আৰু হেলমেটত খুন্দা মাৰে। তথাপিও তেওঁ হাৰ নামানিলে।
অৱশেষত গিলে ২২৮টা বলত শতক অৰ্জন কৰে। কিন্তু তাৰ পিছত আৰু মাত্ৰ তিনিটা ৰান সংযোজন কৰাৰ পাছতে ভাৰতীয় অধিনায়কগৰাকীয়ে হঠাতে জোফ্ৰা আৰ্চাৰৰ বলত উইকেটৰ পিছফালে কেচ দিয়ে। আচলতে ইংৰাজ বলাৰসকলে দীৰ্ঘসময় ধৰি শৰীৰৰ অলপ বাহিৰত বলিং কৰি আছিল। সেই ফান্দটো বাৰে বাৰে এৰাই চলিলেও শেষ ৰক্ষা নহ’ল। ইয়াৰ পিছত মানচেষ্টাৰত চৰ্চিত প্ৰশ্নটো আছিল – ভাৰতে এই টেষ্টত ড্ৰ’ কৰিব পাৰিবনে?
১৩৮ অভাৰৰ পাছত বেন ষ্ট’কছৰ ড্ৰ’ৰ প্ৰস্তাৱ নাকচ কৰিও ভাৰতে সেই মেচখন ৰক্ষা কৰিছিল। খেলখনলৈ আৰু ডেৰ ঘণ্টা বাকী আছিল। জাডেজাই ৮৯ ৰানত, ৱাশ্বিংটনে ৮০ ৰানত বেটিং কৰি আছিল। জাডেজাই ষ্ট’কছক কয় যে তেওঁলোকে অধিক বেটিং কৰিব বিচাৰে। বাধ্য হৈ আম্পায়াৰে খেল অব্যাহত ৰাখিবলৈ নিৰ্দেশ দিয়ে। কথাটো যেন এনেকুৱা আছিল, আমি অলপ সময়ৰ বাবে চাৰি আৰু ছয় মাৰিম, তোমালোকে বলটো বুটলি আনিবা। কিন্তু ৱাশ্বিংটনে প্ৰথম শতক সম্পূৰ্ণ কৰাৰ লগে লগে গিলছে খেল বন্ধ কৰি দিয়ে।
সংক্ষিপ্ত স্কোৰঃ
ভাৰত
প্ৰথম ইনিংছ ৩৫৮ (সুদৰ্শন ৬১, ষ্ট’কছ ৫/৪৫)
দ্বিতীয় ইনিংছ ৪২৫/৪ (ৰাহুল ৯০, গিল ১০৩, জাদেজা ১০৭, সুন্দৰ ১০১)
ইংলেণ্ড
প্ৰথম ইনিংছ ৬৬৯ (ষ্ট’কছ ১৪১, জাডেজা ৪/১৪১)
মেচ অমীমাংসিত
