সাধাৰণতে লেতেৰা বা দাগ লগা যিকোনো বস্তু চাফা কৰিবলৈ আমি গৰম পানী ব্যৱহাৰ কৰিবলৈ ভাল পাওঁ। বেছিভাগ মানুহৰে ধাৰণা যে গৰম পানীৰে ধুলে বীজাণু সহজে মৰে আৰু বস্তুবোৰ বেছি পৰিষ্কাৰ হয়। কিন্তু আপুনি জানেনে যে আমাৰ দৈনন্দিন জীৱনত ব্যৱহাৰ হোৱা কিছুমান বিশেষ বস্তু গৰম পানীৰে কেতিয়াও ধুব নালাগে? যদি আপুনি এনে কৰে, তেন্তে আপোনাৰ মূল্যৱান বস্তুবোৰৰ অপূৰণীয় ক্ষতি হ’ব পাৰে।
মুকুতা, প্ৰবাল বা আন যিকোনো মূল্যৱান ৰত্নৰে নিৰ্মিত গহনা ভুলতেও গৰম পানীৰে পৰিষ্কাৰ নকৰিব। গৰম পানীৰ স্পৰ্শলৈ আহিলে এই গহনাবোৰৰ স্বাভাৱিক জিলিকনি চিৰদিনৰ বাবে নাইকিয়া হৈ যাব পাৰে। ইয়াৰ পৰিৱৰ্তে আপুনি ঠাণ্ডা পানী আৰু সামান্য পৰিমাণৰ মৃদু চাবোন ব্যৱহাৰ কৰি এইবোৰ পৰিষ্কাৰ কৰিব পাৰে, যাৰ ফলত গহনাৰ কোনো ক্ষতি নহয়। একেদৰে, চিৰামিক বা কাঁচৰ বাচন-বৰ্তনৰ ক্ষেত্ৰতো গৰম পানী ব্যৱহাৰ কৰাৰ পৰা বিৰত থকাই ভাল। গৰম পানীৰ ফলত এই বাচনবোৰৰ ৰং ম্লান হৈ যাব পাৰে বা অত্যধিক গৰমৰ বাবে বাচনবোৰ ফাটি যোৱাৰো ভয় থাকে। সেয়েহে, এইবোৰ পৰিষ্কাৰ কৰিবলৈ সদায় ঠাণ্ডা পানী আৰু চাবোনৰ ওপৰত নিৰ্ভৰ কৰিব লাগে।
বহুতো মানুহে কাঠৰ বাচন বা শাক-পাচলি কটা বৰ্ডখন গৰম পানীৰে ধোৱে, যাতে হালধি বা আন ডাঠ দাগবোৰ সহজে আঁতৰি যায় আৰু বস্তুটো পৰিষ্কাৰ হয়। কিন্তু আচলতে গৰম পানীয়ে কাঠৰ ফিনিচিং একেবাৰে নষ্ট কৰি পেলায় আৰু ইয়াৰ জিলিকনি কমাই দিয়ে। সেয়েহে কাঠৰ সামগ্ৰী সদায় ঠাণ্ডা পানীৰেহে ধোৱা উচিত। আনহাতে, কাপোৰৰ ক্ষেত্ৰতো একেই নিয়ম প্ৰযোজ্য। মুগা, ৰেচম, ঊণ বা জৰীৰ কাম কৰা কাপোৰ কেতিয়াও গৰম পানীত ধুব নালাগে। গৰম পানীত ধুলে এনে কাপোৰৰ ৰং ম্লান হোৱাৰ লগতে কাপোৰখন সংকুচিত হৈ বলিৰেখা পৰিব পাৰে। এই মূল্যৱান কাপোৰবোৰ ঠাণ্ডা পানীৰে ধোৱা বা পেছাদাৰী ড্ৰাই-ক্লিনিং কৰাই হৈছে আটাইতকৈ উত্তম উপায়।
ঘৰৰ মজিয়াখন পৰিষ্কাৰ কৰাৰ ক্ষেত্ৰতো আমি বিশেষভাৱে সাৱধান হোৱা প্ৰয়োজন। মাৰ্বলৰ মজিয়া লেতেৰা হ’লে বহুতে গৰম পানী ঢালি চাফা কৰিবলৈ চেষ্টা কৰে। কিন্তু যিকোনো পৰিস্থিতিতে এনে কাম কেতিয়াও কৰা উচিত নহয়, কিয়নো ই মাৰ্বলৰ যথেষ্ট ক্ষতি কৰিব পাৰে। আজিকালি বহুতে ঘৰত পৰম্পৰাগত কাঠৰ মজিয়া বা হাৰ্ডউড ফ্লোৰ ব্যৱহাৰ কৰে যিয়ে ঘৰটোলৈ এক আৰামদায়ক পৰিৱেশ কঢ়িয়াই আনে। এই মজিয়াবোৰ দৈনিক কেৱল সাধাৰণ উষ্ণতাৰ পানীৰেহে পৰিষ্কাৰ কৰিব লাগে। ভুলতেও গৰম পানী ব্যৱহাৰ কৰিব নালাগে, কিয়নো ই কাঠৰ প্ৰাকৃতিক জিলিকনি একেবাৰে ধ্বংস কৰি পেলাব পাৰে। সেয়েহে, যিকোনো বস্তু চাফা কৰিবলৈ গৰম পানী ব্যৱহাৰ কৰাৰ আগতে সদায় দুবাৰ ভাবি ল’ব, অন্যথা সফল চাফাইতকৈ আপোনাৰ ক্ষতিৰ সন্মুখীন হোৱাৰ সম্ভাৱনাহে বেছি।
