উন্নাও ধৰ্ষণ গোচৰৰ মূল অভিযুক্ত তথা বিজেপিৰ প্ৰাক্তন বিধায়ক কুলদীপ সিং চেংগাৰৰ শাস্তি স্থগিত ৰাখি দিল্লী উচ্চ ন্যায়ালয়ে প্ৰদান কৰা জামিনৰ নিৰ্দেশক এতিয়া প্ৰত্যাহ্বান জনাবলৈ সাজু হৈছে কেন্দ্ৰীয় তদন্তকাৰী ব্যুৰো চমুকৈ চিবিআই। সূত্ৰৰ পৰা লাভ কৰা খবৰ অনুসৰি তদন্তকাৰী সংস্থাটোৱে ইতিমধ্যে উচ্চ ন্যায়ালয়ৰ এই সিদ্ধান্তৰ আইনী দিশসমূহ পৰীক্ষা কৰিছে আৰু অতি সোনকালে উচ্চতম ন্যায়ালয়ত বিশেষ ছুটীৰ আবেদন বা এছএলপি দাখিল কৰিব। উল্লেখযোগ্য যে ২০১৭ চনৰ এই জঘন্য ধৰ্ষণ গোচৰত নিম্ন আদালতে চেংগাৰক যাৱজ্জীৱন কাৰাদণ্ড বিহিছিল যদিও শেহতীয়াকৈ দিল্লী উচ্চ ন্যায়ালয়ে তেওঁৰ আবেদন বিচাৰাধীন হৈ থকাৰ সময়তে এই শাস্তি স্থগিত ৰাখি জামিন মঞ্জুৰ কৰিছে।
অৱশ্যে দিল্লী উচ্চ ন্যায়ালয়ে জামিন দিলেও কুলদীপ চেংগাৰ এতিয়াই কাৰাগাৰৰ পৰা ওলাই অহাৰ সম্ভাৱনা নাই। ইয়াৰ কাৰণ হ’ল ধৰ্ষণৰ বলি হোৱা কিশোৰীগৰাকীৰ পিতৃৰ জিম্মাত থকা অৱস্থাত মৃত্যু হোৱা ঘটনাটোত জড়িত আন এটা পৃথক গোচৰত তেওঁ দোষী সাব্যস্ত হৈ ১০ বছৰৰ কাৰাদণ্ড ভুগি আছে। চিবিআইৰ মতে তেওঁলোকে উচ্চ ন্যায়ালয়ৰ বিভাগীয় বিচাৰপীঠৰ ৰায়টো পুংখানুপুংখভাৱে অধ্যয়ন কৰিছে আৰু অভিযুক্ত চেংগাৰক মুকলি কৰি দিলে হ’ব পৰা নেতিবাচক প্ৰভাৱৰ কথা চিন্তা কৰি এই নিৰ্দেশৰ বিৰুদ্ধে শীৰ্ষ আদালতৰ কাষ চপাৰ সিদ্ধান্ত লৈছে।
দিল্লী উচ্চ ন্যায়ালয়ত শুনানি চলি থকাৰ সময়তো চিবিআই আৰু ভুক্তভোগীৰ পৰিয়ালে কুলদীপ চেংগাৰৰ জামিনৰ তীব্ৰ বিৰোধিতা কৰিছিল। সংস্থাটোৱে আদালতত লিখিত যুক্তি দাখিল কৰি জনাইছিল যে এনে গুৰুতৰ অপৰাধত জড়িত ব্যক্তিৰ শাস্তি স্থগিত ৰখাটো উচিত নহ’ব। একে সময়তে ভুক্তভোগীৰ পৰিয়ালে নিজৰ নিৰাপত্তা আৰু ভাবুকিৰ শংকা প্ৰকাশ কৰি জামিন আবেদনৰ আপত্তি দৰ্শাইছিল। এই সকলোবোৰ দিশ বিবেচনা কৰিয়েই চিবিআইয়ে এতিয়া তৎক্ষণাত উচ্চতম ন্যায়ালয়ত এই নিৰ্দেশক প্ৰত্যাহ্বান জনোৱাৰ বাবে প্ৰস্তুতি চলাইছে।
ইফালে উচ্চ ন্যায়ালয়ে চেংগাৰক জামিন দিলেও তেওঁৰ ওপৰত কেইবাটাও কঠোৰ চৰ্ত আৰোপ কৰিছে। নিৰ্দেশ অনুসৰি তেওঁ ভুক্তভোগীৰ ঘৰৰ পৰা ৫ কিলোমিটাৰ ব্যাসাৰ্ধৰ ভিতৰত প্ৰৱেশ কৰিব নোৱাৰিব আৰু দিল্লীতে বাহৰ পাতি থাকিব লাগিব। তদুপৰি তেওঁক ১৫ লাখ টকাৰ ব্যক্তিগত বণ্ড আৰু তিনিজন জামিনদাৰৰ গেৰাণ্টি জমা দিবলৈ কোৱা হৈছে। আদালতে লগতে নিৰ্দেশ দিছে যে তেওঁ নিজৰ পাছপ’ৰ্ট জমা দিব লাগিব আৰু প্ৰতি সোমবাৰে স্থানীয় আৰক্ষী থানাত হাজিৰ হ’ব লাগিব। এই চৰ্তসমূহৰ সামান্যতমো উলংঘা হ’লে তেওঁৰ জামিন তৎক্ষণাত বাতিল কৰা হ’ব বুলিও স্পষ্ট কৰি দিয়া হৈছে।
উচ্চ ন্যায়ালয়ৰ এই সিদ্ধান্তই ভুক্তভোগী পৰিয়ালটোক বিচলিত কৰি তুলিছে। ধৰ্ষণৰ বলি হোৱা মহিলাগৰাকীয়ে সংবাদ মাধ্যমৰ আগত ক্ষোভ প্ৰকাশ কৰি কয় যে অভিযুক্তৰ মুক্তি তেওঁলোকৰ সমগ্ৰ পৰিয়ালটোৰ বাবে মৃত্যু সদৃশ কথা হ’ব পাৰে। তেওঁলোকে ইতিমধ্যে এই সিদ্ধান্তক লৈ দিল্লীত প্ৰতিবাদো সাব্যস্ত কৰিছে। ইয়াৰ পূৰ্বে এই স্পৰ্শকাতৰ গোচৰটো উত্তৰ প্ৰদেশৰ পৰা দিল্লীলৈ হস্তান্তৰ কৰা হৈছিল যাতে নিৰপেক্ষ বিচাৰ আৰু ভুক্তভোগীৰ সুৰক্ষা নিশ্চিত কৰিব পৰা যায়। এতিয়া চিবিআইৰ আবেদনৰ ওপৰতহে নিৰ্ভৰ কৰিব চেংগাৰৰ কাৰাদণ্ড বাহাল থাকিব নে তেওঁ পুনৰ বাহিৰলৈ ওলাই আহিব।
