ইণ্টাৰনেটৰ জৰিয়তে শিশুক লৈ অশ্লীল ভিডিঅ’ তৈয়াৰী, সংগ্ৰহ, সংৰক্ষণ আৰু বিতৰণৰ দৰে গুৰুতৰ অভিযোগৰ ভিত্তিত চিবিআইয়ে ২৫ মে’ত এক গোচৰ ৰুজু কৰিছিল। কেন্দ্ৰীয় চৰকাৰে এই সন্দৰ্ভত তদন্ত আৰম্ভ কৰি কেন্দ্ৰীয় অনুসন্ধান সংস্থা চিবিআইক দায়িত্ব দিয়ে।
চিবিআইৰ অনুসন্ধানৰ ফলত সোমবাৰে মিজোৰামৰ আইজলৰ লালৰামপন্না নামৰ এজন অভিযুক্তক তেওঁৰ ঘৰৰে পৰা গ্ৰেপ্তাৰ কৰে। তেওঁক শিশুৰ অশ্লীল ভিডিঅ’ প্ৰস্তুত কৰা, সংৰক্ষণ কৰা আৰু বিভিন্ন পৰ্ণ চাইটত প্ৰচাৰ কৰাৰ অভিযোগত ধৰা হয়। অভিযুক্তৰ ঘৰখনত অভিযান চলাই চিবিআইয়ে বহু ইলেক্ট্ৰনিক ডিভাইচ, ভিডিঅ’ সম্পাদনা সঁজুলি, অশ্লীল ছবি আৰু ভিডিঅ’ জব্দ কৰে।
ইয়াৰ পূৰ্বে, ৪ জুনত অভিযুক্তৰ ঘৰ পৰা জব্দ কৰা ইলেক্ট্ৰনিক সামগ্ৰীৰ ফৰেনছিক পৰীক্ষাত বহু গ্ৰাফিক কনটেণ্ট আৰু শিশু নিৰ্যাতনৰ স্পষ্ট প্ৰমাণ পোৱা যায়। এই সামগ্ৰীবোৰ ইন্টাৰপলৰ আন্তঃৰাষ্ট্ৰীয় শিশু যৌন শোষণ (ICSE) ডাটাবেছ আৰু গুগলৰ চাইবাৰ টিপলাইন ৰিপ’ৰ্টছ (CTR)ৰ সৈতে মিলে।
চিবিআইয়ে এই সকলো তথ্য কেন্দ্ৰীয় গৃহ মন্ত্ৰালয়ৰ অধীনৰ চাইবাৰ অপৰাধ সমন্বয় কেন্দ্ৰ i4C-লৈ প্ৰেৰণ কৰে। তদন্তৰ পিছত ধৰা পৰে যে অভিযুক্তই নিজে এই ভিডিঅ’বোৰ প্ৰস্তুত কৰি ইণ্টাৰনেটত আপলোড কৰিছিল। ভুক্তভোগী শিশুক চিনাক্ত কৰাৰ লগতে চিবিআইয়ে কোনো ধৰণৰ বাহ্যিক অভিযোগ নোহোৱাকৈ নিজা চাইবাৰ চোৱাচিটা ব্যৱস্থাৰ জৰিয়তে এই অপৰাধৰ সন্ধান লাভ কৰে।
এই ঘটনাই শিশুক লৈ অনলাইন নিৰ্যাতনৰ ক্ষেত্ৰত দেশত সজাগতা আৰু কঠোৰ ব্যৱস্থা গ্ৰহণৰ প্ৰয়োজনীয়তা আৰু স্পষ্ট কৰি তুলিছে।
