ঘৰৰ মেকুৰীটোক গাখীৰে-চেনীয়ে ভাত সানি মৰমেৰে খুৱালেও পিছে মেকুৰীটোৱে চেনীৰ মিঠা সোৱাদ কেতিয়াও লাভ কৰিব নোৱাৰে।
মেকুৰীৰ বাবে এয়া অভিশাপ বুলি ক’লেও হয়তো ভুল কোৱা নহ’ব।
কাৰণ ৪৮০০ বছৰ পূৰ্বৰে পৰা ঘৰচীয়া হোৱা মেকুৰীৰ দেহৰ পৰা মিঠা সোৱাদ লাভৰ গ্ৰন্থি হেৰাই গৈছে বুলি বিজ্ঞানী সকলে ধাৰণা কৰি আহিছে।
মেকুৰীৰ জিভাত মিঠা সোৱাদ লাভৰ গ্ৰন্থি নাই বাবেই যিমান মিঠা বস্তু দিলেও মেকুৰীয়ে সেই সোৱাদ লাভ নকৰে।
ফিলাডেলফিয়াৰ মনেল কেমিকেল ছেন্সেছ চেণ্টাৰৰ গৱেষক যোচেফ ব্ৰেণ্ডে প্ৰকাশ কৰা মতে কেতবোৰ বিশেষ সোৱাদ লাভৰ ক্ষেত্ৰত কেতবোৰ নিৰ্দ্দিষ্ট জিনে মুখ্য ভূমিকা গ্ৰহণ কৰে।
তেনে জিনৰ ভিতৰত Tas1r2 আৰু Tas1r3 জিন অন্যতম।মেকুৰীৰ ক্ষেত্ৰত তেনে জিনৰ উপস্থিতি নথকাৰ বাবেই মেকুৰীয়ে মিঠা বস্তুৰ সোৱাদ লাভ কৰিব নোৱাৰে বুলি তেওঁ কয়।
পশু-পক্ষীৰ খাদ্যৰ ৰুচিৰ ওপৰত ভিত্তি কৰিয়েই পশু খাদ্য প্ৰস্তুতকৰ্তা সকলে খাদ্য প্ৰস্তুত কৰি আহিছে।
মেকুৰীয়ে যিহেতু মিঠা সোৱাদ লাভ নকৰে সেই বাবে মেকুৰীৰ খাদ্য কৃত্ৰিম ভাৱে মিঠা কৰাৰ বিষয়ত পশু খাদ্য প্ৰস্তুতকৰ্তা সকলে কোনো দিনে গুৰুত্ব নিদিয়ে।
