নখে আমাৰ হাতৰ সৌন্দৰ্য বৃদ্ধি কৰাৰ লগতে স্বাস্থ্যৰ বিষয়েও ইংগিত প্ৰদান কৰে। নখৰ ৰং, গঠন বা অস্বাভাৱিকতা বিভিন্ন ৰোগৰ লক্ষণ হ’ব পাৰে। সুস্থ নখ সাধাৰণতে পাতল গোলাপী ৰঙৰ আৰু কঠিন গঠনৰ হয়। কিন্তু শৰীৰত পুষ্টিৰ অভাৱ বা অন্য সমস্যাৰ বাবে নখত ৰুক্ষতা, হালধীয়া ৰং, ভাঙন বা বগা দাগৰ দৰে সমস্যা দেখা দিব পাৰে। এনে লক্ষণৰ আঁৰৰ কাৰণ জানি লোৱাটো গুৰুত্বপূৰ্ণ।
নখৰ সমস্যা আৰু ইয়াৰ কাৰণ
ৰুক্ষ আৰু ভাঙি যোৱা নখ: নখৰ ৰুক্ষতা বা সঘনাই ভাঙি ফাটি যোৱাটোক ‘অনিকোচিজিয়া’ বোলা হয়। পানীৰ সৈতে বেছি কাম কৰিলে, যেনে বাচন ধোৱা বা কাপোৰ ধোৱা, এই সমস্যা হ’ব পাৰে। ইয়াৰ উপৰিও হাইপোথাইৰয়ডিজম বা আইৰণৰ অভাৱৰ বাবেও এনে হ’ব পাৰে। এনে সমস্যাৰ পৰা বাচিবলৈ পানীৰে কাম কৰাৰ সময়ত গ্ল’ভছ পিন্ধক আৰু আলফা হাইড্ৰক্সি এচিড (AHA) বা লেনলিনযুক্ত লোচন ব্যৱহাৰ কৰক।
কোমল আৰু দুৰ্বল নখ: নখ অতি কোমল বা সহজে ভাঙি যোৱাৰ কাৰণ হ’ব পাৰে ভিটামিন বি, কেলচিয়াম, আইৰণ বা ফেটি এচিডৰ অভাৱ। অত্যধিক আৰ্দ্ৰতা বা ৰাসায়নিক পদাৰ্থৰ সংস্পৰ্শতো এনে হ’ব পাৰে। এই সমস্যা সমাধানৰ বাবে মাল্টিভিটামিন গ্ৰহণ কৰিব পাৰে।
নখত ৰেখা: নখত দীঘলীয়া ৰেখা দেখা দিলে সাধাৰণতে ই গুৰুতৰ নহয়। কিন্তু ৰেখাৰ সৈতে নখ ভাঙে বা ৰং সলনি হয়, তেন্তে ই চিন্তাৰ কাৰণ হ’ব পাৰে। অনুভূমিক ৰেখা বৃক্কৰ সমস্যাৰ ইংগিত দিব পাৰে।
হালধীয়া নখ: নখ হালধীয়া হোৱাটো সাধাৰণ সমস্যা হ’লেও ই থাইৰয়ড, চ’ৰিয়াচিছ বা ডায়েবেটিছৰ দৰে গুৰুতৰ ৰোগৰ লক্ষণ হ’ব পাৰে। সংক্ৰমণৰ কাৰণে হালধীয়া হ’লে চাহ গছৰ তেল ব্যৱহাৰ কৰিব পাৰে, কিন্তু স্বাস্থ্যজনিত কাৰণ হ’লে চিকিৎসকৰ পৰামৰ্শ লওক।
নখত বগা দাগ: নখত সৰু বগা দাগ সাধাৰণত শিশুকালত দেখা যায়, কিন্তু প্ৰাপ্তবয়স্কৰ ক্ষেত্ৰত ই জিংকৰ অভাৱ, ভেঁকুৰৰ সংক্ৰমণ বা এলাৰ্জিৰ লক্ষণ হ’ব পাৰে। দীৰ্ঘদিন এনে লক্ষণ থাকিলে চিকিৎসকৰ পৰা পৰামৰ্শ লওক।
নখৰ তৰপ উঠা: ভৰিৰ নখৰ তৰপ খোলা খোলা হ’লে ই আইৰণৰ অভাৱৰ লক্ষণ হ’ব পাৰে। হাতৰ নখত এনে হ’লে বাহ্যিক আঘাত বা ফেনযুক্ত পানীত বেছি সময় কাম কৰাৰ ফল হ’ব পাৰে।
নখৰ এই সমস্যাসমূহৰ কাৰণ জানিবলৈ আৰু সঠিক চিকিৎসাৰ বাবে বিশেষজ্ঞৰ পৰামৰ্শ লোৱাটো গুৰুত্বপূৰ্ণ। সুষম খাদ্য, পৰ্যাপ্ত পানী গ্ৰহণ আৰু নখৰ যত্নৰ অভ্যাসে এই সমস্যাৰ পৰা পৰিত্ৰাণ পোৱাত সহায় কৰিব পাৰে।
