চলিত ফ্ৰেঞ্চ অপেনৰ দ্বিতীয়খন ছেমিফাইনেলত শুকুৰবাৰে হঠাতে লাগে হুৱা-দুৱা। বিগত কিছুদিন ধৰি বিশ্বৰ ক্ৰীড়াপ্ৰেমীসকলৰ দৃষ্টি নিবদ্ধ হৈ থকা ফ্ৰান্স অপেনৰ ছেমি ফাইনেলৰ খেল বন্ধ হৈ পৰে হঠাতে। সেই সময়ত ফ্ৰান্স অপেনৰ ছেমি ফাইনেলত খেলি আছিল কেচপাৰ ৰুড আৰু মাৰিন চিলিকে। কিন্তু খেল চলি থকাৰ মাজতে কোৰ্টৰ ভিতৰলৈ এগৰাকী যুৱতীয়ে দৌৰি গৈ নিজকে নেটত বান্ধি পেলালে। ফলত বন্ধ হৈ পৰে খেল।
লগে লগে দৰ্শক আৰু নিৰাপত্তাকৰ্মীৰ মাজত হুৱা-দুৱা লাগে। কোন এই যুৱতী, কিয় প্ৰৱেশ কৰিলে কোৰ্টত? এনে প্ৰশ্নই দৰ্শকৰ মনত ক্ৰিয়া কৰিবলৈ লোৱাৰ সময়তে উৰহী গছৰ ওৰ উলিয়াবলৈ সক্ষম হয় তাত উপস্থিত থকা আৰক্ষীয়ে।
দৰাচলতে ফ্ৰান্স অপেনৰ ছেমি ফাইনেলৰ খেলক কোৰ্টৰ ভিতৰলৈ দৌৰি সোমাই যোৱা যুৱতীগৰাকী এগৰাকী পৰিবেশ কৰ্মী। জলবায়ু পৰিৱৰ্তনৰ বিৰুদ্ধে অভিনৱ প্ৰতিবাদ সাৱ্যস্ত কৰাৰ উদ্দেশ্যেই তেওঁ তেনেদৰে কোৰ্টৰ ভিতৰলৈ সোমাই গৈ কোৰ্টত থকা নেটেৰে নিজকে বান্ধি পেলোৱাৰ চেষ্টা কৰিছিল।
ফ্ৰান্স অপেনৰ ছেমি ফাইনেল খেল যিহেতু বিশ্বৰ কোটি কোটি লোকে ইণ্টাৰনেটৰ মাধ্যমত অথবা টেলিভিছনত চাই আছিল সেয়ে এনে প্ৰতিবাদ কৰিলে বিশ্বৰ কোটি কোটি লোকে জলবায়ু পৰিৱৰ্তনৰ বিষয়ত সজাগ হ’ব বুলি ভাবিয়েই যুৱতীগৰাকীয়ে এনে প্ৰতিবাদ কৰিছিল।
যুৱতীগৰাকীয়ে জলবায়ু পৰিৱৰ্তনৰ বিষয়ত ফ্ৰান্সৰ চৰকাৰে প্ৰদৰ্শন কৰি অহা নিষ্ক্ৰিয়তাৰ প্ৰতিবাদ জনাবলৈয়েই এনে প্ৰতিবাদ কৰা বুলি তেওঁ প্ৰকাশ কৰিছে। যুৱতীগৰাকীৰ এনে প্ৰতিবাদৰ বাবেই ফ্ৰান্স অপেনৰ ছেমি ফাইনেলৰ খনে ১৩ মিনিটৰ বাবে বন্ধ হৈ পৰে।
প্ৰতিবাদ সাৱ্যস্ত কৰা যুৱতীগৰাকীৰ নাম আলিজি, বয়স তেওঁৰ ২২ বছৰ।ডাৰ্নিয়েৰ ৰেনোভেশ্বন নামৰ সংগঠনটোৰ তেওঁ এগৰাকী সদস্য বুলি জানিব পৰা গৈছে। এই সংগঠনটোৱে প্ৰকৃতি সুৰক্ষা আৰু জলবায়ু পৰিৱৰ্তনৰ বিৰুদ্ধে গণ সজাগতাৰ সৃষ্টি কৰি আহিছে। যুৱতীগৰাকীৰ এনে প্ৰতিবাদে সমগ্ৰ বিশ্বৰে দৃষ্টি আকৰ্ষণ কৰিবলৈ সক্ষম হৈছে।
এখন বিশ্ব বিখ্যাত খেলৰ ছেমি ফাইনেল চলি থকাৰ মাজতে খেলত বাধা প্ৰদান কৰাৰ বাবে আলিজিৰ বিৰুদ্ধে অৱশ্যে কিবা শাস্তিমূলক ব্যৱস্থা গ্ৰহণ কৰা হৈছে নেকি সেয়া এতিয়ালৈকে জানিব পৰা হোৱা নাই।
