ক্ৰমাৎ শিৱসাগৰত বৃদ্ধি পাব ধৰিছে গৰু চুৰি ঘটনা। আৰক্ষীৰ নিস্ক্ৰিয়তাৰ বাবেই সক্ৰিয় হৈ উঠিছে গৰু চিণ্ডিকেট চক্ৰ। ইয়াৰে সুযোগ গ্ৰহণ কৰি শুকুৰবাৰে ৰাইজে জব্দ কৰা গৰু ভৰ্তি এখন ট্ৰাক ৰাইজৰ বেহু ভাঙি পলাই যাবলৈ সক্ষম হয়।
ঘটনা অনুসৰি দিচাংমুখৰ পৰা পৰা নগাঁৱলৈ এএছ ২১ ৯২৬৬ নম্বৰৰ এখন ট্ৰাকত ৩৮ টা গৰু চোৰাংভাৱে নি থকা অৱস্থাত পানবেচাৰ শিমলুতলত বিদ্যুতৰ তাঁৰ চিঙাত ৰাইজে গাড়ী সহ চালকক কৰায়ত্ত কৰে।
কোনো যাৱতীয় নথি পত্ৰ নোহোৱাকৈ গাড়ীখনত আনিছিল গৰু খিনি। গৰু সৰবাহৰ বাবে থাকিবলগীয়া লাইভ ষ্টক পাৰ্মিট নথকা ট্ৰাকখন জব্দ কৰি স্থানীয় ৰাইজে সাংবাদিক আৰু আৰক্ষীক খবৰ দিয়ে।
ঘটনাস্থলীত সাংবাদিকৰ দল এটা উপস্থিত হয় যদিও ৰহস্যজনক কাৰণত উপস্থিত হোৱা নাছিল বিয়াগোম শিৱসাগৰ আৰক্ষী বিভাগৰ এজনো আৰক্ষী।
তেনে সময়তে বগা ৰঙৰ স্কৰপিঅ’ত অহা কেইজনমান যুৱকৰ সহায়ত ৰাইজৰ বেহু ভাঙি ট্ৰাকখন পলাই যায়।
ট্ৰাকৰ চালকে জনোৱা মতে গৰু খিনি নগাঁৱলৈ নিছিল যদিও গাড়ীখন নগাঁৱৰ পথৰ পৰিৱৰ্তে ডিব্ৰুগড়ৰ দিশে পলায়ন কৰা ঘটনাই প্ৰমাণ কৰিলে যে গৰু খিনি চোৰাংকৈ সৰবৰাহ কৰিছিল।
আনহাতে, ৰাইজৰ লগতে সাংবাদিকেও শিৱসাগৰ আৰক্ষীৰ উচ্চতম বিষয়াক ২০ বাৰৰো অধিক ফোন কৰি ঘটনাস্থলীলৈ আহিবলৈ অনুৰোধ জনাইছিল যদিও চোৰাং গৰু সহবৰাহকাৰী গাড়ী খন কৰায়ত্ত কৰিবলৈ আৰক্ষীয়ে কোনোধৰণৰ পদক্ষেপ গ্ৰহণ নকৰিলে।
আৰক্ষীৰ এনে নিৰ্লিপ্ত ভুমিকাত গৰু চিণ্ডিকেট আৰু শিৱসাগৰ আৰক্ষীৰ গোপন মিতিৰালি আছে বুলি সন্দেহ প্ৰকাশ কৰিছে ৰাইজে।
উল্লেখযোগ্য যে ইয়াৰ পূৰ্বেও বেতবাৰী, ঘিলাগুৰিত গাড়ীৰ ভিতৰত গৰু সহ বহু কেইটা গৰু চোৰক স্থানীয় ৰাইজে কৰায়ত্ত কৰি আৰক্ষীক চমজাই দিছিল যদিও দুদিনমানতে আৰক্ষীৰ কবলৰ পৰা মুকলি হৈ পুনৰ গৰু চুৰি কাৰ্য সংঘটিত কৰে।
