ৰাষ্ট্রীয় নাগৰিপঞ্জী উন্নীতকৰণ প্রক্রিয়াত একাংশ অবৈধ বিদেশীৰ ৰক্ষকৰ ৰূপত কাম কৰিছিল এন আৰ চিৰ প্রাক্তন মুখ্য সমন্বয়ক প্রতীক হাজেলাই।
এই প্ৰক্ৰিয়াটোত অসমত অবৈধ ভাবে প্রৱেশ কৰি এক বিশেষ ৰাজনৈতিক গোষ্ঠীৰ ভোটবেংক হিচাপে ব্যৱহৃত হৈ থকা অবৈধ বিদেশী নাগৰিকক চিৰদিনলৈ এই ৰাজ্যৰ স্থায়ী নাগৰিকৰ মৰ্যাদা দি এন আৰ চিৰ যোগেদি ভাৰতীয়কৰণৰ এক ষড়যন্ত্ৰত লিপ্ত হৈছিল প্রতীক হাজেলা।
এই অভিযোগ এপিডব্লিউৰ। সংগঠনটোৱে অভিযোগ কৰা অনুসৰি এজনো অবৈধ বিদেশীৰ নাম যাতে বাদ পৰি নাযায় তাৰ বাবে হাজেলাই সৰ্বোচ্চ পন্থা হাতত লৈছিল আৰু সমগ্ৰ এই পদ্ধতিটোত ন্যস্ত স্বাৰ্থসিদ্ধিৰ বাবে বৌদ্ধিক- সামাজিক- ন্যায়িক যি ব্যৱস্হাই প্রয়োজন নহওঁক কিয় অতি দক্ষতাৰে সেই ব্যৱস্হাপনা তৈয়াৰ কৰি লৈছিল।
নিঃসন্দেহে এই প্রক্রিয়াত ব্যৱস্হাপনাৰ বাবে যিমান ধনৰ প্রয়োজন সিমান ধন তেওঁ বিভিন্ন চক্রান্তৰে ব্যয় কৰিছিল। ধনৰ অপব্যয়ৰ ব্যাখ্যা বিচাৰি এবাৰ এন আৰ চিৰ অডিট ৰিপর্টটোত চকু ফুৰালেই সকলো কথা জলজল পটপট হৈ জিলিকি উঠে বুলিও সংগঠনটোৱে মন্তব্য কৰিছে।
চৰকাৰক প্রতীক হাজেলাৰ বিৰূদ্ধে আইনী ব্যৱস্হা লব পৰা সকলো পথ মুকলি কৰি দিয়াৰ পাচতো, আনহে নালাগে সংগঠনটোৰ বিভিন্ন এজাহাৰৰ ওপৰত তদন্তকাৰী বিষয়াই যথেষ্ট পৰিমাণে তথ্য প্রমাণ সাজু কৰাৰ পাছতো আগৰ চৰকাৰৰ গৃহ বিভাগে প্রতীক হাজেলাৰ ওপৰত হাত দিবলৈ সাহ, নকৰিলে।ইয়াৰ অন্যতম কাৰণ হল গৃহ বিভাগত এৰি যোৱা প্রতীক হাজেলাৰ শাখা প্রশাখাবোৰ। এই শাখা প্রশাখা বোৰে হাজেলাৰ বিৰূদ্ধে যোৱা প্রতিটো তদন্তৰ ফাইল দিশপুৰত গাপ দি ৰাখিছিল বুলি সংগঠনটোৱে অভিযোগ কৰিছে।
এই বিভিন্ন দিশবোৰৰ ওপৰত লক্ষ্য ৰাখি সংগঠনটোৱে আজি এখন নতুন এজাহাৰ অসম আৰক্ষীৰ অপৰাধ অনুসন্ধান শাখা চমুকৈ চি আই ডিত দাখিল কৰে।এই এজাহাৰত প্রতীক হাজেলাই কিদৰে বাংলাদেশী মূলৰ অবৈধ নাগৰিককেই ডাটা এণ্ট্রী অপাৰেটৰ হিচাপে নিযুক্তি দি, ওপৰত কোনো বিষয়াই চালিজাৰি চাব নোৱাৰা চফটৱেৰ তৈয়াৰ কৰি সমগ্ৰ বংশ বৃক্ষ পৰীক্ষণ প্রক্রিয়াটোকেই এখন নাটকত পৰিণত কৰি দেশ আৰু জাতিক চৰম প্রতাৰণা কৰি আঁভুৱা ভাঁৰা সেই কথা পুনৰ বাৰ কোৱা হৈছে।
বর্তমানৰ এন আৰ চি ৰাজ্যিক সমণ্বয়কগৰাকীয়ে দাখিল কৰা শপতনামাত স্পষ্টত উল্লেখ কৰা হৈছে যে এন আৰ চিৰ বংশ বৃক্ষ পৰীক্ষণৰ নামত হোৱা ফেমিলী ট্রি মেটচিংত চল্লিশ শতাংশ ভুল আছিল, যি সাধাৰণ মানুহৰ ভুল (Human Error) হব নোৱাৰে।
ই এক সু পৰিকল্পিত সু নিয়ন্ত্রিত ষড়যন্ত্ৰ। প্রতীক হাজেলা ইয়াৰ নায়ক। এয়া এক দেশদ্রোহী অপৰাধ। এয়া অতি গুৰুত্বপূৰ্ণ কথা। আশা কৰিছো নতুন মূখ্যমন্ত্ৰী তথা গৃহমন্ত্ৰী ড৹ হিমন্ত বিশ্ব শৰ্মাই এই বিষয়ত হস্তক্ষেপ কৰি প্ৰয়োজনত অভিজ্ঞ আৰক্ষী বিষয়াৰ এক বিশেষ তদন্তকাৰী গোট তৈয়াৰ কৰি হ’লেও এক পুংখানুপুংখ তদন্তৰ জৰিয়তে প্ৰকৃত সত্য ৰাইজৰ পোহৰলৈ আনি দেশদ্রোহীতাৰ অপৰাধত অপৰাধীৰ ভূমিকা লোৱা প্রতীক হাজেলাক দোষী সাব্যস্ত হলে শাস্তিৰ ব্যৱস্থা কৰিবলৈ দাবী জনাইছে সংগঠনটোৱে।